IYYAASU 11 - Qullaawa Maxaafa

IYYAASU ALIYYEENNI NOO KATAMMA QEELI

¹ Hatsoori moote Yaabiini Israeele qeeltinota macciishshi yannara, Madooni moote Yobaabiwa, Shimirooninna Akishaafi mootoollawa,

² aliyye ragaanni gaaraame gobbara, Galiilu Baarira wodiidoonni Yordaanoosi Lagichira galchimaanni gaarrate lekkaallo Doori katami mule noo qaccera heedhanno mootoollara sokka soyi.

³ Qoleno Yordaanoosira soojjaatoonninna galchimaanni nooriwa Kana"aanootunniwa, Amooraawootaho, Hitootaho, Ferizootahonna gaaraame gobbara heedhannorira Iyaabuusootaho, hattono Mitsipha gobbara Hermooni Ilaali hunda heedhannoriwa Hiwoota baalaho sokka soyi.

⁴ Insano, gaaddonsa ledo daggino daafira, olanto baaru shaafi gede kiirre dandiinannikkita ikkitu. Kunni baalu ledo lowo faradinna faradi gaare noonsa.

⁵ Tini mootoolla baalanti wolqansa mitte assidhe kaa'lante gaadde, Israeeloota qassara Meroomi Buicho mule kunseentu.

⁶ Kaaliiqi Iyyaasura, «Waajjitooti; Israeelete manni daafira gaarame, ga'a tenne yannara, baalanka gudeemmonsa. Atino faraddansa dagaado muratto; gaarensano giiratto» yiisi.

⁷ Kunnira, Iyyaasunna olanto wo'manti gaadde, Meroomi Buicho mule noorira hedeweelcho bala tuggu.

⁸ Kaaliiqi Israeelootu insa qeeltanno gede assi. Israeelootuno ola kayisse aliyyenni Misirefotimayiminna Sidoonu geeshsha, soojjaatoonnino Mitsipha Lagichi geeshsha shorritunsa. Diinu widihu mittu manchi nafa gatikkinni baalunku goofa geeshsha olu diuurrino.

⁹ Iyyaasu Kaaliiqi hajajino garinni, faraddansa dagaado muri; gaarensano giiri.

¹⁰ Iyyaasu gedensira hige Hatsoori katama qeele amadi; mootesino bagadunni shii. Hatsoori amadi; mootesino shii. Hatsoori hakkuyira albaanni tenne baalanta gashshuwa rooreho.

¹¹ Giddosi noore baala bagadunni shitu; lubbo afi'rinoha mitto nafa gatissukkinni baalanka shakki assitu. Hatsoori katamirano giira qassu.

¹² Iyyaasu tenne katamma baalantanna mootoollansa baala amadi; bagadunnino gudi. Kaaliiqi soqqamaanchi Muse hajajino gede assino.

¹³ Ikkollana, Iyyaasu giiriha Hatsoori katama agurranna, Israeelootu gaarrate aana noo katamma digiirtino.

¹⁴ Israeelootu qafado baalantanna tenne katamma giddonni afidhino saada uminsara adhitu; manna kayinni mittono gatissukkinni baalanka shite guddu.

¹⁵ Kaaliiqi hajajosi soqqamaanchisira Musera uyino; Museno Iyyaasura uyino. Iyyaasuno hajajo wonshino. Kaaliiqi Muse hajajino garinni, Iyyaasu baalanka coye assi; mittorichono digatisino.

IYYAASU AMADINO GASHSHOOTE

¹⁶ Iyyaasu hattenne baatto baala amadi; hattino gaaraame gobbanna gaaru lekkaalloonni aliyyeenninna wodiidoonni noo lagichi Yordaanoosihu giddo, Geeseemitanna wodiidita halallitte baatto baala giddo amaddanno.

^17-18 Gashshootisino wodiidoonni Edoomi mule noohunni Halaaqi Ilaalinni kae, aliyyeenni Hermooni Ilaalira wodiidoonni noohu Libaanoosi lagichinni kayise, Ba"aligaadi geeshsha iillanno. Iyyaasu, seeda yanna tenne gashshootuwa mootoolla ledo olamanni keeshshino. Goofimarchoho kayinni, baalanka qeele qafade shee gudino.

¹⁹ Hiwootu heedhinohu Gebaooni katami callu Israeelete manni ledo namoome keere hee'rino. Hakkuyi ka'i katamma baala kayinni, qeelante angara higgino.

²⁰ Kuri baalu Israeelootu ledo olantanno gede, Kaaliiqi wodanansa hettisamaancho assino. Kunnira, wo'munku ba'anno gede yoo yineenna, mararro nookkiha reyitino. Kaaliiqi, balaxe Musera uyino hajajo tenneeti.

²¹ Hatte yannara Iyyaasu, gaade haxiriggoota Enaaqi sirchono gudi. Insano gaaraame gobbara Kebirooni, Debiiri, Anaabi, Yihudahonna Israeelete gaaraame gobbara heedhannoreeti. Iyyaasu konne mannanna katamma baala huni.

²² Enaaqi sirchi giddonni Israeelete gobbara gatinohu dino. Kayinnilla, shiimu manni callu Gaazaho, Gaatinna Ashidoodi hee'ranno.

²³ Kaaliiqi Muse hajajino garinni, Iyyaasu baatto baala angasira qo'li. Mitte mittente ga'rera iqqa asse Israeelootu baalunkura beehi. Hakkunni gedensaanni olu uurreenna baatto fooliishshidhu.