IYYAASU 5 - Qullaawa Maxaafa

¹ Yordaanoosi Wayira Galchimaanni noori Amooraawootu mootoollanna Mediteraaniyu Baari laayyora heedhannori Kana"aanootu mootoolla baalanti Israeelete manni fula geeshsha Kaaliiqi Yordaanoosi Waa mooshshinonsata macciishshitu. Israeeloota waajjitino daafira masseenna goonte ba'unsa.

MANNU GALGALAHO BARCIMI

² Hakkunni gedensaanni Kaaliiqi Iyyaasu, «Reeqqiichotenni seekkinoonni magalaale qixxeessite Israeeloota barcimshiishinsa» yii.

³ Iyyaasuno Kaaliiqi hajajinosinte gede, Barcimshiishate Roggeeti yinanniwa Israeeloota barcimshiishi.

^4-6 Israeelete manni Gibitsetenni fuli yannara, labballu baalunku barcimino. Ikkollana, halallitte gobbara hadhuhu 40 diri giddo ilantino labballi giddonni mittu nafa dibarcimino. Hatte yannara, Gibitsetenni fultu woyite olaho iillitino labballi baalunku, Kaaliiqira hajajama hoogginohura gooffino. Kuni ikkinohuno, Kaaliiqi akaakkansara aara xaarinota malawunna ado lolakkannota danchanna shaqqado baatto illensanni la'annokki gede xaarinohuraati.

⁷ Hadhanna doogo ilantinoti labballi ooso baalanti dibarcimtino. Kunnira, Iyyaasu barcimshiishinoti Kaaliiqi annuwansa darga kayisino ilamaati.

⁸ Barcimshiisha gudihu gedensaanni, barcimtinorira mada hurta geeshsha hakko keeshshitu.

⁹ Kaaliiqi Iyyaasura, «Kuneeti techo, Gibitsete borojje ikkitine heedhinoonniha saala'ne hooloommo'ne» yiisi. Kunnira, hakko dargi su'ma, Galgala yini. Konne darga xaa geeshsha kunni su'minni woshshinanni.

¹⁰ Israeelootu Iyyaarko mule noo xawira Galgalaho ofolte heedheenna, aganunni tonaa shoolki barra hawarro Mararrote Ayyaana ayirrissu.

¹¹ Kana"aani laalino gide ita hanaffinohuno layinki barraati; ittinohuno du'rinshoonni shoyetinna shiishinokki timaati.

¹² Baattote aaninni afi'nanni sagale ita hanaffu barrinni kayise, Kaaliiqi menna dirrisa aguri. Israeelootuno hakkunni gedensaanni hakkonne menna afi'ra didandiitino; hatte yannanni kayisse Kana"aani gobbara laalino gide ita hanaffu.

IYYAASUNNA BISE AMADINO WEDELLICHO

¹³ Iyyaasu Iyyaarko mule hee'reenna, bise amadinohu mittu wedellichi hedeweelcho albasiinni uurre nooha afi. Iyyaasuno isiwa shiqqi yee, «Ati ninke manchootinso diinnanke garooti?» yee xa'mi.

¹⁴ Wedellichuno, «Ayehano di"ikkoommo; ikkollana, Kaaliiqi olanto hajajaancho ikkoommohura, kuneeti dayommo» yii. Iyyaasuno, baattote aana gombisame, «Mooticha'ya ballo! Ani soqqamaanchokkiitina ma"asso?» yii.

¹⁵ Kaaliiqi olanto hajajaanchi, «Uurrootto baatto qullaawatena, lekkakkinni koattekki fushshi» yiisi. Iyyaasuno, hajajinosi gede assi.