IYYOOBI 39 - Qullaawa Maxaafa

¹ «Gobba meicho qaltanno yanna afoottoni? Bulaa qaltanna affe egennoottoni?

² Ise haadhe mageeshshi yanna keeshshitannoronna, mamaro qaltannoro afoottoni?

³ Gaffi yite wilii'lese qaltannohu, mamooteetiro afoottoni?

⁴ Wilii'linsa dubboho lophe jawaatanno; fule ha'rihu gedensaanni, layinkimeeshsho amansawa dihiganno.

⁵ «Gobba harre hasidhuwa hadhanni heedhanno gede, assinohu ayeti?

⁶ Ani halallitte baattora heedhanno gede assoommonsa; maxine fultanno gobbara heedhanno gede assoommonsa.

⁷ Cancu noo qachinni faffe heedhanno; badheenni hige cancanni ganannonsahu dino.

⁸ Ilaallate aana hossanno; hakkiichono ittannota shaqqado hayisso hasidhanno.

⁹ «Boowilchu maahoyye yee loosannoheni? Hoowekkira galannoni?

¹⁰ Boowilcho waaxxe, kado goshooshanni hawuurannohe gede assa dandaattoni?

¹¹ ‹Wolqaataamo ikkino daafira, jawaata looso baala loosannoe› yite hexxattoni?

¹² ‹Gide'ya gamba asse, ayiddummete duunannoe› yite agadhattoni?

¹³ «Balgudu qoolasi rahe fananno; ikkollana kayinni rumichu gede dibuuwanno.

¹⁴ Balgudu quuphesi baattote aana facci asse agureenna, iibbino shaafi gammuute hee'ranno gede assanno.

¹⁵ ‹Hakkaanni hige sa"annohu, dubbu moyichi kade hiiqqanno› yee dihedanno.

¹⁶ Quuphe umisihu gede asse la"annokki daafira dimararanno; daafurisi baalu mulla gatirono bashshi diassanno.

¹⁷ Hatto asse busulle ho'loommosihunna, gowwa assoommosihu aneeti.

¹⁸ Kae dodanno yannara kayinni, ledosi qolchantara heddannore, farashshonna farashshaanna oso'lannonsa.

¹⁹ «Iyyoobi, faradoho wolqa oottohu, seeda gamma worte biifisoottohu ateetini?

²⁰ Kanchafaru gede kukkubbanni furrisatenni, manna masisanno gede assattohu ateetini?

²¹ Laggate sunsumanno; noosi wolqa baalatenni olaho dodanno.

²² Waajjate yinannire horonta diegennino; bagado alba qollisiro nafa badhera dihiganno.

²³ Guluffanno bagadaasine amaddino bagadi, arrishshunni bilicci bilicci yaanni mimmitoho ga'ne luulanno.

²⁴ Faradu kayinni guulara yee baatto kaxxa hooganno; xurumba ufuunfanni woyite, goontetenni olu widira hige harfiixanno.

²⁵ Xurumba ufuunfanni kiiro hagiirrunni furrisanno; olu noota fafowa hee're foolunni afanno; gaadisaanote hajajo macciishshe furrisanno.

²⁶ «Tillaallo qoollase wanga assite, wodiidira higge buubbanno gede, busulle oottosehu ateetini?

²⁷ Doowiru seeda ilaala gidde, mine mi'nate ati kulattosira agadhannoni?

²⁸ Doowiru ilaalu birxera mine mi'ne hee'ranno; seeddaanna kinna jawaata golo ikkitannosi.

²⁹ Hakkiicho hee're woro qole la"anno; itannore afi'rate xeertote illaallisanno.

³⁰ Doowiru raqu noowa gamba yaanno; caacurrisino mundee aganno» yii.