IYYAASU 24 - Qullaawa Maxaafa

IYYAASU SEKEEMI HEE'RE MANNAHO COYI'RINO COYE

¹ Iyyaasu Israeelete ga're wo'manta Sekeemi gamba assi. Geerra, albisoota, daanyootanna olu hajajaano baala woshshi. Insano Maganu albaanni gamba yitu.

² Iyyaasu mannu baalankura, «Israeelete Magani Kaaliiqi, ‹Lowo dirira albaanni Akaakka'ne Efiraaxisi Wayira widoonni wole maganna magansidhanni heedhino. Hatte annuwa giddonni mittu Abirihaaminna Naakoori anni Taaraati.

³ Hakkunni gedensaanni awura'ne Abirihaami Efiraaxisi Wayira widoonni noo gobbanni woshshe, Kana"aani baatto baalate massagoommosi; sirchosino batisoommo; Yisihaaqino oommosi.

⁴ Yisihaaqirano Yaiqoobinna Eesawu oommosi; Eesawura Edoomita gaaraame gobba iqqa asse oommosi. Kayinnilla, anni'ne Yaiqoobinna oososi darante Gibitse dirritino.

⁵ Musenna Aarooni soye Gibitsete lowo qarri iillanno gede assoommo; ki'ne kayinni massage fushshoommo'ne.

⁶ Akaakka'ne Gibitsetenni massage fushshummonsa yannara Gibitsootu, faradi gaarensanninna faradaanonsanni shorritinonsa. Akaakka'ne Duumu Baariwa shiqqi yitu yannara kayinni,

⁷ kaa'leemmonsa gede anewa higge raartino. Anino insanna Gibitsootu mereeri tunsanno gede assoommo. Baaru aanansa kamballi yaanno gede asse, Gibitsoota egemisiisoommo. Kunnira, Gibitsete aana assoommore ki'ne affinoonni. « ‹Ki'neno seeda yanna geeshsha halallitte gobbara heedhinoonni.

⁸ Hakkunni gedensaanni, Yordaanoosira soojjaatoonni Amooraawootu heedhanno baatto haa're abboommo'ne. Insa ki'ne ledo gaarantino; ani kayinni insa qeeltinanni gede assoommo'nehura, baattonsa ragidhinoonni. Alba higgine qaaffini deerrinni, insa hunummo.

⁹ Hakkunni gedensaanni, Moaabi moote Sefoori beetti Baalaaqi qasa'nera kaino. Ki'ne rumannosi gede Bioori beetti Beleaamiwa manna soqqino.

¹⁰ Ani kayinni, Beleaami yiinota dimacciishshoommo. Kunnira, ruma agure maassi'rino'ne. Kunni garinni, Baalaaqi anganni gatisoommo'ne.

¹¹ Ki'neno Yordaanoosi Waa fultine Iyyaarko dagginoonni. Iyyaarkote manni, hattono Amooraawootu, Ferizootu, Kana"aanootu, Hitootu, Gergesootu, Hiwootunna Iyaabuusootu qassa'nera ka'ino. Ani kayinni, insa baalanka qeeltinanni gede assoommo'ne.

¹² Ki'ne alba higgine qaaffini deerrinni, 2 Amooraawootu mootoolla fushshe hunate insa wodana ba'anno gede assoommo. Kuni baalu ikkinohu bagadi'nenninna urde'nenni di"ikkino.

¹³ Loossine daafurtinoonnikkita shaqqado baattonna mi'nitinoonnikki katamma heedhinanni gede oommo'ne. Kuneeti xa kaassinoonnikkita woyinete laalonna daafurtinoonnikkiha ejersu haqqe guma ittinanni heedhinoonni› yiino» yee coyi'rinsa.

¹⁴ Iyyaasu lede, «Xa Kaaliiqa ayirrissesi; co'o yitino sumbenninna ammanamatenni soqqammesi. Akaakka'ne Mesiphexoomiyahonna Gibitsete magansidhinota wole maganna huntine, Kaaliiqa calla magansidhe.

¹⁵ Iso magansi'ra dancha lawa hooggu'nero kayinni, akaakka'ne Efiraaxisi Wayira widoonni heedhu waro magansidhure, woy xa gobbansara heedhinannirita Amooraawootu maganna magansidhinanniha ikkiro, magansidhinanniha techo doodhe. Aninna mini'ya manni kayinni Kaaliiqa magansi'neemmo» yii.

