IYYOOBI 26 - Qullaawa Maxaafa

IYYOOBI BELDAADIRA QOLINO DAWARO

¹ Iyyoobi daware,

² «Tenne coyi'rakkinni, atetero wolqiweelo baasa kaa'lootto! Daafurinohano lowo geeshsha irkisootto!

³ Egenno afi'rinokkihura mageeshshi amaale uyittosi! Mageeshshita xabbino hedo kulittosi!

⁴ Togo coyi'rattora kaa'linohehu isi ayeti? Coyi'rate tenne hedo wodanaho worihehu ayeti?» yii.

⁵ Beldaadi qole, «Reyitinori baattote woroonni noo wayi giddo heedhe, waajjite huxidhanno.

⁶ Jeennaatu Maganu albaanni reqecci yee no; albisinni gole maaxannori mitturino dino.

⁷ Mitturino nookkiwa Maganu aliyye gordo iima diriirsi; baattono mulla darga rarraasi.

⁸ Maganu, gomichoho waa wonshino; wayi ayirreenna dhoohannokki assino.

⁹ Maganu, agana gomichunni diwanno.

¹⁰ Xawaabbanna tunsicho badate, lowo baari aana danna qasino.

¹¹ Isi hanqanno woyite, gordo dukkino tuuqqa masse huxidhanno.

¹² Wolqasinni baara sammi assanno; hayyosinni Reaabi yinanniha baaru moyicho murmuranno.

¹³ Foolisinni gordo wara'a asse xawisino; angasinni, xooqanni noo dhudhuufa qasino.

¹⁴ Kuni baalu Maganu loosinori giddonni shiimiidiho; loosinori giddonni macciishshinoommori hilireeti; wolqasi lowimma hiitto assine afa dandiinanni?» yii.