IYYAASU 13 - Qullaawa Maxaafa

AMADA HASIISSANNOTI AMADANTINOKKI BAATTO

¹ Iyyaasu geedhe diro xiiwita Kaaliiqi, «Kuneeti ati geedhite diro xiiwootto. Amada hasiissannoti kayinni lowo baatto gatte no.

² Gattinoti, Filisxeemenna Geshuuri gashshooti baalu,

³ wodiidi ragaanni, Awiimi geeshsha noo gashshooti baalaho; kunino, Gibitsete dannira noohunni Shihoori Buichonni kayise, aliyyeenni Eqirooni iillitanno baatto Kana"aanite. Ontu Filisxeemete mootoolla Gaaza, Ashidoodi, Asiqeloona, Gaatinna Eqirooni heedhanno.

⁴ Wole widoonni Sidoonootu amado ikkitinoti Kana"aani gobba Meaara yinanniwa baala giddo amadde, Amooraawootu qaccenni Afeeqi geeshsha noohu,

⁵ Gebalootu baattonna soojjaatoonni Hermooni Ilaalira wodiidoonni noohunni Ba"aligaadinni kayise, aliyyeenni noohuwa Hamaati sa'nanniwi Libaanoosi gudisamunku xaa geeshsha diamadamino.

⁶ Kunino Libaanoosi ilaallanna Misirefotimayimi mereero noota gaaraame gobbara noota Sidoonootu gashshoote baala giddo amadanno. Israeelete manni alba hige ha'ri deerrinni, ani tenne daga shorreemmo. Atino hajajummohente gede baatto baala Israeelootaho beehatto.

⁷ Tenne baatto iqqa assite beehattohu honsente ga'reranna Minaase ga're daratiraati» yee kulisi.

YORDAANOOSI WAYIRA SOOJJAATOONNI NOO GASHSHOOTI BEEHAMINO GARA

⁸ Roobeelinna Gaadi ga're hattono, Minaase ga're darati Kaaliiqi soqqamaanchi Muse uyinonsa baatto balaxxe ragidhino. Tini baatto noohu soojjaatoonni Yordaanoosi Wayira widoonniiti.

⁹ Gashshootinsa Arnooni lagichi qaccera aliyyeenni noohunni Aroeerinninna hakkunni lagichi mereero noo kataminni kayise, Medebaani xawinni Dibooni geeshsha noo gobba baala mitteenni amadanno.

¹⁰ Qoleno, Hasebooni moohinohu Amooraawootu moote Sewooni hee'rino katammanni kayise, Amooni danni geeshsha iillanno.

¹¹ Kunino Geleaadi, Geshuurinna Maaka awuraajjanna Hermooni Ilaala gudise, hattono Saleka geeshsha nooha Baasaani giddo amadanno.

¹² Qoleno, Astaarootinna Edirayi hee're gashshinoha Refootu gedensaanni gatinoha moote Aagi gashshoote Baasaani gudise amadino; Muse konne manna baala qeele shorre hunino.

¹³ Ikkollana, Israeelootu Geshuurinna Maaka manna fushshite dihuntino. Kunnira, insa techo geeshsha Israeelootu ledo heedhanno.

¹⁴ Muse Leewi ga'rera baattote beehacho diuyino. Uyinonsakkihu, Kaaliiqi Muse hajajinosi garinni Israeelete Magani Kaaliiqi shilqote kakkalora shiqinshannihu qeechansa ikkanno gede hexxo uyinonsa daafiraati.

ROOBEELIRA IQQA ASSINE UYINOONNI BAATTO

¹⁵ Muse boosaalli boosaallinsa garinni Roobeeli ga'rera beehino baatto aante noote.

¹⁶ Danninsa Arnooni lagichi qaccera noohu Aroeerinna katamu lagichi mereero noohunni kayise, Medeba mule noo xawo baala,

¹⁷ Hasebooninna alichoho noo katamma baala, hattono Dibooni, Bamooti-Ba"aali, Beetibeaalimioni,

¹⁸ Yahaatsi, Qedemooti, Mefa"aati,

¹⁹ Qiriyatayimi, Sibima, gaaraamu lagichira noohu Tseretishahaari,

²⁰ Beeti-Fegoori, Fisiga Ilaali woroonni noo eelallittenna Beetiyeshimooti yinanniwa baala amadanno.

²¹ Alichoho heedhanno katammanna Hasebooni hee're gashshinohu Amooraawootu moote Sewooni gashshoote baala amadanno. Muse, moote Sewooninna Midiyaami gashshitinore Eewi, Reqeemi, Tsuuri, Huurinna Rebai qeelino. Kuri baalu gobba gashshitannohu, moote Sewoonira gabbartanniiti.

²² Israeelete manni shiinori giddonni mittu kiilaanchu Bioori beetti Beleaamiiti.

²³ Yordaanoosi Wayi, Roobeeli ga'rera gashshootu dannaati. Kunnira, Roobeeli ga're ilamara iqqa assine uyinoonninsa katammanna qachuwa kuriuuti.

GAADI GA'RERA IQQINOONNI BAATTO

²⁴ Muse baattotenni darate Gaadi ga'rera iqqa asse uyino.

²⁵ Insa gashshooti, Yaizeerinna Geleaadi noo katamma baala Amooni baatto darate lede Raabara soojjaati ragaanni Aroeeri geeshsha iillanno.

²⁶ Baattonsa hala'linyi, Hasebooninni kae, Ramaati Mitsiphanna Bexoniimi hattono, Mahinayiminni kae, Lodebaari danni geeshsha iillanno.

²⁷ Yordaanoosi lagicha sae, Hasebooni moote Sewooni gashshooti gattinore Beetiharaami, Beetinimira, Sukootinna Tsafooni yinanni katamma giddo amadanno. Galchimi ragaanni, aanannonsahu Yordaanoosi Waa ikkanna, aliyyeenni kayinni Galiilu Baarira mare qasi'ranno.

²⁸ Gaadi ga'rera iqqa ikkite aamantino katammanna qachuwa kuriuuti.

SOOJJAATI RAGAANNI HEEDHANNOTERA MINAASE GA'RERA DARATEHO UYINOONNI BAATTO

²⁹ Muse soojjaati ragaanni noo baatto Minaase ga're daratira iqqa asse uyino.

³⁰ Gashshootinsa Mahinayiminna Baasaani gudise giddo amadinoho. Kuni Baasaani, wo'manka moote Aagi gashshoote hattono, Baasaaniha Yaiiri yinanniwa noore 60 qachuwa giddo amadanno.

³¹ Kuni, Geleaadiha darate lede, Baasaani Aagi gashshootira dannawu katamma Astaarootinna Edirayi geeshsha iillanno. Konne baala Minaase beetti Makiiri ilama daratira uyinoonni.

³² Moaabi xawira noo yannara, Muse Iyyaarkonna Yordaanoosi Wayira soojjaati ragaanni noo baatto beehinohu kunni garinniiti.

³³ Muse Leewi ga'rera kayinni baattote qeecha difushshinonsa. Insa iqqi Israeelete Magano Kaaliiqa ikkinohura, qeechansa Kaaliiqira shiqinshanni kakkalonni afidhannota kulinonsa.