IYYOOBI 3 - Qullaawa Maxaafa

IYYOOBI ILAMINO BARRA RUMI

^1-2 Hakkunni gedensaanni Iyyoobi ilamino barra rumanni,

³ «Hakku godowamummo hashshinna, ilamummo barri bao!

⁴ Hakko barri tunsicho ikko; Maganu iima hee're qaagoonkesi; xawaabbuno hee'roonkesi.

⁵ Tunsichunna reyote caali uminsa woxe assidhosi; gomichu beeshshe amadosi; barriha xawaabbasi tunsichu egemmo.

⁶ Hakkonne hashsha tunsichu amadosi; diru kiiro giddorano eoonke. Hakko barri mittu agani giddo nafa kiiramoonke.

⁷ Hakku hashshi godombannikkihanna illeno ilillinsannikkiha ikko!

⁸ Lewaataani yinanniha baaru moyicho kakkayissannori, hakkonne barra runtosi.

⁹ Hakko hashshi bakkalchi tunso; xawaabba agadhe hoogo; soodo caamileno afoonke.

¹⁰ Ama'ya otootto cufe, ille'ya qarra la'annokki gede diassinona, hakku barri rumaminoha ikko!

¹¹ «Ama'ya godowi giddo hee're mayi bao! Godowunni fulanni hee'renni mayi rahe reyo!

¹² Ama'ya giwoodisera mayira hanqaffue? Unuunaseno hanni mayira qansitue?

¹³ Hatte yannara reyommoro, xa fooliishshi'reemmohu baino.

¹⁴ Albiha mootete mine galagalchite seekkisiisidhinori, baattote mootoollanna amaalaasinete ledo,

¹⁵ minnansara culkanna birra wonshidhino gashshaano ledo, fooliishshi'reemmohu baino.

¹⁶ Barri-male ilame madaaraminohu gede, xawaabba afummokkinni mayira reya hoogummo?

¹⁷ Waammate giddo bushuullu bunshe diassitanno; daafurtinori hakkiicho fooliishshidhanno.

¹⁸ Usurante keeshshitinori baalu, hakkiicho keere heedhanno; hanqannonsa roorrichi dihee'ranno.

¹⁹ Shiimuno lowohuno hakkiicho no; hakkiicho, mootichu borojjichosi digadadisanno.

²⁰ «Shette heedhannorira xawaabba, heeshsho qaraartinorira heeshsho mayira uyini?

²¹ Reyo halchite hoogginori, jirontenni roore waamma doodhitinori,

²² waammanniwa shiqqanno woyite calla, hagiirru wo'mannonsari lubbotenni ma"assidhara heedhanno?

²³ Doogo soorrantinosi manchira, fulannowi nookkiha Maganu huxxe beeshshinosihura, heeshsho mayira aamantusi?

²⁴ Sagalete darga dadille hurbaaxxeemmo daafira, shetto'ya raareno lolahanno wayi gedeete.

²⁵ Yaadoommo coyi iillinoe; waajjoommo coyi amadinoe.

²⁶ Keere diafi'roommo; difooliishshi'roommo; qarri'yano digoofannoho» yii.