IYYOOBI 27 - Qullaawa Maxaafa

¹ Iyyoobi lede coyi'ranni,

² «Halaale'ya fushsha giwinohunni, heeshsho'yano qaraartinota assinohu, Wo'manka Dandaannohu Heeshshote Magani su'minni xaareemmo.

³ Maganu fooli giddo'ya noo geeshshanna, lubbotenni noommo geeshsha,

⁴ arrawi'yanni dhara coyi'reemmokkitanna, kaphunni ayeno dogeemmokkita xaare egensiiseemmo.

⁵ Ki'ne coyidhinoonniha baala horonta halaaleho yee diadheemmo; reyammo geeshsha keeraanchimma'ya diagureemmo.

⁶ Keeraanchimma'ya kulanni hee'reemmo; wodani'yano busha assootto yaannoeri dihee'ranno.

⁷ «Maganu diinna'ya, bushuullenna cubbaataamma qorichinshannihu gede asse qorichishonsa.

⁸ Maganu hunisihunna lubbosi haa'rihu gedensaanni, maganiweelu manchiti hexxosi maati?

⁹ Halaalinta qarru daannosi yannara, Maganu huuccattosi macciishshannoni?

¹⁰ Wo'manka Dandaanno Maganinni tashshi yaannosini? Wo'manka woyite Magano huucci'rannoni?

¹¹ «Ani Maganu wolqa mageeshshi geeshsha lowotero rosiiseemmo'ne; Wo'manka Dandaanno Magani hedinore kuleemmo'ne.

¹² Ki'ne baalunku tenne affinanni heedhinenni, mayiralla haafare coyidhinanni?

¹³ «Wo'manka Dandaanno Magani, bushanna beebba assannoha, kunni garinni qorichishanno.

¹⁴ Oososi haammata ikkituro nafa, olunni gooffanno; sirchisino sagale diduuwanno.

¹⁵ Hakkiinni gattinoreno dhibbu gudanno; galtensa nafa diwi'litannonsa.

¹⁶ Birra bushshu gede duu'nironna, imaana hasiisannohu aleenni afi'rirono,

¹⁷ isi gamba assino imaana keeraanchu uddi'ranno; birrasi fayyaaleessu manchi adhanno.

¹⁸ Mi'nanno mini qiissanete mini gedenna, gide agadhate ga'ninanni daasi gede mulenni diigamanno.

¹⁹ Duroo'me hee're goxanno; baqqi yaanno woyite kayinni, buxima agarte noosi.

²⁰ Masillu lolahu gede hedeweelcho egemmannosi; hashshano hombobolatte hawulukkannosi.

²¹ Soojjaati bubbe noo mininni, haadhe hooltannosi.

²² Buuwe xooqe fulara wo'naa'liro nafa, mararro nookkiha dagge aanaho ubbannosi.

²³ Bubbe mannu gede anga gantanni haariintannosi; fiiqattotenni noowiinni wigidiidde tuggannosi» yii.