ISAYAASI 62 - Qullaawa Maxaafa

TSIYOONIHA HAARO SU'MA

¹ Keeraanchimmase soodo xawaabbi gede warri yita geeshshanna, gatoseno qansoonni caabbichi gede ikkite xabba geeshsha, Tsiyooni daafira sammi diyeemmo; Yerusaalamete daafirano digoxeemmo.

² Daga keeraanchimmakki la'anno; mootoollano ayirrinyekki affanno. Ateno Kaaliiqi fushshinohehunni, haaru su'minni woshshinannihe.

³ Maganikki Kaaliiqira ayirrinyu ba'lattonna mootimmate worraaqqa ikkatta.

⁴ Kunni ka'a, «Hambe Agurroonnite» diyinannihe; baattokkino, «Onate» diyinanni. Haaru su'mikkino, «Kaaliiqi Hagiidhinosete» yinanniha ikkanno; Baattokkino, «Galte Afidhinote» yinanni. Kaaliiqira atenni tashshi yaannosi; baattokkino galte noose mancho gedeeta ikkitanno.

⁵ Seemo beetto adhanno qeedhichi gede, kalaqinohehu Kaaliiqi atera galtekki ikkanno. Adhinohu idayichosinni hagiidhannonte gede, Maganikkino atenni hagiidhanno.

^6-7 Yerusaalame! Huxxikkira hashshanna barra goxxannokki agaraasine woroommo; ki'ne Kaaliiqa huuccidhinanniri, Isi Yerusaalame safa geeshshanna, gobba baalate egennantinota assase geeshsha fooliishshidhinoonte; isirano fooliishsho uyitinoonte.

⁸ Kaaliiqi uyino hexxo wolqasinni wonshara, «Kunni ka'a jajjakki diinikki di"itanno; daafurte loosi'roottata haaro woyinete xajjekki allaggu diagganno.

⁹ Laashshidhinoonni jajja ki'ne umi'ne ittine, ane Kaaliiqa galattinannie. Gamba assidhinoonni hunduruurrota woyinete xajje, Qullaawu Nafari'yara ofoltine agginanni» yee xaari.

¹⁰ Waalchu widoonni higgine sa'e; mannahono doogo biddi asse. Hala'lado doogo seekke; kinnano hoolle. Dagateno baandira gotti assitine leellishshe.

¹¹ Kaaliiqi daga baalate, « ‹Tsiyoonira, gatisaanchikki daanno; mannaho aanno ba'raa'rino angasi no› yitine kulle» yee lallawi.

¹² Hatti dagano, «Kaaliiqi Wodinoti Qullaawa Gosa» yitanno'ne; Yerusaalameno, «Maganu Baxinosetenna Agurinosekki Katamaati» yitanno.