IYYOOBI 9 - Qullaawa Maxaafa

IYYOOBI QOLINO DAWARO

¹ Iyyoobi daware,

² «Ki'ne yitinanniri baalu halaale ikkinota afoommo; kayinnilla, mannu Maganu albaanni keeraancho ikkara dandaannoni?

³ Isi ledo coyi'ramara hasi'riro, kumu coyi giddonni mittunni nafa garara didandaanno.

⁴ Isi egennaamohonna wolqaataamoho; iso yekkeere qeelara dandaannohu ayeti?

⁵ Maganu hanqanno woyite, ilaalla shashshafanno; darginni kayise galchanno.

⁶ Baatto darginni shafe kayisanno; baattote safo shashshafanno.

⁷ Maganu arrishsho, ‹Fultooti!› beeddaheno, ‹Xabbooti!› yaanno.

⁸ Gordo callichisi diriirsino; baaru dambalano sammi assannohu isooti.

⁹ Dibi, Ooriyooninna Piliyaadi yinanni beeddahenna, wodiidi ragaanni noo beeddahe, hubbo hubbo asse gordoho worinohu isooti.

¹⁰ Hendara dandiinannikkiha lowo coye assanno; kiirre fullannikki maalale loosanno.

¹¹ Ane widoonni hige sa"anno; ani kayinni diafeemmosi; mule'yaanni hige sa"anno; anera kayinni dileellanno.

¹² Hasi'rinore adhiro hoolannosihu ayeti? ‹Ma"assitanni nootto?› yaannosihu nooni?

¹³ Maganu hanqosi badhera diqolanno; Reaabi yinanniha baaru moyicho kaa'litinore cancanino.

¹⁴ «Isira tumo qolate, anera mayi afii nooe?

¹⁵ Keeraancho ikkoommoro nafa, iso maaro huucci'reemmota ikkinnina, isira tumo diqoleemmo.

¹⁶ Woshshi'reenna dawariero nafa, huuccatto'ya macciishshinoronna hooginoro diafeemmo.

¹⁷ Bubbetenni cancanannoe; assoommori nookkiha lede lede madiissannoe.

¹⁸ Foole qo'la nafa diaannoe; heeshsho'ya shettonnita assanno.

¹⁹ Wolqannire hendiro, isi geeshsha ikkannohu dino; yoote coye ikkirono, iso yoote shiqishannohu ayeti?

²⁰ Keeraancho ikkummorono, afii'ya saote kiirannoe; fayyaaleessa ikkummorono, isi soro'ya leellishannoe.

²¹ Aye geeshshano keeraancho ikkummoro, heeshsho'ya daafira dimitii'meemmo.

²² Maganu keeraanchono cubbaataamono, mitteenni hunanno daafira, ‹Baalunku taaloho› yoommo.

²³ Hedeweelcho bao dagganno woyite, keeraanote qarra lae oso'lanno.

²⁴ Baatto cubbaataammu angara aamantino; yoo yitannorita ille beeshshe, yoo yinannikki gede assino. Konne assinohu Magano ikka hoogiro, wolu hige ayetiyya?

²⁵ «Barri'ya dodanno manchinni roore ariiffatanno; mittu hagiirrino nookkiha xooqanno.

²⁶ Barri'ya muddantanni noo yowolo gedeeho; itannorira buuwanno allamurchi gede ikke rahanno.

²⁷ Ani dadille'ya hawummorono, alba kolishshi'ra agure hagidhummorono,

²⁸ keeraancho assite kiirattoekki daafira, qarrunna shetto daggannoe yee yaadeemmo.

²⁹ Sao kiirante heedheennae, mulla mayira daafureemmo?

³⁰ Biso'ya saamununni hayishshi'rummorono, anga'ya haraanjunni hayishshi'rummorono,

³¹ ati kayinni ishinu balera tugattoe; imaani'ya nafa cee'mannoe.

³² Tumo qoleemmosikki gedenna, ledosi yoote ha'reemmokki gede, isi ane gede mancho di"ikkino.

³³ Isiranna anera, mereero eannohu dino; isiranna anera, yoo yaannohu dino.

³⁴ Gantannoeta siqqosi aani'yanni hoole, mayi waajjeemmokki gedella assae!

³⁵ Hatte yannara, umi'ya keeraanchimma afoommo daafira, waajjummokkinni coyi'reemmo.