IYYOOBI 20 - Qullaawa Maxaafa

SOOFAARIHA LAYINKI HASAAWA

¹ Neimaatichu Soofaari qole,

² «Aarsoottoe daafira, atera tumo qolate muddamoommo.

³ Xontanni boroorittoe gara macciishshoommo; anino tenne buuxoommo daafira, tumo qolammohera qixxaawoommo.

⁴ «Mannu baattote aana hee'rinkunni, bi're hundunni kayise,

⁵ bushuullu hisanyooti harancho ikkinota, maganiweelu manni hagiirrino harancho ikkinota diafootto?

⁶ Bushu manchi boo'na gordo iilliturono, umisi gomicho kisirono,

⁷ ishinu gede bushshu ledo karsamanno; egentinosirino, ‹Isi hiikka higi?› yitanno.

⁸ Haaqeete gede ikke gatanno; hashshi jawaawurri gede ikke hawamanno.

⁹ Egenninosi manni layinkimeeshsho diafannosi; kunni ka'a hee'ranno basera dianfannisi.

¹⁰ Oososi, isi buxanetewiinni wolqatenni adhino jajja, qolte baattanno.

¹¹ Fayyonna jawaata mannimmasi reyitanno; boode yanna gedensaanni bushsha ikkite gattanno.

¹² «Bunshe afooho coommiteennasi, ga'roho amadirono,

¹³ coommitinosi daafira, egemmikkinni afooho keeshshiishirono,

¹⁴ itinori godowisira bu'lukki yee, shiishunna hadhote gede ikkannosi.

¹⁵ Itino jajja baala qolanno; Maganuno godowisira noore tushshiishannosi.

¹⁶ Bushu manchira itannori baalu harfa ikkannosi; hamashshu harfi gede ikke shaannosi.

¹⁷ Wayimma lolahannoha malawonna ado illetenni afate, seeda diro lubbotenni dihee'ranno.

^18-19 Buxane gadadise qarrisino daafiranna, insa shorre hune minensa umisira adhino daafira, adhinorinni hagiidhikkinni, Maganu galagalche tushshiishannosi.

²⁰ «Hafuuraamu baalankare yoranno; ikkinoeno diyaanno.

²¹ Ite duuwannokkiha ikkino daafira, jirosi lowo yanna dikeeshshitanno.

²² Lowo jiro heedheennasinni, qarru hedeweelcho daannosi; mitiimmanna yaaddono amaddannosi.

²³ Maganu hanqisinni duushshasi geeshsha, hasi'rire baala itona.

²⁴ Bagaduwiinni xooqe fulirono, camote maxxi qasannosi.

²⁵ Maxxuno xoroorrise ka'aanni fulannosi; bilicci yaannohu qarisi mundeesi dunanno; waajjillu doyisse amadannosi.

²⁶ Duu'nino jiro baala angasinni adhantanno; mannu qansokki giira isonna minesi ittanno.

²⁷ Gordu cubbosi xawise kulannosi; baattono bunshesi kiirtanno.

²⁸ Maganu hanqi daye, jirosi baala lolahu gede adhe haa'ranno.

²⁹ Sao assanno manchira Maganu uyino kaayyonna, iqqinosi iqqi hakkonneeti» yii.