ISAYAASI 6 - Qullaawa Maxaafa

KAALIIQI ISAYAASI HIMANAANCHIMMATE WOSHSHISI

¹ Moote Ooziya reyi diro, Kaaliiqa ayirrinyunni gaamaare ayirradu baarcimi gashshootunnihura ofolle nooha afoommo; uddanosi handaari Qullaawa Minesi wo'me no.

² Suraafeeli yinanni sokkaasine isira aleenni higge uurrite no; mittu mittunku sokkaasinchira leyu leyu qooli noonsa. Lamu qoolinni albansa, lamu qoolinni lekkansa diphitanno. Lamu qoolinni buubbanno.

³ Ku'u ku'unniwiinni haa'ranna baalunku, «Qullaawu! Qullaawu! Qullaawu! Olantote Mootichi Kaaliiqi, ayirrinyisi kalqe baala wo'mino» yitu.

⁴ Qoonqonsa lowo geeshsha naggi assite faarsitanno daafira, Qullaawu Mini hunda iille tenqe yii; wiliileno Mine wo'mitu.

⁵ Anino, «Suume battaabbinoehu suume battaawino manni ledo hee're Moote Olantote Mooticha Kaaliiqa ille'yanni afoommona baoommo! Ane hunsha!» yoommo.

⁶ Sokkaasinete giddonni mittu kakkalote darginni haa'rino kiffalcho qarawunni amade buuwanni anewa hige dayi.

⁷ Suume'yano kiffalchunni kise, «Kune kiffalchu suumekki kisino daafira, saokki aanikkinni ho'litino; cubbokkino agurroonnihe» yiie.

⁸ Hakkunni gedensaanni Kaaliiqi, «Aye soqqo? Soqqamannonkehu ayeti?» yaanna macciishshoommo. Anino, «Ani ha'reemmona, ane soqqie» yoommo.

⁹ Isino, «Hakkunni manniwa marte, ‹Aye geeshshano macciishshitine dihuwattinanni; aye geeshshano la'ine dibuuxxinanni› yite kulinsa.

¹⁰ Ati marte la'annokki gede, macciishshitannokki gedenna huwattannokki gede assi. Qolteno illensanni la'e, maccansanni macciishshite, wodaninsanni wodanchite anewa higge hurtannokki gede, wodanansa dillaawinoha, maccansa beebbinota, illensano tunsitinota assi» yii.

¹¹ Anino, «Mooticha'ya, kuni coyi mageeshshi yanna keeshshanno?» yee xa'moommo. Isino qole, «Katamma diiganteenna hee'rannohu hoogeenna gobba ona ikkite gatta geeshshaati.

¹² Manna xeerto gobba ha'riseemmo; gobbano fano ikkite gattanno.

¹³ Tonnu giddonni mittu manchi gatiro nafa, jajjabba haqqe karreenna gatanno cifichi gedeeha ikkanno; gatino cifichi qullaawa wixa ikkanno» yiie.