ISAYAASI 8 - Qullaawa Maxaafa

KAALIIQI ISRAEELE ASOOROOTUNNI QORICHISHI

¹ Kaaliiqi, «Mitto jawa boncoonni kincho haadhe, ‹Maheeri-Shalali-Hashi-Baazi› yite jajjabba fidallanni borreessi.

² Lame ammanantinore qeesicha Ooriyooninna Beraakiyu beetto Zakkaariyaasi naqaashshe assite kiiri» yiie.

³ Shiima yanna gedensaanni himanaancho galte'ya godobbe labbaa beetto iltu. Kaaliiqino, «Su'ma, ‹Maheeri-Shalali-Hashi-Baazi› yite fushshisi» yiie.

⁴ Qaaqquno, «Annaanna» woy «Amaama» yee woshsha dandaara albaanni Demaasiqote jironna Samaariyu qiniite baala Asoori moote adhanno.

⁵ Kaaliiqi layinkimeeshshono,

⁶ «Tini gosa konne ga'labbicha Selehoomi Waa agurte moote Retsiininna moote Faaquhe hoode hadhino.

⁷ Kunnira ani Asoori moote wolqaataame olantosi ledo Yihudu aana kayiseemmo. Olantosino wo'me dayino Wayi Efiraaxisihu gede ikkite tintanno.

⁸ Wolqatenni lolahe Yihudu gobba eanno; baalanka coye egemme kokke iillanno» yiie. Ikkollana Maganu ninke ledo no; lukkicho caacurrese qoolisenni hanqaffe gatissannohu gede, isino baattonke hatto asse agaranno.

⁹ Ki'ne daga, mimmito'ne olaho lassidhe! Ki'ne xeertote gosa macciishshe! Olaho qixxaabbe! Qeelama'ne kayinni digattannote. Olaho qixxaabbe! Qeelama'ne kayinni digattannote.

¹⁰ Malano ma'le! Heddinoonniri kayinni di"ikkanno'ne. Hasidhini gede qixxaabbe! Maganu ledonke noo daafira hedo'ne diwo'mitanno.

KAALIIQA WAAJJE

¹¹ Kunni manni hoode ha'reemmokki gede Kaaliiqi wolqaataame angasinni amadie yannara,

¹² «Manni'ya kunni manni gano ledo xaadoonke; insa yitannore baala waajjoonke; masoonke!

¹³ Ani Olantote Mootichi Kaaliiqi qullaawa ikkoommota hawoonke; waajjinannihu ane callaati.

¹⁴ Ani qullaawa qiishooti; ikkollana Yihudunna Israeelete mannira woshshaadonna gufidhanno kincho ikkeemmonsa.

¹⁵ Insa giddonni haammatu gufidhe ubbanno; ubbe hiiqqaqqantanno; woshshaadotenni amadantanno» yiie.

ISAYAASI ROSAANOSI QOROPHISIISI

¹⁶ Isayaasino, «Ki'ne ane rosaano, Kaaliiqi uyinoe sokkanna seera seekkitine macciishshe.

¹⁷ Albasi Yaiqoobi mininni shawwu assiha ikkiro nafa, Kaaliiqa agadheemmo; isolla hexxeemmo.

¹⁸ Kuneeti, Tsiyooni Ilaalira hee'rannohu Olantote Mootichi Kaaliiqi, anenna uyinoe ooso Israeelete malaatenna qorophishiishsha asse soyinonke» yii.

¹⁹ Mannu, «Lollobbitanno kiilaano, masaalaanonna ekera hasaawissannore mala xa'midhe» yaanno'ne. Mannu Kaaliiqa agure reyitinorinni mayira ma'lanno?

²⁰ Kunni mannira Kaaliiqi Seera kulle! Insano Kaaliiqi qaali garinni coyi'ra hoogguro illetenni xawaabba diaffanno.

²¹ Mannu hexxo mudhe mullawa raataawanno. Hudi'rino daafira iima hige la"anni mootensanna Maganonsa xonanno.

²² Uulla hige la"anno woyiteno shetto, waajjishannohunna beeshshe amadanno tunsichi callu leellannonsa; insano beebbu tunsichira tugantanno.