IYYAASU 9 - Qullaawa Maxaafa

GEBAOONI MANNI IYYAASU DOGI

¹ Aliyyenni Libaanoosi geeshsha Mediteraaniyu Baari qaccenna Yordaanoosira galchimaanni alichohono gammoojjeteno noo mootoolla baalanti Israeele qeeltinota macciishshitu. Insano Hitootu, Amooraawootu, Kana"aanootu, Ferizootu, Hiwootunna Iyaabuusootu mootoollaati.

² Kuri baalunku wolqansa mitteenni xaadisidhe Iyyaasunna Israeele qassara daggu.

³ Hiwootu garo ikkitinori Gebaooni manni kayinni, Iyyaasu Iyyaarkotanna Gayi katamma assinota baala macciishshitinohura,

⁴ iso doggara ma'litu. Insano sinqensa qixxeessidhe, akkala ogoronna xullo qaaffinsoonniha woyinete xajje ogoro harrete hogophite hadhu.

⁵ Daddadhante gooffinota akkala uddanna uddidhe, qaaffinsoonnita gooffino koatte wodhitino; sinqisidhino buddeenino moolahonna bulaasinoho.

⁶ Konne baala assituhu gedensaanni, Galgalaho noo qacha marte Iyyaasunna Israeeloota, «Ninke dangoommohu xeerto gobbanniiti. Dangoommohuno ki'ne ledo namoomme hee'rate gondooro e'nammoraati» yitunsa.

⁷ Israeelete manni kayinni, «Miteekkitine ki'ne mulinni dagginoonnire ikkitinara dandiitinanni. Kunnira, ki'ne ledo hiitto ikkine gondooro e'neemmo?» yitunsa.

⁸ Gebaooni manni Iyyaasura, «Ninke soqqamaanokkiiti» yitusi. Iyyaasu qole, «Ki'ne ayeooti? Hiikkiinni dagginoonnireeti?» yee xa'minsa.

⁹ Insano, «Mooticha! Ninke dangoommohu lowo geeshsha xeerto gobbanniiti. Magani'ne Kaaliiqi ki'ne kaa'latenni Gibitsete aana assinore baala macciishshinoommo.

¹⁰ Qoleno, Yordaanoosira widoonni soojjaati ragaanni noore 2 Amooraawootu mootoolla assinota baala macciishshinoommo. Insano, Astaarooti katamira hee'rannohu Baasaani moote Aagitinna Hasebooni moote Sewooniiti.

¹¹ Albisootinkenna baattonkera hee'ranno manni baalunku doogora ikkanno sinqe qixxeessi'ne dange ki'ne ledo xaandeemmo gede sokkinonke. Ki'nera soqqammeemmo'ne; ki'neno ninke ledo namoomu gondooro e'inanni gede xa'minammora sokkinonke.

¹² Sinqenke kune la'e! Mininni ka'ne ki'ne ledo xaadate fullummo woyite, iibbado sagaleeti; xa kayinni, mooltino garanna bulaassino gara la'e!

¹³ Tini ogorranke woyine wodhinummo yannara haaruuddete; xa kayinni kune dhodhookkino gara la'e! Doogonke xeertinyinni kainohunni uddannankeno koatenkeno gooffino» yitu.

¹⁴ Israeelete mannino doogaasinu sinqi aaninni shiima haa're, assitino coyi baalaho kayinni Kaaliiqi dixa'mino.

¹⁵ Iyyaasu Gebaooni manni ledo jaaloomu gondooro e"e, namoonte heedhanno gede assinsa. Israeelete manni albisootino, shinanninsakki gede xaarte gondooro e'unsa.

¹⁶ Gondooro e'uhunni sayikki barra kuni manni mulinni dayinoha ikkinota Israeelootu affu.

¹⁷ Kunnira, Israeelete manni konne manna faana gane 3 barri gedensaanni katammansa iilli. Katammansano Gebaooni, Kefiira, Be"erootinna Qiriyaati-Yiariimi yinannireeti.

¹⁸ Albisootinsa Israeelete Magani Kaaliiqi su'minni xaartinonsahura, Israeelootu kayinni, insa shaa didandiitino. Kunni daafira, Israeelete manni baalunku albisootinsara gungumi.

¹⁹ Albisootinsa kayinni, «Halaaleho Israeelete Magani Kaaliiqi su'minni xaarroommonsa; kunnira xa insa gawajjinammora didandiineemmo.

²⁰ Xaarroommonsa xaaro diingeemmokki gede lubbotenni heedhara agurreemmonsa; togo assa hoongummoro kayinni, Maganu umisi qorichishannonke.

²¹ Giddonke heedhona; kayinnilla haqqe hiiqqitanni, waa dirritanni soqqantonke» yite dawartunsa. Albisootu shiqishshino hedo tenneeti.

²² Iyyaasuno, Gebaooni manna isiwa shiqanno gede asse, «Konne mule heedhinannire ikkitine heedhinenni, ‹Lowo geeshsha xeerto gobbanni dangoommoreeti› yitine mayira doggininke?

²³ Konne coye assa'nenni rumantinoonnireeti. Kunnira, manni'ne haqqe hiiqqanninna waa dirranni Magani'ya minira hegere geeshsha borojje ikke hee'ranno» yiinsa.

²⁴ Insano, «Mooticha! Magani'ne Kaaliiqi ki'ne alba higgine qaaffini deerrinni, hakkiicho hee'ranno manna shaatenni baatto ragisiisa'nera soqqamaanchosi Muse hajajino gede anfoommo. Togo assinoommohuno, ki'ne waajjatenni kainohunni lubbonke gatisi'rate yineeti.

²⁵ Kuneeti xa ninke angakki hee'noommo; hasi'rittota assinke» yite dawartusi.

²⁶ Kunnira, Iyyaasu Israeelete manni giddonni insa mittuno shaannokki gedenna agarreenna heedhanno gede assinsa.

²⁷ Kayinnilla hatte yannara, haqqe hiiqqatenninna waa dirratenni Israeelete manniranna Maganu kakkalo dargira soqqamaano ikkitanno gede assinsa. Insa xaa geeshsha Kaaliiqi magansi'nasira doodhino darga, kunni garinni soqqantanni heedhanno.