IYYAASU 21 - Qullaawa Maxaafa

LEEWAAWOOTAHO UYINOONNI KATAMMA

¹ Leewi ga're albisooti qeesichu Aliaazaari, Newe beetti Iyyaasuwanna Israeelete manni ga're albisootiwa ka'e daggu.

² Hakkiicho Kana"aani Seelora insawa shiqqe, «Kaaliiqi Muse widoonni hee'neemmo katammanna qarqarinsara saadanke hosiisi'neemmo baatto uyinanninke gede hajajino» yitu.

³ Kunnira, Kaaliiqi hajajo garinni Israeelete manni Leewaawootaho heedhanno katammanna saada hosiisidhanno baatto gobbansa aaninni beehe uyinsa.

⁴ Leewi ga're giddonni umo assite katamma adhitinori, Qehaati gosa maateeti. Qeesichu Aarooni sircho ikkino boosaallira, Yihudu, Simiooninna Biiniyaami ga're baattonni 13 katamma beenkinsa.

⁵ Gattinorira Qehaati ilamara Efireemi, Daaninna galchimi Minaasenni 10 katamma uyininsa.

⁶ Gershooni ilamara Yisaakoori, Aseeri, Nifitaaleminna Baasaani noohunni soojjaatiidi Minaasenni 13 katamma uyininsa.

⁷ Meraari sirchi maatera Roobeeli, Gaadinninna Zaabilooni baattonni beenke 12 katamma uyininsa.

⁸ Muse widoonni Kaaliiqi hajajino garinni Israeelete manni tenne katammanna saada hossanno baatto Leewaawootaho hixunni beehinsa.

^9-10 Yihudunna Simiooni baattonni beenke Leewi ga're giddo Qehaati godowa ikkitinorira Aarooni ilamara uyinoonni katamma tenneeti. Insa qeechi umiha ikkeenna,

¹¹ Arbai Katama adhitu. (Arbai Enaaqi annaati). Arbai, gaaraame Yihudu gobba gaangaawisera noo baatto saada hossannota xa kayinni Kebirooni yinannita uyitunsa.

¹² Ikkollana katamaho noohu loosi'nanni darginna qoqqowisi giddo noo qachuwa balanxe Yoofooni beetti Kaaleebira iqqa assine uyinoonnite.

¹³ Eeggote katamma giddonni mitto Kebirooni aana lende, qeesichu Aarooni maatera kunninni aante noo katamma beenkoonninsa. Insano: Libina,

¹⁴ Yatiiri, Eshitaamoa,

¹⁵ Hoolooni, Debiiri,

¹⁶ Ayini, Yuuxanna Beeti-Shemeshi baatto saada hossannote ledo Yihudunna Simiooni baatto aaninni beenke uyinoonnihu 9 katammaati.

¹⁷ Biiniyaami baattonni beenke 4 katamma uyinoonninsa. Kurino saada hossanno baatto ledo Gebaooni, Geebaai,

¹⁸ Anatootinna Almooni yinannireeti.

¹⁹ Aarooni sircho ikkitino qeesootira saada hossanno baatto ledo mitteenni 13 katamma beenkoonninsa.

²⁰ Wolootaho Leewi ga'renni ilantinorira Qehaati godowira Efireemi gobbanni katamma beenke uyininsa.

^21-22 Gaaraame Efireemi gobbara noo katama eeggonniha Sekeemi, Gezeeri, Qibitsayiminna Beeti-Horooni yinannire shoolenka katamanna saada hossanno baatto uyininsa.

²³ Daani baattonni beenke uyinoonninsahu shoole katamma saada hossanno baatto ledo Elteqe, Gebitooni,

²⁴ Ayalooniitinna Gaati-Remooniiti.

²⁵ Galchimi ragi Minaase baattonni saada hossanno baatto ledo beenke uyinoonninsahu 2 katami, Tainaakiitinna Gaati-Remooniiti.

²⁶ Kuri gattinori Qehaati sirchi maate, saada hossanno baatto ledo mitteenni 10 katamma adhitu.

²⁷ Gershooni ilama ikkitinori wolootu Leewaawootu sirchi, saada hossanno baatto ledo soojjaati ragi Minaase baatto aaninni beenke uyinoonninsari 2 katami Baasaani noo katamma eeggonnite giddonni mittu Goolaaniiti, layinkihu kayinni Be"eshitiraati.

²⁸ Yisaakoori baattonni beenke saada hossanno baatto ledo uyinoonninsati 4 katamma, Qishiyooni, Dabiraati,

²⁹ Yarmuutinna Ayini-Ganiimiiti.

³⁰ Aseeri baattonni beenke saada hoossanno baatto ledo uyinoonninsahu 4 katami, Mishiaali, Abidooni,

³¹ Helqaatinna Rehoobiiti.

³² Nifitaalemi baattonni beenke saada hossanno baatto ledo uyinoonninsahu sasu katami, Galiilaho noo katamma eeggonnite giddonni gamu Qedeeshi, Haamooti Dooritinna Qartaaniiti.

³³ Gershooni sirchi maate baalu mitteenni 13 katamma, saada hossanno baatto ledo adhitu.

³⁴ Meraari ilama ikkitinorira gattino Leewaawootira beenkoonniti saada hossanno baatto ledo adhitinoti 4 katamma, Yoqineaami, Qaarta,

³⁵ Diiminanna Nahalaliiti.

³⁶ Roobeeli baattonni beenke saada hossanno baatto ledo uyinoonninsati 4 katamma, Beetseeri, Yahaatsi,

³⁷ Qedemootinna Mefa"aatiiti.

³⁸ Gaadi baattonni beenke saada hossanno baatto ledo uyinoonninsati 4 katamma eeggote katamma giddonni Geleaadi baattora noori Raamooti, Mahinayimi,

³⁹ Hasebooniitinna Yaizeeriiti.

⁴⁰ Kunni garinni, Meraari godowi mitteenni 12 katamma adhi.

^41-42 Israeele iqqa assidhe adhitino baatto giddonni, mitteenni 48 katamma saada hossanno baatto ledo Leewaawootaho uyitu.

ISRAEELOOTU IQQA ADHITE HAGIIRRAAMMA IKKITU

⁴³ Kunnira, Kaaliiqi akaakkansara aara xaarinonsa baatto baala, Israeelootaho uyinsa. Baatto ragidhuhu gedensaanni, teesse heedhu.

⁴⁴ Kaaliiqi akaakkansara eino gondoori garinni baatto baalate keere uyinsa. Kaaliiqi diininsa aana qeelle uyinonsa daafira, albansaanni uurrara dandiinohu mittuno dino.

⁴⁵ Kunni garinni, Kaaliiqi Israeelete mannira uyinoha mitto mittonka hexxote qaale wonshinonsa.