IYYAASU 8 - Qullaawa Maxaafa

GAYI KATAMI DIIGAMA

¹ Hakkunni gedensaanni, Kaaliiqi Iyyaasura, «Olaho gaaddokki baalanta haadhe Gayi katama gaadoho fuli; horonta be'e yitooti! Waajjitooti! Ani Gayi moote qeelatto gede asseemmohe. Mannu, katamunna baatto ateta ikkitanno.

² Kunni albaanni Iyyaarkotenna mootesira iillitino bao Gayinna mootesira iillishatto. Ikkollana, xa giddosi nooha jajjanna saada umi'neta assidhinanni. Katamaho badheenni gaa'lite agartanno bagadaanono wori» yiisi.

³ Kunnira, Iyyaasu gaaddosi ledo Gayi katama gaadara qixxaawi. Olantote giddonni jawaante roortinore 30,000 gaaddo doore, hashsha soyi.

⁴ Soyi yannara, «Katamaho badheenni higgine gaa'litine agarre; ikkollana, katamunni lowota faffinikkinni bala tugate dandaamanno'ne garinni qixxaabbe.

⁵ Aninna ledo'ya gaamantinori, olaho fultinanni woyite katamunniwa shiqqi yineemmo. Gayi gaaddo ninke aana bala tuggara dagganno yannara, kunni albaanni ikkinummo gede, badhera hinge xoonqeemmo.

⁶ Kunni albaanni assinummonte gede, katamunni insa fafinsammo geeshsha, donge xoonqeemmo.

⁷ Magani'ne Kaaliiqi katama ki'nera sayise aanno'nena, hatte yannara maaxantinoonni darginni fultine katama amadde.

⁸ Katama amaddinihu gedensaanni, Maganu hajajino garinni, co'o yee giirame ba"anno gede asse. Kuneeti hajajoommo'nena yoommo gede asse» yiinsa.

⁹ Hakkunni gedensaanni, Iyyaasu gaaddo fushshe soyi. Insano, Gayira galchimi ragaanni Gayinna Beeteli mereero gaa'lite agartu. Iyyaasu kayinni, gattinori ledo hakko qachaho gali.

¹⁰ Layinki soodo guto Iyyaasu balaxe kae, gaaddo mittowa woshshe gamba assi. Isinna Israeelete albisooti baalunku olanto albissanni alba Gayi higge hadhu.

¹¹ Isi ledo noo olanto balaxxe albira hadhe, katama e'nanniha lowo waalcho iillitu. Aliyye ragaanni isinna Gayi mereero noo lagichira widoonni marte galtu.

¹² Iyyaasu 5,000 manna doore, katamaho galchimi ragaanni Gayinna Beeteli mereero gaa'le agaranno gede assi.

¹³ Gaaddono katamaho aliyyeenninna galchimaanni galtino olanto ledo kaa'lante olantara baalankare qixxeessitu. Iyyaasu hakko hashsha mare lagichaho gali.

¹⁴ Gayi moote Iyyaasunna olantosi afi yannara, rahe olaho qixxaawi. Isinna olantosi baalanti badheenni gaa'lite heelala ikkite agartino olamaano tugganno bala affukkinni, kunni albaanni assitu gede alba olantu darga Israeeloota qassara Yordaanoosi lagicha furduggi yitu.

¹⁵ Iyyaasunna olantosi xooqqannoha labbe duumballitte hadhu; wittii'litanni mitto mullicho xawo marte iillitu.

¹⁶ Katamu manni baalu, mimmito lasse mitteenni fule shorrinsa. Insa shorritanni katamuwiinni faffe hadhu.

¹⁷ Gayinna Beetelira hee'ranno manni baalunku fule Israeeloota shorranna katamu mittuno gargarannohu nookkiha fano ikke gati.

¹⁸ Hakkunni gedensaanni, Kaaliiqi Iyyaasura, «Ani Gayi katama atera sayise eemmohena, angakki noo urde isi widira qo'li» yiisi. Iyyaasuno hajajinosi gede assi.

