ISAYAASI 57 - Qullaawa Maxaafa

KAPHU MAGANNA MAGANSIDHINO DAAFIRA KAALIIQI ISRAEELETE HANQI

¹ Keeraano reyitanno woyite mayira reyitinoro wodanchannohu dino; Kaaliiqi daggara noo bushanni gatisansara haa'rinonsata buuxannohu dino.

² Halaalaancho heeshsho heedhinori, reyitanno waro, keerenna fooliishsho afidhanno.

³ Kaaliiqi, «Ki'ne bitidhinanniri, foortinannirinna baashaabbinanniri, kawa yoonniwa shiqqi yiiyye!

⁴ Ki'ne aye haariintinanni? Qacifattinannihunna arrassitinannihuno ayeti? Ki'ne haxawarrootanna kaphaasine di"ikkitinoonni?

⁵ «Ki'ne qilxootu giddonna lattino haqqe hunda, foorrete yortonni giirantinanni; ooso'ne laggate giddonna kinchu godira kakkaltinanni.

⁶ Laggatenni shaqqado kinna doodhitine, insa maganna assidhine magansidhinanni, agattonnihanna gidu fushshaate uyidhinanni. Ani konne coye lae sammi yeemmoha lawanno'ne?

⁷ Kakka'litinaranna foortinanni magansidhinara, seeddaanna ilaalla iimira fultinanni.

⁸ Xullichi'neranna waalchi'nera badheenni, giwissannota kaphu maganna wodhitinoonni. Ane agurtine foortinara, woxe baaxxitinoonniri ledo goxate, hala'ladu daallasi aanira sa'inanni; hakkiicho foorrennita yorto'ne gabbi assidhinanni.

⁹ Shittonna buuro buudhitine Molooki magansidhinara hadhinanni; mala kultanno'ne gede ekerranniwa sokkaancho soqqitinanni.

¹⁰ Wole maganna hoode doddinanni daafurtinoonni; ikkollana, ‹Dikaa'litinonke› yitine diagurtinoonni. Wolqa leddanno'neha laweenna'ne, cee'mitinikkinni hoodensa doddinanni.

¹¹ «Ane dogatenna hawate dandiitinihu, hiittenne maganna waajjitineeti? Waajja gibbinoonniehu, lowo yanna sammi yoommo daafiraatini?

¹² Ki'ne, ‹Ninke garaholla› yitinara dandiitinanni; ani kayinni looso'ne baala reqecci asseemmo; maganna'neno dikaa'litanno'ne.

¹³ Kaa'lote raartinanniti maganna'ne hanni dagge kaa'litossi'neyya; insa diilallo haadhe sa'annoreeti. Foolu callunni ubbannoreeti; ane hexxannohu kayinni baatto ragi'ranno; Qullaawu Ilaali'ya aanano magansi'rannoe» yii.

KAALIIQI MANNASI KAA'LATENNA HURSATE UYINO HEXXO

¹⁴ Kaaliiqi, «Seekke, seekke, doogo maxarre! Manni'ya doogo aaninni guficho hoolle!» yii.

¹⁵ Rooriidihunna wo'munkura aliidihu, hegerera hee'rannohu Qullaawu, «Ani iima qullaawa darga hee'reemmo. Qoleno umonsa heeshshi assitannorihanna saonsa aagintaabbannori wodana haaroonseemmo.

¹⁶ Ani manna'ya wo'manka woyite dibushiisheemmo; wo'manka woyiteno dihanqeemmonsa. Hatto assoommoha ikkoommero, kalaqoommo manni goofe hoogino.

¹⁷ Cubbinsanninna hagaagansanni kainohunni hanqoommonsa; hanqe alba'ya insawiinni shawwu assoommo; insa kayinni hadhanni noo doogo aaninni higa gibbino.

^18-19 «Ani loosonsa baala afoommo; ikkirono hurseemmonsa; massageemmonsa; galattannoe gede dadillitannori wodanano diggi asseemmo. Mulenna xeertote noorira keere eemmo; manna'yano hurseemmo.

²⁰ Bushuullu kayinni shafamanno baari gedeereeti; dambalu sabbanna ishine haa're fushshannota ikkinnina sammi diyaanno.

²¹ Bushuulleho keeru dinonsa» yaanno.