IYYAASU 10 - Qullaawa Maxaafa

AMOORAAWOOTU QEELAMA

¹ Iyyaasu Gayi katama olame amadihu gedensaanni, Iyyaarkonna mootese assinte gede co'o asse huninotanna mooteseno shiinota Yerusaalamete moote Adonitsedeqi macciishshi. Qoleno, Gebaooni manni Israeelootu ledo namoome keerunni hee'ransa buuxi'ri.

² Gebaooni katami, mootoolla gashshitanno katamma gede jawahonna Gayi katamano rooreho; mannisino jawaata bagadaanooti. Kunninni kainohunni, Yerusaalamete hee'ranno manni lowo geeshsha masi.

³ Kunnira, Adonitsedeqi Hohaami yinannihura Kebirooni mootera, Piraami yinannihura Yarmuuti mootera, Yaafia yinannihura Lakiishi mooteranna Debiiri yinannihura Egilooni mootera,

⁴ «Israeelete ledo namoontino daafira, Gebaooni qanseemmona, daggine kaa'le"e» yee sokka soqqi.

⁵ Hakkunni gedensaanni, Amooraawootu mootoolla: Yerusaalamete moote, Kebirooni moote, Yarmuuti moote, Lakiishi mootenna Egelooni moote noonsa wolqanni olantonsa baala adhite fulte Gebaooni qassu.

⁶ Gebaooni manni Galgalaho noohuwa Iyyaasura, «Gaaraame gobbara heedhannori Amooraawootu mootoolla baalanti olantonsa qixxeessidhe ninke aana bala tugginona rakke dagge gatisinke» yite sokka soqqitu.

⁷ Kunnira, Iyyaasunna olanto baala, filantino gaaddo ledo Galgalunni ka'e ha'ra hanaffu.

⁸ Kaaliiqi Iyyaasura, «Insa waajjitooti; ani wo'ma qeelle oommohe. Insa giddonni mittuno ittisannohehu dihee'ranno» yiisi.

⁹ Iyyaasunna olantosi hashsha wo'ma Galgalunni ka'e Gebaoonira hadhanni galte Amooraawootu aana hedeweelcho bala tuggu.

¹⁰ Kaaliiqino, Israeelete olanto albaanni, Amooraawootu masse hembeelantanno gede assi. Israeelootuno insa Gebaooni massite gorritu. Gattinore Beetihorooni gooddo sa'nanni eelallitte geeshsha shorritu. Wodiidi ragaanni Azeqanna Maqeda geeshsha shorritanni aanansa bala tuggu.

¹¹ Amooraawootu, Israeelootu olantowiinni Beetihorooninni Azeqa eelallitte higge xooqqanni heedheenna, Kaaliiqi gordunni lowiddaanna kaade dirrisi. Kunnira, Israeelootu shitinorinni roore kaade shitinori kiiro lowo geeshsha batidhu.

¹² Kaaliiqi Israeele Amooraawoota qeeltanno gede assi barra, Iyyaasu Kaaliiqi ledo hasaawi. Israeeleno affanna, «Gebaooni aana arrishsho e'ukkinni keeshshito! Aganuno Ayalooni lagichira uurro» yii.

¹³ Kunnira, Israeelete manni diinnansa qeela geeshsha, arrishsho uurritu; aganuno noo darginni milli yiikkinni keeshshi. Kuni coyino, Yashaari Maxaafira borreessineenna no; arrishsho milli yitukkinni, gordu mereero uurritu; barra wo'ma e'ukkinni hossu.

¹⁴ Kaaliiqi Israeelete qote uurre gaaraminonsahura, Kaaliiqi mannaho hajajaminoha hattoo barra hakkuyira albaannino, hakkuyi kawano anfe diegenninoonni.

¹⁵ Hakkunni gedensaanni, Iyyaasunna olantosi qachansa Galgala higgu.

IYYAASU ONTENKA AMOORAAWOOTU MOOTOOLLA QAFADI

¹⁶ Hatte yannara, ontunku Amooraawootu mootoolla luxuphite fulte, Maqeda godira maaxantino.

¹⁷ Kayinnilla, mittu manchi maaxantino darga afe, Iyyaasura kuli.

¹⁸ Isino, «Jajjabba kinna gongo'mishshine, godu xullicho cuffe; hakkiicho agaranno mannano worre.

¹⁹ Ki'ne kayinni, hakkiicho keeshshitinoonte; diina shorritinanni, badheenni bala tugge. Xooqqe katamansa e'anno gede, doogo uyitinoontensa. Magani'ne Kaaliiqi insa aana qeelle uyino'ne» yee hajajinsa.

²⁰ Shiimu manni callu katammansara noo huxxi kinnannihu giddo maaxame reyotenni gatirono, Iyyaasunna Israeelete manni, gattinore baalanka gorrite guddu.

²¹ Hakkunni gedensaanni, Iyyaasu manni baalunku keerunni hige isi hee'rannowa Maqeda dayi. Kunninni kainohunni, hatte gobbara Israeeloota seyatannohu mittuno dino.

