IYYOOBI 34 - Qullaawa Maxaafa

¹ Eelihu lede coyi'ranni,

² «Ki'ne hayyoole, coye'ya macciishshe; ki'ne baalanka coye anfoommo yitinanniri, macca'ne anewa qolle.

³ Arrawu sagale qamasannonte gede, maccano coyi'nanni coye macciishshitanno.

⁴ Woyyannonkeha doodhino; dancha coye mitteenni murro.

⁵ «Iyyoobi, ‹Ani keeraanchoho; Maganu kayinni halaale'ya difushshino.

⁶ Ani hiitto ikke beebbatenni, keeraancho di"ikkoommo yee xaareemmo; keeraancho ikkummoro nafa, Maganu busha madanni ganeennae, reyote gambisoommo› yootto.

⁷ «Iyyoobi gede, Magano ayirrisannokki manchi horonta nooni?

⁸ Isi bushuullu ledo jaaloomanno; hosannohuno insa ledooti.

⁹ Qoleno, ‹Maganu hedo wonsha, mannaho maa kaa'litanno› yiino.

¹⁰ «Ki'ne wodanchitinanniri hanni macciishshe"e. Wo'manka Dandaanno Magani, hoorontanni busha coye diassanno.

¹¹ Maganu manchoho loosisi gede aanno; ha'rinshosi garinni hasiisannosire assanno.

¹² Wo'manka Dandaanno Magani, horonta busha coye diassanno; aye halaaleno didawisanno.

¹³ Maganu noosi roorre ayewiinnino diadhino; gobba baalate gashshaancho asse ayino dimoohisinosi.

¹⁴ Maganu heeshshote foole qole adhiro,

¹⁵ mannu baalu ba"anno; galagale bushsha higanno.

¹⁶ «Egennaamma ikkitinoonniro macciishshe; macca'ne kawa coyi'reemmo coyi widira qolle.

¹⁷ Halaalaancho yoo yaannokki manchi gashshe didandaanno; ati kayinni halaalaancho yoo yaannohanna, wolqaataamo Magano bushiishootto.

¹⁸ Maganu, mootoollanna gashshaano bushshuro, bushuullenna ba'raassinokkire ikkitinota kulannonsa.

¹⁹ Baalanka kalaqinohu Magano ikkinohura, isi gashshaanote alba lae godowa dihosanno; dureessa buxichunni roorse dila"anno.

²⁰ Manchu goxinowa hee're, hendikkinni ree gatara dandaanno. Mannu baalu kunni garinni, hakkawoyintenni huxi're ba"ara dandaanno; wolqaataammano, mannu anga kissunsakkinni shaanno.

²¹ «Maganu mannu ha'ranno doogo baala illaallisanno; qaafosi baala la"anno.

²² Bunshe loossannori Maganuwiinni maaxama didandiitanno; dhi'mote tunsichi giddo nafa maaxante diaffanno.

²³ Maganu ayerano yoo yaara barra diamadanno.

²⁴ Gashshaano gashshootu aaninni dirrise, darginsara wole worate, wolu amaale dihasi'ranno.

²⁵ Insa loossannore baala afinohura, mittu hashshinni gashshootu aaninni dirrise hunannonsa.

²⁶ Bushuulle loossino cubbi daafira, mannu baalu albaanni qorichishannonsa.

²⁷ Hatto assannohu, isi hoode ha'ra agurtinohuranna, hajajosi mishshinohuraati.

²⁸ Hakkuri buxane qarrisse, Maganunniwa higge raartanno gede assitanno; isino raarensa macciishshino.

²⁹ Maganu konne baala afe mittoreno assa giwiro, busha assootto yee coyi'rannosihu ayeti? La'nannikki gede alba maaxi'riro, la"asira dandaannohu dino; isi gobba gosate aliidiho.

³⁰ Maganu iso afinokki mancho, manna garimale gashshannoha doore, gashshaancho assara dandaanno.

³¹ «Iyyoobi, cubbokki Maganoho aagintaawoottoni? Galagalte cubbo dilooseemmo yite xaaroottoni?

³² Maganu saokki kulannohe gede xa'moottoni? Kunni ka'a horontanni bunshe assa hoogate sumuu yoottoni?

³³ Ati Maganunniwa higittokkinni, Maganu wodanikki yorto wonshannoheha lawannoheni? Kunnira, murte atete ikkinnina dianetena, xa hanni hedoottore kulinke.

³⁴ «Wodancha afi'rino manni baalu, ane ledo sumuu yaanno; ani yeemmota macciishshitanno hayyooleno,

³⁵ ‹Iyyoobi konne baala coyi'rinohu, egenno hoogginosihuraati; coyisino ba'raasinoha di"ikkino› yitanno.

³⁶ Iyyoobi yaannore baala seekkitine heddiniro, bushu manchi gede coyi'ranni noota buuxxinanni.

³⁷ Cubbu aana cubbo ledanni, ninke jaallasi ledo gereeramino. Batinye coye coyi'ranni, Maganono mishino» yii.