ISAYAASI 64 - Qullaawa Maxaafa

¹ Gordo darte mayira dirra giwitto? Ilaallano ate waajjite huxidhoommero maaho!

² Giira moola haqqe ittanno woyite, woroonni kashilu waa hufisannohu gede, mannuno ate afe waajjanno gede, dirrite wolqakki diinikkira leellishi.

³ Kunni albaanni dagge ninke hendoommokkiha, waajjishanno coye assitto waro, ilaalla ate affe waajjite huxidhino.

⁴ Bi're albinni kayisse hexxitannosirira togoo dhagge assinoha, ate gedee Magano affino illenna, macciishshitino macca horonta dino.

⁵ Hisatte atera hajajantannorenna, ati hedoottore assitannore baala kaa'latto. Ninke cubbi kayinni hanqisinohe; kunnira, ganteemmohu ati kaa'littonkerootilla.

⁶ Ninke baalunku cubbunni battaamboommo; keeraanchimmankeno xure fii'noonni hoccooti. Cubbinke batinyinni kainohunni moolle, diilallo giggishshitino daro gede ikkinoommo.

⁷ Cubbinkenni kainohunni alba go'loottonkehuranna, facci assite aguroottonke daafira, su'makki ganannohunna, ate hasi'rannohu dino.

⁸ Ikkirono, Kaaliiqa ati ninkera annankeeti; ninke bushshaho. Seekkoottonkehu ateeti; ati angakkinni kalaqoottonke.

⁹ Kaaliiqa! Lowo geeshsha hanqitootinke; cubbonke hegere geeshsha giddo amaddooti; ninke baalunku mannakkiitina mararinke.

¹⁰ Qullaawa katammakki mulla darga ikkitino; Yerusaalameno ona ikkitino.

¹¹ Akaakkanke ate guwisidhannohu, Qullaawunna xumu Minikki giiramino; illete biifinori baalu diigame baino.

¹² Kaaliiqa, kunni garinni qarrammanna la'e, mamari geeshsha sammi yite quwa sayisse qorichishattonke?