²² Hakkunni gedensaanni Iyyaasu, «Godu xullicho fantine fushshitine hakkore ontenka mootoolla anewa abbe» yee hajaji.

²³ Kunni daafira, goda fanne hakkore 5 Yerusaalamete, Kebirooni, Yarmuuti, Lakiishinna Egilooni mootoolla fultanno gede assini.

²⁴ Insa Iyyaasuwa haadhe abbitu. Iyyaasuno, Israeelete manna baalanka woshshi. Isi ledo gaaddinori urdete jajjabbi dagge lekkansa mootoollate haxo aana wortanno gede hajaji; insano, hajanjoonnisi gede assitu.

²⁵ Iyyaasu, olu roorrootira, «Kaaliiqi diina'ne baalanka, togo assannona, horonta waajjitinoonte; jawaatte! Murtenna bareende heedho'ne!» yiinsa.

²⁶ Hakkunni gedensaanni, Iyyaasu ontenka mootoolla shee, 5 dawe aana suti; reeshshinsano hawarra geeshsha hakko hosi.

²⁷ Arrishsho e'uta, mootoollate reeshsha suntoonni dabba aaninni dirrinse, albaanni maaxantu godi giddo tunganni gede, Iyyaasu hajaji. Jajjabba kinna gongo'mishshe godu xullicho cuffu; hatte kinna xaa geeshsha hakkiicho no.

IYYAASU LEDE HAAMMATA AMOORAAWOOTU BAATTO AMADI

²⁸ Hakko barra Iyyaasu, Maqeda bala tuge, mootensa qafadi; katamu giddo noo manna baala mittuno gatikkinni gudi; Maqeda mooteno alba Iyyaarko moote assino gede asse shii.

²⁹ Hakkunni gedensaanni, Iyyaasunna olantosi Maqedanni gaadde Libina katamira bala tuggu.

³⁰ Kaaliiqi qole, konne katamanna mootesi, Israeelootu angara sayise uyi. Mitto mancho nafa gatissukkinni katamu giddo noo manna baalanka bisetenni shite guddu. Mooteno albaanni Iyyaarko moote assitunte gede assite shitu.

³¹ Hakkunni gedensaanni, Iyyaasunna olantosi Libina gaadde, Lakiishi katama gaangeessite bala tuggu.

³² Kaaliiqi olu kaihunni layinki barra, Israeelootu Lakiishi qeeltanno gede assi. Libina assitunte gede katamu giddo affu manna baala shite guddu.

³³ Hatte yannara, Gezeeri moote Hooraami Lakiishi kaa'lara daye no. Kayinnilla, Iyyaasu isonna olantosi qeeli. Insa giddonnino, reyikkinni gatinohu mittu nafa dino.

³⁴ Qolteno Iyyaasunna olantosi Lakiishinni gaadde Egilooni gaangeessite bala tuggu.

³⁵ Hakko barranni katama amaddu; Lakiishi assitunte gede manna baalanka shite guddu.

³⁶ Hakkunni gedensaanni, Iyyaasunna olantosi Egilooninni ka'e gaara fulte, Kebirooni bala tuggu.

³⁷ Katama amadde, mootenna shiimmaadda qarqaru katammara noo manna baala shitu. Iyyaasu Egilooni assinte gede katama co'o yee ba"anno gede assi. Kunni katamira reyikkinni gatinohu mittu manchi nafa dino.

³⁸ Hakkunni gedensaanni, Iyyaasunna olantosi gaadde, Debiiri katamira bala tuggu.

³⁹ Isino katama, mootesinna qooxeessisira noore shiimmaadda katamma baala amadi. Israeelootu hakkiicho noore baala shitu. Iyyaasu Debiirinna mootesi Kebirooninna Libina, qoleno mootoollansa assi gede asse qorichishi.

⁴⁰ Kunni garinni, Iyyaasu baatto gudise amadi. Ilaalaame gobba, soojjaati eelallittenna gaarrate lekkaalloonni galchimi ragaanni, wodiidoonni noo gobba halallittete geeshsha noo mootoolla qeeli. Mitto mancho nafa gatisikkinni baalanka shee gudi. Israeelete Magani Kaaliiqi uyino hajajo tenneeti.

⁴¹ Iyyaasu qeele amadino gobba, wodiidi ragaanni Qaadesi Bernenni ka'e, baaru qaccera noohu Gaaza geeshsha Geeseemi qooxeessa baala aanaho lexxite, aliyye ragaanni Gebaooni geeshsha hala'litu.

⁴² Israeelete Magani Kaaliiqi Israeelete gaaramino daafira, Iyyaasu tenne mootoollanna gashshootensa baalanka mitte hige gaadino gaadinni qeele gudise amadi.

⁴³ Hakkunni gedensaanni, Iyyaasunna olantosi baala qachansa Galgala higgu.