¹⁹ Urdesi alba qo'lara anga kayisita, maaxante agarte noo olanto hakkawoyintenni ka'e, katama ca'u yite e'e, angara qo'litu; hakkawoyintenni katama giirtu.

²⁰ Gayi katami manni badhera caaqqi yee la"anno woyite, katamu wiliile tunnuuqqanni no. Xawo higge hadhino Israeelooti galagalte higge dano tuggara doyissite agarte noonsa daafira, xooqqe fultanno doogo diafidhino.

²¹ Iyyaasunna ledosi noo olanto balaxxe qixxeessite wortino gaaddono katama angansara qo'lite giira qassinota affu yannara, badhera kamballi yite Gayi kataminni daggino olamaano shaa hanaffu.

²² Katama e'e noori Israeelootu insawa dirrite olaho karsantu. Kunnira, Gayi manni Israeelootu doyissite noonsatanna goofote aana noota huwattu; xooqe fulara dandiinohu mittu nafa dino.

²³ Gayi moote agurranna reyikkinni gatinohu mittuno dino; isino qafadame Iyyaasuwa shiqi.

²⁴ Israeelootu mullichu xawira, kunni albaanni Gayi gaaddo insa shorritu darga baalankawa shitu; galagalte Gayi katama e'e hakkiicho gattinoreno guddu.

^25-26 Iyyaasuno, diinu garo shine gunda geeshsha Gayi katamira alba qo'lino urde heeshshi diassino. Hakko barra shinoonnihu Gayi katamira hee'ranno manni meentuno labballuno mitteenni 12,000 mannaati.

²⁷ Kaaliiqino Iyyaasura kulinosi garinni, Israeelootu hakkiichinni adhitino saadanna wole jajja uminsaha assidhu.

²⁸ Iyyaasu Gayi katama giire mulla darga asse aguri; xaa geeshshano hakko garinni no.

²⁹ Gayi katami moote dawete aana sute reeshshasi hawarra geeshsha rarrae keeshshanno gede assi. Arrishsho e'anno yannara, reeshsha dawete aaninni dirrinse katama e'nanni xullichira tunganni gede assi. Aanasino lowo kinna duunni; hatti kinnate duuno, xaa geeshsha hakkiicho no.

MUSE BORREESSINO SEERA EEBAALI ILAALI AANA NABBAMBI

³⁰ Hakkunni gedensaanni, Iyyaasu Eebaali Ilaali aana Israeelete Magani Kaaliiqira kakkalote darga seekki.

³¹ Konne seekkinohuno, Kaaliiqi soqqamaanchi Muse Israeelootaho uyino Seerira, «Kinchunni kakkalote darga seekkatto yannara, siwiilu uduunnichinni boncoonniha ikkoonke» yine hajanjoonni garinniiti. Konne darga, shilqonnitanna mittimmate kakkalo Kaaliiqira shiqishshe.

³² Israeelootu la'anna Iyyaasu, Muse borreessino Seera kinnate aana borreessi.

³³ Kuni ikkanno yannara, Israeelootu albisootinsa, olu hajajaanonsanna daanyootinsa ledo, hattono giddonsa heedhannori manni gobba manni, Leewi sircho ikkitino qeesooti dukkinohu Gondooru Taabooti albaanni, guraanninna qiniiteenni uurrite no. Insa giddonni daratu Geriizaani Ilaalira, daratu Eebaali Ilaalira uurritu. Manna maassidhanno woyite hatto assitanno gede Kaaliiqi soqqamaanchi Muse hajajinonsa.

³⁴ Hakkunni gedensaanni, Iyyaasu qoonqosi naggi asse, Seeru Maxaafira borreessamino garinni, maassono rumono gattukkunni Seera baalanka nabbawi.

³⁵ Meentu, qaaqquullunna giddonsa heedhannori manni gobba manni noowa Israeelete songora Iyyaasu Muse hajajino qaali mittuno gatikkinni nabbawi.