¹⁶ Mannuno, «Kaaliiqa agurre wole magannara soqqama ninkewiinni faffo!

¹⁷ Maganinke Kaaliiqi annuwankenna ninke Gibitsete borojjimmanni fushshinonke. Assinota jajjabba maalale anfoommo; daga baala sa'ne dangummo geeshsha keerunni agarinonke.

¹⁸ Ninke tenne baatto dangammora alba hinge qaanfummo deerrinni, hakko noore Amooraawoota baala albinkenni fushshe shorrino. Kunnira, Maganonke ikkinoha Kaaliiqa magansi'neemmo» yee dawari.

¹⁹ Iyyaasuno mannaho, «Kaaliiqi qullaawanna hinaasaancho Magano ikkinohura, ki'ne isira soqqama didandiitinanni. Wole maganna magansidhiniro, sao'nenna cubbo'ne baala diaguranno.

²⁰ Iso agurtine wole maganna magansidhiniro, isi albasi ki'newiinni ka'a qolanno; hanqe qorichishanno'ne. Kunni albaanni ki'nera dancha coye assino'neha ikkiro nafa, galagale hunanno'ne» yiinsa.

²¹ Mannuno Iyyaasura, «Dee'ni! Ninke Kaaliiqalla magansi'neemmo» yiisi.

²² Iyyaasuno, «Maahoyyena xa Kaaliiqa magansi'rate doodha'nera ki'ne ki'neneera naqaashshete» yee coyi'rinsa. Insano, «Ee! Ninke ninkeneera naqaashshete!» yite dawartu.

²³ Isino, «Hatto ikkiro, mereero'ne noota wole maganna hunne. Israeelete Magani Kaaliiqira ammanama'ne leellishshe» yiinsa.

²⁴ Hakkunni gedensaanni, mannu Iyyaasura, «Ninke Maganonke Kaaliiqa magansi'neemmo; hajajosino wonshineemmo» yii.

²⁵ Hakko barranni Iyyaasu Kaaliiqi su'minni mannu ledo gondooro ei. Hakko Sekeemi heedheenna galte hossannota woganna wodho kulinsa.

²⁶ Iyyaasuno tenne hajajo Seeru Maxaafi Maganunnihura borreessi. Hakkunni gedensaanni, mitto lowo kincho haa're, Qullaawu dargi Kaaliiqihuwa noo qilxo hunda kaasi.

²⁷ Manna baalaho, «Kaaliiqi ninkera coyi'rino qaale baala macciishshino daafira, xa kuni kinchi naqaashshenke ikkanno. Ki'neno Magani'ne aana bunshe assa agurtinanni gede, naqaashshe ikkanno'ne» yiinsa.

²⁸ Hakkunni gedensaanni, Iyyaasu manna baala geegiissi; mittu mittunku galagale base basesi ha'ri.

IYYAASUNNA ALIAAZAARI REYO

²⁹ Hakkunni gedensaanni, Kaaliiqi soqqamaanchi Newe beetti Iyyaasu 110 dirisinni reyi.

³⁰ Israeelete manni, Ga"aashi Ilaalira aliyyeenni gaaraame Efireemi gobbara umisi iqqira Teminati-Serahi madaarisi.

³¹ Iyyaasu lubbotenni noo yanna baalantera, Israeelete manni Kaaliiqa magansi'rino. Isi reyihu gedensaanni Kaaliiqi Israeelete assino maalale baala illensanni la'ino albisooti noo yanna geeshsha iso calla magansidhanni heedhino.

³² Israeelete manni Gibitsetenni fushshinoha Yooseefi miqicho Sekeemi madaari. Tini baatto Yaiqoobi Sekeemi anni Hamoori oosowiinni 100 kinchu birrinni hidhinote; baatto noohuno Yooseefi ilama iqqi qoqqowi giddooti.

³³ Aarooni beetti Aliaazaarino reenna, Gibia madaartinosi. Hakku katami, gaaraame Efireemi gobbara beettisi Finihaasi hee'ranno gede uyinoonniho.