ISAYAASI 52 - Qullaawa Maxaafa

KAALIIQI YERUSAALAME WODANNOSE

¹ Tsiyooni kai! Baqqi yii! Wolqakkino uddi'ri! Qullaawa Katama Yerusaalame, ayirrado imaanakki uddi'ri! Kunni ka'a barcintinokkirinna keeraa'mitinokkiri, huxxikki giddora die'anno.

² Qafadamoottati Yerusaalame, ka'e buko giggishshi'ri; ayirrinyu barcimira ofolli; ki'ne Tsiyooninni qafadantinoonniri, usurroonni'ne cagaage goowunni fushshitine tugge!

³ Kaaliiqi mannisira, «Borojjimmate woxiweello hirantinoonni; wondanni'nehuno woxe baantikkinniiti.

⁴ Kunni albaanni baxxine hadhine Gibitsete heedhinoonni. Asoorootuno mittoreno uyitukkinni calla adhite hadhe gadadisse gashshitino'ne.

⁵ Ki'ne manna'ya mulla adhine ha'nanna ani hige ma"asseemmo? Gashshaano ki'ne qacifattanni aneno sammi yite mishshanni xontannoe.

⁶ Hatte yannara kayinni ki'ne ani Kaaliiqa ikkoommotanna konne coyi'roommohuno ane ikkoommota affinanni» yii.

⁷ Ilaallate aana keerunnirenna gatonnire hasaawannohu, dancha duduwo duduwannohunna, «Maganikki moohanno» yee, Tsiyoonira kulanno sokkaanchi lekka hiitto biiffinote!

⁸ Kaaliiqi galagale Tsiyooni daanna, illensanni affanno daafira, agaraasinekki qoonqonsa naggi assite hagiirrunni faarsitanno.

⁹ Kaaliiqi mannisi wodana diggi assanno; Yerusaalameno gatisannose. Kunnira Yerusaalamete diigamme, mitteenni hagiirrunni faarse.

¹⁰ Maganinke Kaaliiqi daga baalate wolqasi leellishanno; gobba baalano gatisaanchimmasi la'anno.

¹¹ Ki'ne Qullaawu Mini uduunne dukkinoonniri, Baabilooninni baxxitine fulle! Batte ikkinore kisidhinoonte! Giddonsanni fultine keeraa'me!

¹² Kaaliiqi alba'neenni ha'ranno; Israeelete Magani badheenni dukkisanno'ne. Kunni daafira fultinanni woyite, muddantinikkinni suutunni hadhinanni.

SOQQAMAANCHU QARRANNA DAANNOSI AYIRRINYE

¹³ Kaaliiqi, «Soqqamaanchi'yara assannori baalu qinaannosi; lowo ayirrinyeno afi'ranno.

¹⁴ Dana soorrame manna lawannokkiha ikkino daafira, la"anno manni baalu lowo geeshsha masanno.

¹⁵ Soqqamaanchi'ya lowo daga wixe keereensanno; mootoollano macciishshite egentinokkire macciishshite, affe egentinokkire affe, afoo cu'midhe maala'litanno» yii.