ISAYAASI 54 - Qullaawa Maxaafa

KAALIIQI ISRAEELETE UYINO HEXXO

¹ Kaaliiqi, «Yerusaalame, ate alba ilaweelo manchooti yinoonnihe; xa kayinni galtesewiinni baxxite egentinokki manchonni roore, lowo ooso afi'rattaraatina hagiirrunni ilillisi.

² Dukkannakki halashshi'ri; dukkokkino ajishidhootina seedisi'ri. Siibbakkino haransidhooti; ciffakkino kaajjishi'ri.

³ Raga baala hala'latta; sirchikki daga adhitinota baattonsa qo'lanno; agurte hadhinota katammansano ragi'ranno.

⁴ «Saalu diamadannohena waajjitooti; dishollattana saalfattooti. Anjekki shollinyeno hawatta; kunni ka'a gunnittete gede minshannahe hee'ritta yanna diqaagatta.

⁵ Kuni ikkannohuno, ani kalaqaanchikki Olantote Magani Kaaliiqi, ayiddaannakkiiti. Ani gatisaanchikki Israeelete Qullaawaati; kalqe baalate Maganooti yinannie.

⁶ Shiima heedhe assidhinota, ayiddaannise fushshe huninosete gede, dadillaame ikkootta» yii. Ani Maganikki Kaaliiqi kayinni galagalche woshshe,

⁷ «Shiima yanna callichokki aguroommohe; ikkirono lowo baxillinni galagalche anewa qoleemmohe.

⁸ Lowo geeshsha hanqoommo daafira shiima yanna alba shawwu yoommohe; xa kayinni gatisaanchikki ani Kaaliiqi, marare hegere geeshsha baxeemmohe yoommo.

⁹ «Nohi yannara, ‹Layinkimeeshsho wayinni digudeemmo› yee xaarummonte gede, xaano, ‹Atera layinkimeeshsho dihanqeemmohe› yee xaareemmo; kunni ka'a dihanqeemmohe; dirufeemmohe.

¹⁰ Ilaallanna gaarra nafa shafantara dandiitanno; ani ate baxoommo baxilli kayinni hegerera kaajje hee'ranno. Keeru gondoorino didiigamanno; ate marareemmohu ani Kaaliiqi togo yoommo» yii.

HAARO YERUSAALAME

¹¹ Kaaliiqi, «Ati shetoottati, hombobolatte shaffinoheti, wodana assi'roottakkiti Yerusaalame, ani dilqu kinchinni mineemmohe; bulu dilqu kinchinni safeemmohe.

¹² Huxxikki guuto duumu dilqu kinchinni, huxxikki waalchuwa calallaqu dilqu kinchinni, gaangaawakkino gudise dilqu kinchinni huxxeemmo.

¹³ «Oosokki baala ani Kaaliiqi rosiiseemmo; oosokki keerino bati'rinoha ikkanno.

¹⁴ Halaalunna taashshate aana xinteemmohe; beebbanna gadadishshu atewiinni fafanno; waajjishannoherinna masisannoheri dihee'ranno.

¹⁵ Atera bala tuggara ka'annori, ani soommore ikkitinokkihura ubbanno.

¹⁶ «Buufe bagado tumannoha kalaqoommohu aneeti; bagado amaxxanno bagadaancho kalaqoommohuno aneeti.

¹⁷ Ate shinara seekkinanni bagadi shuffanno; yekkeertannoherira baalaho qolatta dawaro dihoogatta. Ani soqqamaano'yara golo ikkeemmonsa; qeelleno eemmonsa. Konne coye coyi'reemmohu ani Kaaliiqaati» yii.