IYYAASU 18 - Qullaawa Maxaafa

GATTINO BAATTO BEEHANTINO GARA

¹ Qeele baatto amadihu gedensaanni, Israeelete manni baalu Seelo gamba yee, Magano magansi'nanni dukkana qasi.

² Israeelete manni giddo baattote iqqa afidhinokkiti 7 ga're no.

³ Kunnira, Iyyaasu Israeelete mannira, «E'ine akaakka'ne Magani Kaaliiqi uyino'ne baatto ragidhinikkinni keeshshitinannihu mamooti geeshshaati?

⁴ Mitte mittente ga'renni sase sase manna doore"e; anino mitte mittenti ga're ragidhara hasiisannoha baattote iqqi qeecha afate baattote gara buuxxe borreessitanno gede baalankawa soyemmonsa. Hakkunni gedensaanni, galagalte higge anewa dagganno.

⁵ Insa buuxxanno baatto lamalante ga'rera beenkanni. Yihudu ga're wodiidi ragaanni, Yooseefi ga're aliyye ragaanni, iillannonsa qeecha adhite heedhanno.

⁶ Kuriha 7 qeecha leellishshanno taje borreessitine abbe"e; Maganonke Kaaliiqa xa'mate hixa tugeemmo'nena.

⁷ Ikkollana, Leewaawootaho qeechinsa qeesoota ikkite Kaaliiqira soqqama ikkitino daafira, wolootu ledo baattote iqqi dihee'rannonsa. Roobeelinna Gaadi, hattono Minaase ga're darateho Yordaanoosi Wayira soojjaati ragaanni Kaaliiqi soqqamaanchi Muse uyinonsa baatto balaxxe ragidhino» yii.

⁸ Doorroonni manni baattote gara buuxate hadhara albaanni Iyyaasu, «Baatto baala hadhe; baattote gara buuxxine borreesse; anewano galagaltine amme. Anino konne Seelo ki'ne daafira Kaaliiqa xa'mate hixa tugeemmo'ne» yiinsa.

⁹ Mannootuno gobba baala doyitu; katamma baala borreessite, baatto 7 ga'rera hiitto assine beenkanniro borrotenni leellishshu. Hakkunni gedensaanni, Iyyaasu noowa Seelo galagalte daggu.

¹⁰ Iyyaasu Kaaliiqa xa'mara hixa tugi; gattinorira mitte mittente Israeelete ga'rera beehi.

BIINIYAAMI GA'RERA IQQINOONNI BAATTO

¹¹ Umo assine beenkoonniti Biiniyaami ga'rera qeechinoonni baattooti; insara qeechinoonni baatto noohu, Yihudunna Yooseefi ga're mereerooti.

¹² Aliyye ragaanni noohu danninsa Yordaanoosi Wayinni kae, Iyyaarkora aliyyeenni noo alillitte fule, galchimi ragaanni noo gobba gaaraamete widoonni Beeti-Aweeni gobba halallite geeshsha iillanno.

¹³ Kuni danni wodiidi ragaanni hakkuyira albaanni Looza yinanniwa Beeteli fule, eeliidi Beeti-Horooni ilaali ragaanni hige Axaarooti-Adaari dirranno.

¹⁴ Kuni danni wole widoonni kunni gooddira galchimi ragaanni wodiidira hige erame, Yihudu ga're iqqa ikkitinotewa Qiriyaati-Ba"aali woy Qiriyaati-Yiariimi tayise sa"anno. Kuni galchimi ragaanni noo dannaati.

¹⁵ Wodiidi danni galchimi ragaanni Qiriyaati-Yiariiminni kae, Nefitoha bu'awa iillanno.

¹⁶ Hakkiinni, Refayimi lagichira aliyye goofimarchira noohu Hinoomi lagichi qotira ilaalu hundira dirranno. Hakkiinni sae, Iyaabuusootu goorora wodiidi gafira noohu Hinoomi lagichi widoonni hige Ayini-Rogeeli sa"anno.

¹⁷ Aliyye ragaanni Ayini-Shemeshi widira erame, Adumiimi sa'nanni qotira noohuwa Geliilooti iillanno. Hakkiinnino sae, alba Roobeeli beetti su'minni woshshinanniwa Bohaani kinchiwa dirre,

¹⁸ aliyye ragaanni Yordaanoosi lagichi qotira noo gooro sae ha'ranno; hakkunni gedensaanni, lagicha dirranno.

¹⁹ Beeti-Hogila gooro aliyyeno sae, Yordaanoosi Wayi timannowa Reyote Baarira aliyye birxe fule uurranno. Kunnira, wodiidi danni konne ikkanna,

²⁰ soojjaati danni kayinni Yordaanoosi Waati. Biiniyaami ga're iqqa assidhe adhitino baatto danni konneeti.

²¹ Biiniyaami ga're katamma Iyyaarko, Beeti-Hogila, Emeqetsiitsi,

²² Beetiaraba, Tsemari-Gayimi, Beeteli,

²³ Awiimi, Faara, Ofira,

²⁴ Kefaariamooni-Gayi, Ofiininna, Geebai yinanniri kiironsa mitteenni 12 katamma ikkitanna, gaangaawinsara noore shiimmaadda katammano giddo amaddanno.

²⁵ Qoleno Gebaooni, Raama, Be"erooti,

²⁶ Mitsipha, Kefiira, Mootsa,

²⁷ Reqeemi, Yiritsaeeli, Taraala,

²⁸ Seelai, Eleefi, Yabuusi (Yerusaalame) Gibianna Qiriyaati-Yiariimi Yinanniri kiironsa mitteenni 14 katamma ikkitanna, gaangaawinsara noore shiimmaadda katammano giddo amaddanno. Kunnira, Biiniyaami ga're iqqa assidhe adhitino baatto tenneeti.