IYYOOBI 21 - Qullaawa Maxaafa

IYYOOBI QOLINO DAWARO

¹ Iyyoobi daware,

² «Hanni yeemmore seekkitine macciishshe; macciishshitiniero, sheshifachishshinoonniehu gede asse kiidheemmo.

³ Coyi'reemmona hanni agarre"e; coyi'rummohu gedensaanni qacifattinanniena.

⁴ Ani Magano ikkinnina manna abbooshshi'roommoni? Cinca hooga'yara diqayishshinannie.

⁵ Hanni kawa higgine ane la'e; xa ikke noommo gari shorodhi diyaanno'ne?

⁶ Ikke noommo gara hedeemmo woyite maseemmo; waajjillunni kainohunni mannimma'ya huxidhanno.

⁷ «Maganu busha manna mayira wore, lowo diro hee'ranno gedenna, jirotenni bati'ranno gede assi?

⁸ Oosonsa qiniitaamma ikkitanno; insano oosonsa ooso affanno.

⁹ Bushu manni waajjikkinni hee'ranno; Maganu siqqosinni diganannonsa.

¹⁰ Saadansa sayisidhukkinni haadhe qaltanno; fushshiteno dihuntanno.

¹¹ Oosonsa saadate gede qolte agurteenna, kukkubbitanni godo'litanno.

¹² Dibbenna gingilaate gantanni sirbitanno; suusulle ufuuffanni godo'litanno.

¹³ Dironsano qawaaxxotenni guddanno; dhiwante keeshshitukkinni reyite madaarantanno.

¹⁴ «Bushuullu Wo'manka Dandaanno Magano, ‹Atere mittoreno afate hasi'neemmokki daafira, ninkewiinni ho'li!› yitanno.

¹⁵ Maganoho soqqama leddannori nookkita, iso magansi'rano kaa'litannokkita labbannonsa.

¹⁶ Tenne baalanta jiro, angansanni loosidhe afidhinohalla lawannonsa. Ani kayinni, konne busha coye dimacciishsheemmo.

¹⁷ «Cubbaataammu caabbichi xoe egenninoni? Insa giddonni qarra afe egenninohu nooni? Maganu bushuulle hanqunni gane egenninoni?

¹⁸ Bubbe galawu gede, hombobolatte kuru gede, haadhe hunte egentinonsani?

¹⁹ Ki'ne, ‹Maganu annuwate cubbira yee, ooso qorichishanno› yitinanni. Hatto ikkikkinni affa geeshsha, cubbaataamma umonsa qorichishanno.

²⁰ Baonsa insa illensanni affo! Wo'manka Dandaanno Maganiha hanqisi finiincho cingiishshidho!

²¹ Insa reyituhu gedensaanni, oosonsa daafira diyaaddanno.

²² «Maganu jajjabba nafa qorichishannowe! Isira hayyo rosiisannosihu nooni?

^23-24 Mitu mitu manni qawaaxxi're keerunni hee're reyanno. Qawaaxxi'rino daafira, maqayisi nafa shaalikkinni, jawaantetenni hee're reyanno.

²⁵ Wolootu kayinni, qarruwiinni baxxitukkinni, heeshshote coommille affukkinni, caaccaabbino gedeenni heedhe reyitanno.

²⁶ Baalunku reyite madaarantanno; da'muulla uddanimma dhiphitanno.

²⁷ «Kuneeti, hedo'nenna, ane gawajjate maltinoonni mala afoommo.

²⁸ Ki'ne, ‹Hakkunni jawu manchi mini mama no? Hakku bushu manchi galannohu hiikkooti?› yitinoonni.

²⁹ Doogaasine dixa'mitinoonni? Kultino'nere diammantinoonni?

³⁰ Bushu manchi mariwa baala qoomamunni gatanno; Maganu hanqe qorichishanno barrano sa"anno.

³¹ Busha mancho, ‹Tenne doogo mayira ha'ratto› yaannosihu nooni? Loosino bunshera qorichishannosihu nooni?

^32-33 Hakkunni gedensaanni reenna, lowo manni dukkiseenna waammanniwa dunkannisi; madaarrihu gedensaanni moogosi seesiinseenna, bushshu fiixa ikkannosi.

³⁴ «Hatto ikkina, haafu coyinni sheshifachishshinaera, mayira wo'naaltinanniyya? Yitinoonniri baalu kaphohona agurre» yii.