IYUEELI 2 - Qullaawa Maxaafa

BAGADAANOTE GEDEE KANCHAFARE

¹ Kaaliiqi barri dayinona, barruno gambisinona, Tsiyooni Ilaali aana xurumba ufuuffe! Qullaawu Ilaali'ya aana raarre! Kaaliiqi barri dayinona, baattote aana heedhannori baalu huxidho!

² Hakku barri tunsichunna limixete barraati; gomichunna dhi'mote tunsichi barraati. Lowotinna jawaata bagadaano, soodimari tunsichi gede ikkite ilaalla guggushshitanno. Bi're hundinni kayise hattoo coyi ikke diegennino; hakkunni gedensaannino dihee'ranno.

³ Albansaanni giira bubbanno; badhensaanni buwanu wala yaanno. Albansaanni baatto Edeni dargi gedeete; badhensaanni noo baatto moola halallitte gobbaati; insa giddonni gate fulannohu dino.

⁴ Uurrinsha farado labbanno; doddannohuno olu faradi gede ikkiteeti.

⁵ Ilaalu aana faradi gaarete hirbi gede, galawa ittanno giira gugeette gedenna, jawaate olaho qixxaawino manni gede qoqqobbissanno.

⁶ Albansaanni daga baala huxidhanno; mannu baalu albi shibbi yaanno.

⁷ Bagadaanote gede doddanno; olamaanote gedeno kinchu huxxa gidditanno; ka'anna kawa higgukkinni, baalunku subbe doogo amadde hadhanno.

⁸ Ku'u ko'onne dixiiwanno; mittu mittunku dirasi amade ha'ranno; diinu bagadi giddoonni higge sa'anno; ittisannonsarino dihee'ranno.

⁹ Katamu giddono qoqqobbissanno; kinchu huxxi aanaanni higge doddanno; minnano gidditanno. Mooraanchu gede masikoottate giddoonni higge e'anno.

¹⁰ Baatto albansaanni shafantanno; gorduno huxi'ranno; arrishshonna aganu tunsanno; beeddaheno xo'anno.

¹¹ Kaaliiqino olantosira belequnni hajajo uyino; olantosino batinyete. Yiinore wonshannohu isi wolqaataamohona, Kaaliiqi barrino lowo geeshsha waajjishannohona, ayi dandaannosi?

AAGINTAAWATE WOSHSHINOONNI WOSHSHATTO

¹² Kaaliiqi coyi'ranni, «Xa nafa co'o yiino wodaninni, ita aga agurtine, wi'litinanninna raartinanni anewa higge!

¹³ Wodana'ne ikkinnina uddano'ne dartinoonte» yaanno. Kaaliiqi Magani'ne shaqqadohonna maarannoho; rahe dihanqannoho. Bagamannokkihu baxillisino bati'raho; hunateno dimuddamannohona, isiwa higge.

¹⁴ Mayi afino? Miteekke Magani'ne Kaaliiqi hanqunni higannoha ikkanno; intannirinna anganniri fushshaatira ikkanno jajja, halashshe aa dandaanno.

¹⁵ Tsiyooni buudu xurumba ufuuffe! Gamba yine ita aga agurre, huucci'nanni gedeno lallabbe!

¹⁶ Mannano xaadoho woshshe; mannano gamba asse. Qullaawu xaadira manna qixxeesse; geerrano xaadisse. Oosonna qaaqquulle gamba asse; haarote adhinohunna adhantinoti holginni fulto.

¹⁷ Kaaliiqi soqqamaano qeesootu, kakkalote dargira albaanni uurrite wi'litanni, «Kaaliiqanke ballo, mannakki marari; daga mishshanninna qacifattanni, ‹Maganinsa hiikko nooyya?› yitanni, arrassitannonsa gede assitooti» yitona.

MAGANU GALAGALCHE BAATTO MAASSI'RANNO

¹⁸ Kuneeti Maganu, baattote noosi laalanni kainohunni mannasi mararanno.

¹⁹ Kunni daafira Maganu, «Kuneeti gide, haaro woyinete xajjenna ejersu zayite, duubbina geeshsha eemmo'ne. Kunni ka'a daga arrassitanno gede diasseemmo'ne.

²⁰ Aliyyenni dagganno'neta olantote biite hoole, halallittenna molo gobba widira qole shorreemmo. Albaanni nooha, Reyino Baari soojjaatihu giddo, badheenni nooha, Mediteraaniyu Baari galchimihu giddo huneemmo. Reeshshinsano hakko bowanno. Kuni duuchunku coyi ikkannohu, ki'ne aana assitino bunsheraati.

²¹ «Baatto, waajjitooti! Maganu assinohehu jawu coyi daafira, tashshi yoohena, hagiidhi!

²² Ki'ne uullate aani saadano waajjitinoonte; hossinanni qanchuwano lattino. Haqqeno laaltino; balasenna woyinete laalono lowo geeshsha hala'litino.

²³ «Ki'ne Tsiyooni gosa, Magani'ne Kaaliiqinni tashshi yoo'nena, hagiidhe. Isi taashshe, bashsho gede badheessinna hawadi xeena, ikkanno geeshshiha uyino'ne.

²⁴ Ayiddummete gidu wo'manno; haaro woyinete xajjenna ejersu zayite, huuncinanni kooffichuwara wo'mite lolakkanno.

²⁵ Ani sa'u dirrara soommoti, bati'ra bagadaano, kanchafaru biite guddinota, jiro'ne qoleemmo'ne.

²⁶ Duubbina geeshsha ittinannita, lowo sagale afidhinanni. Lowoha dhaggete coye assoommo'neha, ane Kaaliiqa Magano'ne galaxxitinanni. Manna'ya kunni ka'a saalu diamadanno.

²⁷ Israeele, ani mereero'ne noommota, ani callu Magano'ne ikkoommotanna, ane ka'a wolu Magani nookkita, hatte yannara affinanni. Manna'ya kunni ka'a saalu diamadannonsa.

KAALIIQI BARRA

²⁸ «Kunni gedensaanni Ayyaana'ya, mannu baalunku aana duneemmo. Ooso'ne labballunna seennu himana coyidhanno. Geerri'neno haaqee haaqii'ranno. Aju manni'neno ajuuja afanno.

²⁹ Hattonni hakka waro, labbaanna meya soqqomaano'ya aana, Ayyaana'ya duneemmo.

³⁰ «Gordohonna baattote aana, dhaggete coye leellisheemmo. Mannu mundeenna giira la"anno; wiliileno tunni yitanno» yaanno.

³¹ Jawunna waajjishannohu Kaaliiqi barri dayikkinni, arrishsho tunsitanno; aganuno mundeete soorramanno.

³² Kaaliiqi su'ma woshshannohu baalu gatanno. Kaaliiqi coyi'rinonte gede Tsiyooni Ilaalinninna, Yerusaalametenni xagichu fulanno. Kaaliiqi doorinonsarino gattanno.