IYYAASU 23 - Qullaawa Maxaafa

IYYAASU COYI'RINOHU GEEGIISSOTE QAALI

¹ Lowo yanna gedensaanni, Kaaliiqi Israeeloota gaangaawinsara noo diinnawiinni fooliishshiishe keere uyinsa. Hatte yannara Iyyaasu lowo geeshsha geedhe no.

² Kunnira, isi Israeele baala, geerra, albisoota, daanyootanna olu hajajaano woshshe gamba asse, «Kuneeti ani lowo geeshsha geedhoommo.

³ Magani'ne Kaaliiqi ki'ne kaa'late tenne gosa aana assinore baala affinoonni; Magani'ne Kaaliiqi ki'ne daafira gaaramino.

⁴ Kune ani gudoommo daga baatto baalante ledo Yordaanoosinni kayise, galchimaanni Mediteraaniyu Baari geeshsha nootanna gattinota baala iqqa asse oommo'ne.

⁵ Magani'ne Kaaliiqi insa albi'nenni xooqqanno gede assanno; ki'ne alba higgine qaaffini deerrinni, insa fushshe hunanno. Magani'ne Kaaliiqi uyino'ne hexxo garinni baattonsa ragidhinanni.

⁶ Kunnira, Muse borreessinohura Seeru Maxaafira noo hajajo baala seekkitine jawaattine agadhe. Hajajotewiinni ka'anna kawa higginoonte.

⁷ Hakkunni gedensaanni, giddo'ne noo daga ledo horonta namoontinoonte; magannansa su'mano woshshitinoonte. Su'minsanni xaartinoonte; insara soqqantinoonte; kumbuultinoontensa.

⁸ Hakkawarinni xaa geeshsha assitinoonninte gede Magani'ne Kaaliiqira ammanantine heedhe.

⁹ Ki'ne alba higgine qaaffini deerrinni, jajjabbanna jawaata daga Kaaliiqi fushshe shorrino'ne; techo geeshsha ittisa'nera dandiinohu mittuno dino.

¹⁰ Magani'ne Kaaliiqi uyino'ne hexxo garinni ki'ne daafira gaaramanno'nehura, ki'nehu mittichu, insaha mitto kume shorra dandaanno.

¹¹ Kunnira, Magano'ne Kaaliiqa seekkitine baxa hasiissanno'ne.

¹² Ki'ne ammananitinannikkirenna giddo'ne noo daga ledo adhamatenni karsantinanniha ikkiro kayinni,

¹³ ki'ne alba higgine qaaffini deerrinni, Magani'ne Kaaliiqi tenne daga albi'nenni fushshe shorrannokkita affe. Roorenka insa ki'nera woshshaadonna ubbinanni bale gede ikkitanno'ne; badhe'nera harfaame liche, ille'nera qasanno uta ikkitanno'ne. Magani'ne Kaaliiqi uyino'ne baatto danchate aaninni mittuno gattinikkinni fultine ba'ina geeshsha tini baala bao amaddanno'ne.

¹⁴ «Kuneeti ani mannu aalo ikkeemmo yanna iillitinoe. Magani'ne Kaaliiqi uyino'ne hexxo garinni assino'neha dancha coye baalanka ki'ne mittu mittunku godowi'nenni seekkitine egentinoonni; isi uyino'ne hexxo giddonni mitteno gattukkinni baalanti wo'mitanno.

¹⁵ Ikkollana, isi mitte mittenta hexxo wonshino'nente gede, gara gibbinanni yannara aana'ne qoricha dirrisanno.

¹⁶ Magani'ne Kaaliiqi agadhitinara uyino'ne gondooro diigginironna wole magannara soqqantinanni magansidhininsaro, hanqisinni qorichishanno'ne. Isi uyino'netera dancha baattora ki'ne giddonni mittu nafa dihee'ranno» yiinsa.