IYYAASU 17 - Qullaawa Maxaafa

GALCHIMI MINAASERA UYINOONNI IQQA

¹ Yordaanoosi Wayira galchimaanni noo baatto beenke Yooseefihu bayiru beetti Minaase ilamara uyini. Minaasehu bayiru beetti Geleaadi anni Makiiri bagadaanchoho. Kunnira, Yordaanoosi Wayira soojjaatoonni noore Geleaadinna Baasaani isira uyini.

² Yordaanoosira galchimaanni noo baatto gattinorira Minaase ilamara uyini. Insano Abieezeri, Heleqi, Asirieeli, Sekeemi, Hefeerinna Shemidai yinannireeti. Yooseefi beetti Minaase sirchi labballu kore ikkitanna, insano mine mineho umo ikkitinoreeti.

³ Selofihaadi Hefeeriho; Hefeeri Geleaadiho; Geleaadi Makiiriho; Makiiri Minaaseho; Selofihaadira kayinni, seenne ikkinnina labballi ooso dinosi. Seennisi Mahila, Noa, Hogila, Milkanna Tiritsa yinannireeti.

⁴ Seennuno, qeesichu Aliaazaariwa, Newe beetti Iyyaasuwanna albisootunniwa mare, «Labballu ayiddinke gede, ninkerano iqqa uyinankera Kaaliiqi Muse hajajino» yii. Kunnira, Kaaliiqi hajajino garinni insarano labballu ayiddinsa ledo iqqa uyininsa.

⁵ Minaasera Yordaanoosi Wayira soojjaatoonni noori Geleaadinna Baasaani aana lende 10 qeecha uyinoonnihu kunniraati.

⁶ Hatto ikkinohu, meentu fiixinsarano labballu gede iqqa uyinoonninsahuraati. Geleaadi baattono gattinorira Minaase sirchira aamantu.

⁷ Minaase iqqi Aseerinni kae, Sekeemira soojjaatoonni nootewa Mikimetaati katami geeshsha iillanno. Dannuno wodiidira sae, Ayini-Tafuha manna giddo amadanno.

⁸ Tafuha gaangaawira noo baatto Minaasera aamantu. Dannu aana noohu shiimu Tafuha katami kayinni, Efireemi sirchi iqqaati.

⁹ Dannu hakkiinni kae, Qaana Xashshi geeshsha iillanno; xashshoho wodiidoonni noo katamma Minaase gashshooti qoqqowi giddoonni higge sa'annota ikkiturono, Efireemi iqqaati. Minaase danni aliyye ragaanni Qaana Xashshoho aane Mediteraaniyu Baarira gawa'lino.

¹⁰ Kunninni kainohunni, lamunkunnihu galchimiidi danni Mediteraaniyu Baara ikkeenna, Efireemi wodiidoonni, Minaasera aliyyeenni hee'ranno gede assini. Aseeri aliyye galchimira, Yisaakoori qole aliyye soojjaato hee'ri.

¹¹ Yisaakoorinna Aseeri gashshooti qoqqowi giddo qaccete noota Doori, Indoori, Tainaaki, Megidonna gaangaawinsara noore shiimmaadda katamma lede Beeti-Shanna Yubileaami yinanni gaangaawira nooti shiimmaadda katammano Minaase iqqa ikkitu.

¹² Ikkollana, Minaase manni hatte katammara hee'ranno manna shorre hunate dandiinokki daafira, Kana"aanootu hakkiicho heedhu.

¹³ Israeelootu wolqa lexxitu yannara kayinni, Kana"aanoota wolqate looso loossanno gede giddeessitinonsata ikkinnina, hakkiichinni gudisse dishorritinonsa.

¹⁴ Yooseefi ga're Iyyaasu, «Kaaliiqi maassi'rinonke daafira kiironke bati'rate. Iqqinke mitto qeecha calla ikkihu mayiraatiyya?» yite xa'mitu.

¹⁵ Iyyaasu daware, «Kiiro'ne kageeshshi geeshsha batidheenna gaaraame Efireemi baatto ajjino'neha ikkiro, Ferizootunna Refootu heedhanno baatto martine dubbo do'le» yiinsa.

¹⁶ Insano, «Gaaraame baatto ninkera di"ikkitannonke. Hakkuyi aanano, Iyiziraeeli lagichira Beeti-Shaaniranna gaangaawinsara noori shiimmaadda katammaranna xawu gobbara heedhanno Kana"aanootira haammata siwiilu faradi gaare noonsa» yitu.

¹⁷ Iyyaasu Efireemiranna Yordaanoosira galchimaanni heedhannorira Minaase ga'rera, «Ki'ne addanka kiiro batinyeho; wolqatennino jawaattinoonnireeti. Mitto saino qeechi hee'ra'nera hasiisanno.

¹⁸ Kunnira, gaaraame gobba ki'nera ikkitanno; dubbono ikkiro doltine qaccetenni qaccete geeshsha umi'ne iqqa assidhe. Kana"aanootaho ayi gedeno siwiilu faradi gaare heedhunsaronna jawaatoota ikkituro nafa, fushshitine shorra dandiitinanni» yiinsa.