IYYOOBI 12 - Qullaawa Maxaafa

IYYOOBIHA SAYIKKI HASAAWA

¹ Iyyoobino daware,

² «Halaalinta ki'ne mannaho umiidireeti; ki'ne reyitinanni waro, egenno ledo'ne reyitanno.

³ Ikkollana, anerano ki'nente gede wodancha nooe; ki'newiinni diajeemmo. Mannu wo'munku konne coye afino.

⁴ Kaaliiqa woshshi'reenna dawarinoeha ikkirono, darawo'yara haariimo ikkoommo; keeraanchonna minshe nookkiha ikke hee'renni, oso'linanniha ikkoommo.

⁵ Ki'ne mittu qarri nafa iillanno'nekki daafira, ane haariintinanni; uwara rahino mancho tugginanni.

⁶ Mooraanonna Magano affinokkiri, minensa keere heedhanno, qolteno, ‹Maganu anganke no› yitanno.

⁷ «Hanni saada xa'mi; rosiissannohena, kultannohena, buubbanno ceano xa'mi.

⁸ Woy baattote aana noo haqqera coyi'ri; insano rosiissannohe; baaru qulxu'meno xa'mi; insano kultannohe.

⁹ Konne assitinoti Kaaliiqi anga ikkitinota, kuri baalunku giddonni afinokkihu dino.

¹⁰ Kalaqamu baalu lubbo, mannu baalu heeshsho isi anga no.

¹¹ Arrawu sagale qamasannonte gede, macca coyi'nanni coye badde affanno.

¹² Egenno geerruwiinni afi'nanni; wodanchano seeda diro hee'ratenni dagganno.

¹³ Maganunniwa egennonna wolqa no; amaalenna wodancha isiwa no.

¹⁴ Maganu diiganno; isi diiginoha qole gatamarannohu dino. Isi usuranno; isi usurinohano tire fushshannohu dino.

¹⁵ Maganu xeena hoo'liro, baattote aana moolle dagganno. Xeena batise ganirono, baattote aana noore baala hunanno.

¹⁶ Wolqanna egenno isiwa no; dogamannohanna dogannoha gashshannohuno isooti.

¹⁷ Isi gashshaanote egenno hunanno; sooreeyyeno gowwoota assanno.

¹⁸ Mootennita mootimmate uddano mulqe, borojju uddano uddisiisanno.

¹⁹ Qeesootunniha qeesimmate ayirrinye hoolanno; gashshitannoritano gashshootu wolqano hunanno.

²⁰ Hexxinoonni manna coyi'rannokki gede assanno; geerrunnita hayyonsa haa're hoolanno.

²¹ Ayirradda gashshaanora shollinye soyanno; jawaatu manni qodhono tiranno.

²² Maaxamino coye tunsichunni haa're xawo fushshanno; beebba tunsicho xawaabba assanno.

²³ Gosa jawaatanna wolqaataame assanno; qoleno shollishannonsa; qeelantanno gedeno assannonsa.

²⁴ Gobbate gashshaano mereerinni, wodancha haa're hoolanno; doogo ba'eenna raataabbannori gede assannonsa.

²⁵ Xawaabbu nookkiha tunsichu giddo babbaattitanno; dimbinohu gede ikkite gaggabbanno.