ISAYAASI 55 - Qullaawa Maxaafa

KAALIIQI KOYISHSHA

¹ Kaaliiqi, «Ki'ne goodhinoonniri baalu wayinniwa amme! Woxu noo'nekkiri daggine calla hidhitine itte! Daggine mittoreno uyitinikkinni, woxiweello adonna woyinete xajje hidhe.

² Kaa'litannori nookki sagalera woxe mayira fushshidhinanni? Duushshitannokki sagalera mayira daafurtinanni? Ani yeemmota macciishshitinoommero, woyyitino sagale afidhine hagiidhitinanni.

³ «Anewa higgine yeemmore macciishshe! Lubbotenni heedhinanni gede qaale'ya macciishshe. Daawitira oommota bagamannokki baxilli hexxo, ki'ne aana wonsheemmo.

⁴ Iso gaadaannanna roorricha assoommosi; isino ane daafira dagate naqaashshe ikkanno.

⁵ Ani Israeelete Qullaawi Magani'ne Kaaliiqi ayirrinye oommo'ne daafira, affinoonnikki gashshaano woshshitinanni; egentino'nekkirino namoomate rakke ki'newa dagganno» yii.

⁶ Kaaliiqa leellanno yannara hasidhe; shiqqi yee hee'reenna woshshidhe.

⁷ Bushu manchi bunshete doogonni higo; xagaraamuno xagarrosi aguro. Maarosi bati'ra ikkitino daafira cubbosi agurannosina, Maganinke Kaaliiqiwa higo.

⁸ Kaaliiqi, «Hedo'ya hedo'ne gedeeta, doogo'ya doogo'ne gedeeta di"ikkitino.

⁹ Gordu baattotewiinni iima hige xeerti'rinonte gede, doogo'ya doogo'newiinni, hedo'yano hedo'newiinni faffinote.

¹⁰ Xeenunna bullaame kaade gordunni dirrite, baatto qufisse jajja laashshitannonte gedenna, wixi'rinohura guma, itannohurano sagale uyitukkinni higgannokkinte gede,

¹¹ afii'yanni fulanno qaalino, hedoommo coyenna, soommo sokka wonshikkinni, mulla galagale anewa dihiganno.

¹² «Tidhantine fultinanni waro, gobba'ne keerunni higginanni. Ilaallanna gaarra alba'neenni faarsitanni kukkubbitanno; dubbu haqqeno anga gantanno.

¹³ Utu bayicho hoomme, qu'muudote darga uddo fultanno. Kunino ane Kaaliiqi albaanni, hegerera hambannikkiha qaaggote malaate ikkanno» yii.