IYYAASU 6 - Qullaawa Maxaafa

IYYAARKO UWA

¹ Israeeloota waajjatenni kainohunni, Iyyaarkonniti huxxu waalchuwa cunfeenna agaraasine agarte no. Katama eano ikko, fula dandiinohu mittuno dino.

² Kaaliiqi Iyyaasura, «Iyyaarko mootesinna bareedda gaaddosi ledo angakkira sayise eemmohe.

³ Atinna gaaddokki 6 barri geeshsha barrunni mitte mitte higgine katamu huxxa dirantine gaangaabbinanni.

⁴ Xurumba amaddinori 7 qeesooti Gondooru Taabootira albaanni balaxxe hadhona. Lamalki barra, qeesootu buudunni seekkinoonni xurumba ufuuffanna, atinna gaaddokki katama barrunni 7 higgine gaangaabbe.

⁵ Hakkunni gedensaanni, qeesootu buudu xurumbinni naggi yiino luulo macciishshinanni gede assitona. Konne macciishshitinanni heedhineenna, hakkawoyintenni mannu baalunku naggi yitino qoonqonni roqonsona. Hakkunni gedensaanni, katamu huxxino diigamanno; hoodete wo'manti olanto ca'u yite katamu giddora e'ona» yii.

⁶ Iyyaasu qeesoota woshshe, «Gondooru Taaboota dukke; ki'ne giddonni 7 xurumba amaddine Taabootaho albaanni higgine hadhe» yiinsa.

⁷ Kaaliiqihu Gondooru Taabooti albaanni umo ikkite bagado qodhitino olanto albissanna, katama dirante gaangaabbanno gede Iyyaasu hajajinsa.

^8-9 Iyyaasu uyino hajajo garinni, xurumba ufuuffanno qeesooti albaanni umo ikkite qodhitino olanto tayishshi sai. Insa gedensaanni, Gondooru Taaboota dukkino qeesooti badhiidi heelalinni agarante hadhu. Tenne yanna baalante giddo, xurumbuwate luuli macciishshamanni no.

¹⁰ Iyyaasu malaate aa geeshsha, olanto qeexaa'litannokki gedenna mitto qaaleno coyidhannokki gede hajajinsa.

¹¹ Kunni garinni, Gondooru Taabootino katama mitte hige gaangawanno gede assi. Hakkunni gedensaanni, galagalte higge qachaho galtu.

^12-13 Layinki soodono Iyyaasu gute kae, sai barra assininte gede, bagado qodhitino olanto tayishshi hoode 7 qeesooti xurumba ufuuffanna, qeesootunna gaaddo katama layinkimeeshsho gaangaabbu. Hakkunni gedensaanni, Gondooru Taaboota dukkino qeesootinna badhiidi heelali tayishshi sai. Hatte yanna baalante giddo, xurumbuwate luuli macciishshamanni no.

¹⁴ Layinki barra, katama mitte higge gaangaabbe qacha higgu; leyu barri geeshsha kunni garinni keeshshitu.

¹⁵ Lamalki barra duu'mo saaqquta, gutte ka'e hakko garinni katama 7 higge gaangaabbu. Katama 7 higge gaangaabbinohu konne barra callaho.

¹⁶ Lamalki marrora, qeesootu xurumba ufuuffara qixxaabbanno yannara, mannu qoonqonsa naggi asse qeexaa'lanno gede Iyyaasu, «Kaaliiqi katama sayise uyino'ne.

¹⁷ Katamunna giddosi noori baalu Kaaliiqira shiqinshanni kakkalo gede ikke goofa hasiissanno. Dooyyaanonke maaxxe gatissinohura, gunnitte Reaabinna minese noori callu gatona.

¹⁸ Ki'ne kayinni, ba"a hasiissannohu giddonni mittoreno adhitinoonte. Hatto assitiniro, Israeelete qachira qarranna bao abbitinanni.

¹⁹ Birrunni, culkunni, camotenni woy siwiilunni seekkinoonniri baalu, Kaaliiqira qullaawa ikko. Kurino Kaaliiqi uduunni hee'ranno mine hee'rona» yee hajaji.

²⁰ Kunnira, qeesootu xurumbuwa ufuuffu. Olantono hakkonne luulo macciishshitu yannara, lowo qoonqonni roqonsitanna, katamu huxxi diigami. Hakkunni gedensaanni, olanto noo darginni mitteenni ale higge marte katama e'e amaddu.

²¹ Bisensa fushshite katamu giddo nooha labbaahanna meyata, wedellanna geerra baala shitu. Lalo, ge'reewonna harre baala guddu.

²² Iyyaasu dooyyaano ikkite soqqanture 2 manna, «Gunnitte Reaabi minira martine, xaartinoonnise xaaro garinni isenna minise manna haadhine fushshe» yiinsa.

²³ Insano marte Reaabi, annasenna amase roduuwasenna wolootu fiixise baalunku ledo fushshite gobbaanni Israeelootu qachira wortunsa.

²⁴ Hakkunni gedensaanni, katama co'o assite giirte guddu. Massite Kaaliiqi uduunni hee'ranno mine wortinoha culkunni, birrunni, camotenninna siwiilunni seekkinoonni uduunne agurranna, katamaho noori baalunku goofi.

²⁵ Kayinnilla, Iyyaasu Iyyaarko soyinore lamenka dooyyaano maaxxe reyotenni gatissinohura, gunnitte Reaabi, ayiddesenna ledose noo manna baala reyotenni gatisi. Ise sirchi techo geeshsha Israeelete gobbara hee'ranno.

²⁶ Hatte yannara Iyyaasu, «Iyyaarkote katama galagalche minannohu hee'riro, Kaaliiqi rumo isi aana ikkitanno. Iso minate gaata darannohu, bayira beettosi hooganno. Waalchuwasi seekkannohuno, maa'nu beettisira reyo abbi'ranno» yee qorophisiisi.

²⁷ Kunni garinni, Kaaliiqi ledosi noo daafira, Iyyaasu gobba baalate egennaminoha ikki.