IYYAASU 22 - Qullaawa Maxaafa

IYYAASU IQQA SOOJJAATOONNI ADHITINORE GEEGIISSI

¹ Hakkunni gedensaanni Iyyaasu Roobeelita, Gaaditanna soojjaatoonni noota Minaase ga're mitteenni woshshe,

² «Kaaliiqi soqqamaanchi Muse hajajino'nere baala wonshitinoonni. Ani hajajoommo'nere baalankano agadhitinoonni.

³ Tenne baalante yanna giddo fiixa'ne Israeeloota dicallachiishshinoonninsa; Magani'ne Kaaliiqi hajajo seekkitine agadhitinoonni.

⁴ Kuneeti xa Magani'ne Kaaliiqi uyino'nehu hexxote qaali garinni, fiixi'nera Israeelete keere uyinonsa. Kunnira, Kaaliiqi soqqamaanchi Muse uyino'ne gobba Yordaanoosi Wayira widoonni soojjaato nootewanna iqqa assidhine ragidhinoonnitewa higgine hadhe.

⁵ Muse uyino'ne Seera seekkitine agadhe; Magano'ne Kaaliiqa baxxe; hedosi wonshe; hajajosino agadhe. Isira ammanantinoonnire ikkitine, wo'mu wodaninninna wo'ma lubbonni soqqammesi» yii.

^6-8 Iyyaasu maassi'rinsahu gedensaanni, geegiissanni aane noo biddishsha uyinonsa. Hakkuno, «Kuneeti xa lowo saada, birra, culka, camo, siwiilanna lowo imaani gudhitine dureeyye ikkitine gobba'ne higginaraati. Kunnira, diini'newiinni adhitinoonni qafado massitine ayiddi'ne ledo beeqqe» yaannoho. Insano hakkunni gedensaanni darga dargansa hadhu. Muse Yordaanoosi Wayira soojjaatoonni Baasaani baatto Minaase ga'rera darateho iqqa asse uyinonsa. Wole Minaase ga'rera darateho kayinni, Iyyaasu Yordaanoosi Wayira galchimaanni wole ga're ledo ragidhanno baatto uyinonsa.

⁹ Kunni garinni, Roobeeliti, Gaaditinna soojjaati Minaase ga're wo'munku base basensa galagalte hadhu. Insano geegiissineennansa Muse widoonni Kaaliiqi hajajinonsa garinni alba iqqa assidhe adhitinowa Geleaadi gobba higgu yannara, wolootu Israeelootu Seelo gattino.

YORDAANOOSI WAYI MULE SEEKKINOONNIHA KAKKALOTE DARGA

¹⁰ Roobeeliti, Gaaditinna soojjaati Minaase ga're Yordaanoosi Wayi mule Kana"aani nootewa Geliilooti katama iillitanni heedhenni, Yordaanoosi mule maala'linanniha lowoha kakkalote darga seekkitu.

¹¹ Gatinohu Israeelete manni, «Roobeeliti, Gaaditinna soojjaato nooti Minaase ga're Yordaanoosi Wayi mule Kana"aani baattora nootera ninke iqqira Geliilooti kakkalote darga seekkitino» yinanni duduwo macciishshi.

¹² Israeelete manni konne coye macciishshi yannara, baalunku soojjaati ga'rera gaaddara Seelo gamba yitu.

¹³ Kuni ikkara albaanni Israeelete manni, qeesichu Aliaazaari beetto Finihaasi, Geliaadi nooriwa Roobeeli, Gaadinna soojjaato nootewa Minaase ga're daratiwa sokku.

¹⁴ Finihaasi ledo 10 jajjabbu manni no; kuri mittu mittunku galchimi ragaanni noo ga'renni ilama ilamansa giddonni fultino albisootaati.

¹⁵ Insano Roobeeli, Gaadinna soojjaato noori Minaase manni heedhannowa Geleaadi marte iillitu.

¹⁶ Hakkiira iillite Kaaliiqi manni baalaho, «Konne kakkalote darga umi'nera seekki'ratenni Kaaliiqi aana busha assitinoonni; hoodesino dihadhinoonni; kunni garinni Israeelete Magani aana konne busha coye mayira assitini?

¹⁷ Kaaliiqi manna daneessanno dhibbinni qorichishi yannara, Peoori loonsummo cubbo habbinini? Hakkuyinni kainohunni kuneeti xaa geeshsha shettote aana hee'noommo; hakku cubbi ajeennaatini konne leddinihu?

¹⁸ Xa ki'ne Kaaliiqi hoode ha'ra giwa'neetini? Ki'ne techo Kaaliiqi aana bunshe assitiniro, isi ga'a Israeele wo'mantera hanqanno.

¹⁹ Kunnira, tini heedhinanni baatto magansi'rate injiitannokkita ikkituro, dukkanisi qasaminowa Kaaliiqiwa amme; ninke iqqa ikkitino baattonni injaanno'ne darga adhe. Maganinke Kaaliiqi aana kayinni bunshe assitinoonte. Woy alba seekkinoonnihu Maganinke Kaaliiqihu kakkalote dargi aana leddine wole kakkalote darga seekkatenni ninkeno bushuulle assitinoontenke.

