ISAYAASI 5 - Qullaawa Maxaafa

WOYINETE DARGI DAAFIRA FAARSINOONNI FAARSO

¹ Ayirradu baxillaanchi'yanna, woyinete kaashshi daafira faarseemmo. Baxillaanchi'yara lowo geeshsha shaqqadu gaari aana, woyinete kaashshi noosi.

² Baatto loose, kinchono xinqe hoole, doorroonniha woyinete kaashsho kaasi'rino. Agarranni shae ganino; woyinete laalo huuncinanni kooffichuwano ume seekkino. Hakkunni gedensaanni dancha guma laaltanno yee agadhino; ise kayinni qaraaranno guma calla laaltino.

³ Kunnira baxillaanchi'ya, «Ki'ne Yerusaalametenna Yihudu manna, woyinete kaashshi'ya darginna, ane mereero noo coyira hanni yoo yiiyye!

⁴ Ani kunni dargira assoommokkiri nooni? Asseemmori gatinoni? Dancha guma laashshanno yee agadhe hee'reenna, qaraaranno guma mayira laashshieyya?

⁵ «Kunni ka'a woyinete darga asseemmota kulo'ne? Gaangaawisira noo huxxa buqqise hoole, qiishosino diigeemmo. Moyichu hosannowanna kakkadannowa asseemmo.

⁶ Hakkunni gedensaanni woyine'ya diquuxeemmo; giddono dilooseemmo. Kunnira woyine ishinu, kokko'lunna utu egemmanno gede asseemmo. Xeena ganannokki gede gomicho hajajeemmo» yii.

⁷ Kuni Olantote Mootichi Kaaliiqihu, woyinete dargi Israeelete mannaati; Yihudu mannino isi kaasi'rino woyineeti. Isi keeraanchimma assitanno yee agadhe hee'reenna, insa kayinni shitannore ikkitino. Taashshitanno yee hede hee'reenna, manna gadadisse raashshiishshino.

MANNA BUNSHESI DAAFIRA QORICHINSHANNI

⁸ Gobbate ki'ne calluwu heedhinanniha laweenna'ne, noo'ne baatto aana lexxate manna shorritine mine minu ledo xaadisatenna gate gatu ledo mitto assate hasidhinannirira ki'nera aanne'e!

⁹ Kune Olantote Mootichi Kaaliiqi, «Tini biiffinoti jajjabba minna baala diigante ona ikkitanno; galanno mannino dihee'ranno.

¹⁰ Tonne siiwora kaansoonni woyine 8 litire calla ikkitanno. 150 kiilo gide winxeenna 15 kiilo calla ka"anno» yii.

¹¹ Dimbitara yite gutte agu minira hadhannoriranna giddo bubbansa geeshsha agu mine hashshiishidhannorira aanne'e!

¹² Agattonsa yannarano maasinqonna bagana dibbenna suusulle shiqqi assidhanno. Kaaliiqi assino coye mittono diwodanchitanno.

¹³ Wodancha hoogansanni kainohunni ki'ne manni'ya qafadantinanni; ayirradda hude guddanno; mannano goo'ro shitanno.

¹⁴ Jeennaatu egemmansara afoo fa'ne agare no; ayirraddanna cancanni xelleqqisannoha mannansa baala egemmara agare no.

¹⁵ Mannu baalunku saalfate umo heeshshi yaanno; boonaleeyye shollitanno.

¹⁶ Olantote Mootichi Kaaliiqi kayinni yoo taashshasinni ayirranno. Qullaawu Magani halaalaanchimmasinni ewelummasi egensiisanno.

¹⁷ Ge'reewu minu diigamino darga hayisso itanno; meuno hakkiicho hosanno.

¹⁸ Dogate siiwonni cubbo, faradi gaarete siiwonni xagarro goshooshshannorira aanne'e!

¹⁹ «Hanni la'neemmona Kaaliiqi assannore rahe diassannoyya? Hanni anfeemmona Israeelete qullaawa ikkinohu hedinore rahe assossiyya!» yitinannirira baalaho aanne'e!

²⁰ Busha, danchaho; dancha bushaho; tunsicho xawaabbaho; xawaabba tunsichoho; qaraarannoha coommannoho; coommannoha qaraarannoho yitannorira aanne'e!

²¹ Insanaa busullaaddanna egennaamma assite kiirtannorira aanne'e!

²² Woyinete xajje agate bareeddaranna dimbissanno agatto karsiisidhanno worbootira aanne'e!

²³ Gubbo itte sao assinoha keereensite, gawajjamino manchi halaale dawissannorira aanne'e!

²⁴ Israeelete qullaawa ikkinohu Olantote Mootichi Kaaliiqi uyino seeranna rosiisino woga shotissinohura, giira ittanno galawinna moola hayisso gede insahuno hundinsanna rumushshinsa fugude ba"anno; daraaronsano bukote gede ikkite ba'anno.

²⁵ Kaaliiqi mannisira lowo geeshsha hanqino; qorichishansara anga kayise no; ilaalla shafantanno; mannu reeshshi ishinu gede doogga baalate uwanno. Tenne giddoonni Kaaliiqi hanqi diqiidanno; xaano qorichishansara qixxaawe no.

²⁶ Kaaliiqi wole daga xeertotenni woshshate malaate uurrisanno; baattote qacce baalatenni fiiqattotenni woshshanno; insano muddantanni rakke dagganno.

²⁷ Insa giddo daafurinohunna gaggawinohu dihee'ranno. Mugannohunna goxannohu dino; qodhonsa ditidhantanno; caaminsa usuraanchino dita"anno.

²⁸ Maxxinsa qaraamoho; digaaninsa gonninoonniho; faradinsa kotte reeqqiichote gedeete. Faradi gaarensa lami-qale hombobottete gede diiddo ga'nitannote.

²⁹ Olantonsa, shorre amadinoricho afiisinni karara dandaannohu nookki doobbiichi gede ittantanno.

³⁰ Hatte yannara, baaru dambali gede gugganni Israeelete manni aana dagganno. Baatto la'anno woyite tunsichunna qarru gaangeesse noonsaha lawanno; gomichu xawaabba egemme tunsiisanno.