IYYOOBI 42 - Qullaawa Maxaafa

¹ Hakkunni gedensaanni Iyyoobi Kaaliiqira,

² «Baalankare assa dandaattoha ikkoottotanna, hedoottore hoola dandaannohu nookkita afummo.

³ ‹Afoottori nookkihu, ani hedoommore kageeshshi geeshsha mayira xa'mitto?› yoottoe. Xa'mammora dandoommohu buuxoommokkihuraati; hedo'yara aleenni ikkinore afammora yee coyi'roommo.

⁴ ‹Hanni coyi'reemmore macciishshite, xa'meemmohere qolie› yoottoe.

⁵ Macciishshate woyite duduwokki macciishshoommo; xa kayinni ille'yanni afoommohe.

⁶ Kunnira, coyi'roommo coyi baalu, ane umo'ya saalfachishinoe. Kunni daafira, buluulunna bukote aana ofolle aagintaaweemmo» yii.

GUMULSHA

⁷ Kaaliiqi Iyyoobi ledo hasaawa gudihu gedensaanni, Temaanichu Elfaazira, «Brojjichi'ya Iyyoobi gede ane daafira taalo coye dicoyidhinoonnina, hanqi'ya atenna lamunku jaallakki aana buwino.

⁸ Xa kunnira lamala boottanna lamala ge'reewu gocca haadhine, borojjichi'ya Iyyoobiwa marre. Shilqote kakkalono umi'nera shiqishshe; borojjichi'ya Iyyoobi ki'ne daafira huuccannona, anino hambe'ne daafira qorichisheemmo'nekki gede, huuccattosi macciishsheemmo. Ki'ne borojjichi'ya Iyyoobi gede ane daafira taalo coye dicoyidhinoonni» yii.

⁹ Temaanichu Elfaazi, Shuhichu Beldaadinna Neimaatichu Soofaari marte, Kaaliiqi hajajinonsa gede assitu. Kaaliiqino Iyyoobi huuccatto macciishshi.

¹⁰ Iyyoobi sasente jaallasi daafira huuccihu gedensaanni, Kaaliiqi layinkimeeshsho dureessa assisi; albinni roore lame ero ikkitanno jiro uyisi.

¹¹ Hatte yannara Iyyoobiri meyanna labbaa roduuwisi, hattonni alba afinosi manni baalu la"asira kae dayi. Minisira e'e isi ledo sagale ittu. Isi daafira dadillitinota coyidhe Kaaliiqi abbinosi qarri daafira jawaachishshusi. Mittu mittunku woxenna culku cuue afansha assite uyitusi.

¹² Kaaliiqi Iyyoobita goofimarchu heeshsho albitenni roorse maassi'ri. 14,000 ge'reewo, 6,000 gaala, 1,000 waaxa handanna 1,000 harre uyisi.

¹³ Qoleno, 7 labballinna 3 seenni anna ikki.

¹⁴ Seennisira su'ma, umita Yimiima, layinkita Qaasiya, sayikkita Qerenihafuki yee fushshi.

¹⁵ Hatte yannara xumme seennisi geeshsha ikkitinota mitteno meya beetto baattote aana dianfoonni. Anninsa, roduuwinsa ledo insarano iqqa uyinsa.

¹⁶ Hakkunni gedensaanni, Iyyoobi 140 diro hee'ri. Oososi oosono 4 ilama geeshsha afi.

¹⁷ Lowo diro hee'rihu gedensaanni geedhe mannu aalo ikkino.