²⁰ Zaara beetti Akaani batte ikkinore adhe cubbo loosinota qaagge. Hakkunninni kainohunni Kaaliiqi wo'mu Israeelete mannira hanqino; cubbisi daafira reyinohu Akaani calla di"ikkino» yitu.

²¹ Roobeeliti, Gaaditinna soojjaati ragaanni nooti Minaase ga're galchimi ga're albisootira,

²² «Wo'manka roorannohu wolqaataamu Kaaliiqaati! Isi baalunku Mootichaati! Isi baalanka roore wolqaataamo Maganooti! Ninke konne mayira assinoommoro isi afino! Ki'neno mayira assinoommoro affinara hasi'neemmo; halaalinta bunshoommoronna Kaaliiqira noonke amma'na xeinsoommoro, marartinoontenke.

²³ Kaaliiqira hajajammeemmokkire ikkinummoronna seekkinoommowa kakkalote dargira shilqote kakkalo, gidu fushshaate, woy mittimmate kakkalo shiqishate hendoommoha ikkiro umisi Kaaliiqi qorichishonke.

²⁴ Ninke seekkinoommohu kunnira di"ikkino! Seekkinoommohu daanno sanira ki'ne fiixi ninke ooso, ‹Ki'nera Israeelete Magani Kaaliiqi ledo mayi xaadi noo'ne?

²⁵ Isi ninkenna ki'ne, Roobeelinna Gaadi manni mereero, Yordaanoosi Waa danna asse worino. Kunnira, Kaaliiqi ledo mayi xaadino dihee'ranno'ne› yitannonsaha ikkanno yine waajjineetilla. Hatto ikka hoogiro, ki'ne ilama ninketa Kaaliiqa magansidhannokki gede hooltannoha ikkanno.

²⁶ Kunnira, ninke seekkinoommohu kakkalote dargi, shilqonnita woy wole kakkalo shiqinsheemmoha di"ikkino.

²⁷ Ninke konne kakkalote darga seekkinoommohu, ninkenna ki'ne mereero malaate ikke hee'ranno gedeeti. Kunino ninkera gedensaanni dagganno ilama Qullaawu Dukkani albaanni Kaaliiqa magansi'neemmo gede shilqonnita, wole kakkalonna gatote ikkitannota mittimmate kakkalo shiqinshanni hee'rankera malaate ikkanno. Kunino ki'ne ilama ninketa, ‹Kaaliiqi ledo mayi xaadino dino'ne› yitannokki gede kaa'lanno.

²⁸ Kunnira, miteekke kuni coyi ikkiro ninke hedo ilamanke, ‹La'e! Albi anuwanke seekkitinohu kakkalote dargi Kaaliiqira seekkinoonnihu kakkalote dargi ledo mittu gariho. Kunino ninkenna ki'ne mereero malaate ikke hee'rara ikkinnina shilqonnita woy wole kakkalo shiqinshanni gede hende assinoonniha di"ikkino!› yaa dandiitanno gedeeti.

²⁹ Ninke halaaleho, Kaaliiqi aana bunshe diassinoommo. Shilqote kakkalo woy gidu fushshaate, woy wole kakkalo shiqishate hende wole kakkalote darga seekkatenni Kaaliiqa magansi'ra diagurroommo. Iso magansi'nannihu Xaadu Dukkani albaanni uurrinohu Maganinke Kaaliiqira seekkinoonnihunni baxxinoha wole kakkalote darga diseekkinoommo» yite dawartu.

³⁰ Qeesichu Finihaasinna sonkeenna dagginori ledosi noori galchimi ilama sooreeyye, Roobeelihu, Gaadihunna soojjaatiri Minaase ilama, insa qoltinonsa dawaro macciishshite hagiidhitu.

³¹ Kunnira, qeesichu Aliaazaari beetti Finihaasi, «Kuneeti xa Kaaliiqi ninke ledo noota anfoommo; ki'ne isi aana bunshe diloossinoonni. Kaaliiqi Israeelete manna qorichishanno gedeno diassitinoonni» yiinsa.

³² Hakkunni gedensaanni, qeesichu Aliaazaari beetti Finihaasinna albisootu, Roobeelinna Gaadi manna Geleaadi baattora agurte, Kana"aani noohuwa Israeelete manniwa dagge, macciishshitino coye kultunsa.

³³ Israeele dawaronsanni hagiidhite Magano galattu. Hakkunni gedensaanni, Roobeelinna Gaadi manni hee'ranno baatto hunate gaado ganate dihasidhino.

³⁴ Roobeelinna Gaadi ga're, «Kuni kakkalote dargi Kaaliiqi Magano ikkinota kulate ninke baalunkura malaateho» yitu. Kakkalote dargirano, Malaateho yite su'ma fushsitu.