IYYOOBI 10 - Qullaawa Maxaafa

¹ «Heeshsho giwissinoena, hasi'rummo gede coyi'reemmo; heeshsho'ya qaraartino gara leellisheemmo.

² Magano, bushiishshootiena, abbooshshi'roottoeri maatiro kulie.

³ Ane angakkinni kalaqoottoeha mishakkinna, cubbaataammu assitannore baxakki garahoni?

⁴ Halaalinta ate ille mannunnite gedeeteni? Woy atino mannu la"anno gede la"atto?

^5-6 Bunshe'ya hasattoranna, cubbo'ya xunsite la"attora, ate diri mannunnihu gedeehoni? Woy barrikki mannunnihu gede haranchohoni?

⁷ Sao assoommokkitanna, angakkinnino gatisannoehu nookkita afootto.

⁸ «Konne manninate'ya angakki seekkite kalaqqinoe; xa kayinni galagalte hunattoera hasi'rootto!

⁹ Bushshunni assite seekkittoeta diqaagatto? Mayiraatiyya galagalchite bushshu giddora qolattoehu?

¹⁰ Godowame ama'ya godowi giddo, lopheemmo gede diassoottoe?

¹¹ Miqicho'yanna diimmicho'ya kaajjishshe, maalanna goga uddisiisoottoe.

¹² Heeshshonna bagamannokkiha baxillekki oottoe; heeshsho'yano seekkite agarootto.

¹³ «Konne coye wodanikki giddo amadootto; kuni baalu hedokkira noota afoommo.

¹⁴ Cubbo loosummorono ati la'anni nootto; kunnira, cubbo'ya dimaaratto.

¹⁵ Sao assoommoha ikkiro anera bayisibao! Shollinyunni jaanjuroommohuranna, qarra agoommo daafira, keeraancho ikkummoro nafa, haxo'ya gotti diyitanno.

¹⁶ Umo'ya gotti gotti assummoro, doobbiichu gede ugaaxattoe; galagalte ane gawajjate maalale assatto.

¹⁷ Wo'manka woyite anera haaro naqaashshe kiidhatto; hanqikki ane aana lexxanni ha'ranno. Wo'manka woyite qassannoeta, haaro olanto soyattoe.

¹⁸ «Ilamammora mayira worte laittoe? Ayino afiekkinni reyommoro woyyannoehu baino!

¹⁹ Horonta hee'ra hoogoommoronna, ama'ya godowinni fulanni hee'renni, waamma eoommoro woyyannoehu baino.

²⁰ Hattenne gattinoe yanna giddo, fooliishshi'reemmona agurie.

²¹ Higeemmokkiwa, dhi'mote tunsicho ha'ranni noommo.

²² Mareemmowino tunsichoho; heeshshono ragimalete; hattono xawaabbu umisi tunsicho ikkino dargaati» yii.