IYYOOBI 15 - Qullaawa Maxaafa

ELFAAZIHA LAYINKI HASAAWA

¹ Temaanichu Elfaazi qole,

² «Halaalinta egennaamu manchi, ikkannokkire coyi'rannoni? Wodanisirano haafare wonshi'rannoni?

³ Ba'raasinokki hasaawinni, woy tidhinokki coyinni moromamannoni?

⁴ Ati, Magano waajjinannita dinaadatto; wolootano Magano magansidhannokki gede assatto.

⁵ Cubbaataamo ikkoottota coyikki leellishanno; busullekkinni so'rokki maaxi'rate wo'naalatto.

⁶ Amadannohehu coyi'rootto coyeti ikkinnina, ane di"ikkoommo; arrawikkinni coyi'rootto coyi naqaashshete.

⁷ «Manna balaxxe ilamoottohu ateetini? Woy ilaalla kalaqantara albaanni noottoni?

⁸ Maganunna sokkaasinesi ledo malaho ofolloottoni? Egenno afi'roottohu ate callaatini?

⁹ Ninke anfoommokkire ati maa afitto? Ninke buunxoommokkire ati maa egennitto?

¹⁰ Ninke annikkira nafa bayirtannorinna, awuubbino geerriwiinni egenno afi'noommo.

¹¹ «Maganu uyinohe sheshonna, ninke kulloommohehu shaqqadu qaalisi ajinoheni?

¹² Wodanakki mayira kaajjishatto? Ninkeno hanqu illenni mayira geeqattonke?

¹³ Maganoho hanqatto gedenna, togoo coye coyi'ratto gede assinoheri maati?

¹⁴ «Mannu fayyaaleessa ikkara dandaannoni? Halaalinta Maganu albaanni keeraanchu nooni?

¹⁵ Kuneeti, Maganu qullaawoota sokkaasinesi nafa diamma'nanno; isi albaanni gordu kalaqami nafa keeraancho di"ikkino.

¹⁶ Saonkanni, cubbo wayimma aganno manni, mageeshshi geeshsha bushahoro hedi.

¹⁷ «Hanni Iyyoobi, ani egennoommore kuleemmohena macciishshi:

¹⁸ Egennaammu manni annuwansawiinni affino halaale, maaxxukkinni anera gudisse kultinoe.

¹⁹ Wodanansa Maganuwiinni fafissannori manni gobba manni, Maganu uyinonsa gobbara insa ledo diheedhino.

²⁰ «Bushu manchi manna xiiwanno daafira, dirisi baalunkunni qarru isiwiinni difafanno.

²¹ Masisanno luulo macciishshanno; ‹Keere noommo› yaanni hee'reennanni, baarigaaru bala tugannosi.

²² Shaannohu agare noosi daafira, tunsichunni fule, gate higate hexxo diafi'rino.

²³ Maalasi allaatte ittanno; isino tunsichu barri daannosita afino.

²⁴ Qarrunna shetto, qasara qixxaawino moote gede waajjishshannosi.

²⁵ Kuni ikkannohu, Maganu aana ka"annonna, Wo'manka Dandaanno Magano seyatanno daafiraati.

²⁶ Du'ma wonqosi wonqi're, ille ximbii'le Magano qasara dodanno.

²⁷ Illesi misu beeshshino; godowisira coomu ga'rino.

²⁸ Hattoo manchi diigantino katammara, mannu nookkiteranna ubbara rakkino minnara hee'ranno.

²⁹ Duroo'mino gedeenni dihee'ranno; jirosino ledosi dikeeshshitanno; baattote aana hincilaallosi nafa diheedhanno.

³⁰ Tunsichunni fule gata didandaanno; sinnasi giira ittino haqqi gedeete; daraarosi diilallo giggishshitino haqqi gedeete.

³¹ Qolle uyinannisiri nookki daafira, umosi so'risiisanni kaphu coye amma'na dihasiissannosi.

³² Yanna iillitukkinni qoore daro giggile, layinkimeeshsho ciirannokki haqqi gede ikkanno.

³³ Iillitukkinni giggiltanno hunduruurro gedenna, giggiltanno daro ejersunnite gedeeha ikkanno.

³⁴ «Maganiweelu manni sirchi disa"anno. gubbo adhite mi'nitino minna giira ittanno.

³⁵ Qarra godobbanno; bunshe iltanno; giddonsano xagarro wo'mitino» yii.