ISAYAASI 49 - Qullaawa Maxaafa

ISRAEELE GOBBATE CAABBICHOHO

¹ Ki'ne giddichuwate heedhinanni gosa macciishshe"e! Xeerto gobbara heedhinannirino wodanche. Kaaliiqi ilamammora albaanni woshshinoe; ama'ya godowi giddo hee'reennanni doorinoe.

² Arrawo'ya bisete gede gamaxaminoha assino; angasi caalira woroonni maaxinoe; qunxoonni maxxi gede kou giddo worinoe.

³ Isino, «Israeeli! Ati anera soqqamaancho'yaati; atenni kainohunni mannu baalu ayirrisannoe» yiinoe.

⁴ Anino aneneera, «Beebba daafuroommo; kaa'lannori nookkirira haafa wolqa'ya guxxoommo. Ikkirono ane coyi Kaaliiqi anga no; daafuri'yara uyinannierino Magani'yawa no» yoommo.

⁵ Kaaliiqi ama'ya godowi giddo hee'reennanni doorinoe; billaallinoha Yaiqoobi sircho Israeelete manna gamba asseemmo gede, soqqamaanchosi assi'rinoe. Kaaliiqi albaanni ayirrinye afi'roommo; Magani'yano wolqa ikkinoe.

⁶ Kaaliiqi, «Galagalchite Yaiqoobi ilamaha ayirrinyensa qolatenna, gatinoha Israeelete manna wodate, soqqamaancho'ya ikka calla di"ikkitino. Hakkiinni roore gatisaanchimma'ya, gobbate qacce geeshsha iillishatto gede, daga baalate caabbicho asseemmohe.

⁷ «Daga mishshinohehuranna gibbinohehura, gashshaanote soqqamaancho ikkoottohura atera, ani gatisaanchu Israeelete Qullaawi Kaaliiqi yeemmore macciishshi: Ani Maganikki Kaaliiqi assoommohere affe, mootoolla ate ayirrisse ofoltinowiinni ka'anno; gashshaanono ate ayirrisse umo heeshshi yitanno» yii.

YERUSAALAMETE KATAMI LAYINKIMEESHSHO MINAMANNO

⁸ Kaaliiqi, «Ani baxoommo yannara huuccattokki macciishshoommohe; gatote barrano kaa'leemmohe. Galagalchite gobba dhaawatto gede, diigantinota dargase qolatto gede, ate widoonni hige daga baalate ledo gondooro e"eemmo.

⁹ Atino usuranyoota, ‹Amme fultine hadhe!› Tunsichoho noore, ‹Xawaabbunniwa amme!› yaatto. Doogga baalate sagale ittanno; mullichu gaari aana intanni sagale afidhanno.

¹⁰ Mararannonsahu wayi buicho widira qole haa're ha'rannonsa daafira, hudenna goo'ro diamaddannonsa; halalli fooggalinna arrishshote iibbilli digawajjannonsa.

¹¹ «Manni'yara ilaalla taashshe doogo fushsheemmo; ha'ranno doogono qixxeesseemmo.

¹² Kune manni'ya xeerto gobbanni daanno; aliyyenninna galchiminni, qoleno wodiidinni Asiwaani yinanni kataminni higanno» yii.

¹³ Kaaliiqi mannasi diggi assanno daafiranna, shettinoreno mararanno daafira, gorduwa, faarse! Baatto, tashshi yoohe! Ilaalla, ilillisse!

¹⁴ Yerusaalamete manni kayinni, «Kaaliiqi agurinonke; hawinonke» yiino.

¹⁵ Kaaliiqi qole, «Ama qansidhannoha qaaqqose habbannoni? Iltino qaaqqo dimarartanno? Ise habbara dandiitanno; ani kayinni horonta dihaweemmo'ne.

¹⁶ Yerusaalame, ani ate anga'ya hoowira borreessoommohe; huxxakkino wo'manka woyite qaageemmo.

¹⁷ Oosokki galagalte higganno; diigginoheri fulte xooqqanno.

¹⁸ Haxo gotti yite gamba yee daanni nooha mannakki lai; halaali'ya afanna, ‹Mannikki daye giddokki seesa ikkannohe; idayichote gede irridhe biifatta› yoommo.

¹⁹ «Diigante mulla darga ikkittaro nafa, xa galagale higannohu mannikki wo'me ruukkamanno; diigginoherino atewiinni xeertidhe hadhanno.

²⁰ Qafadote yannara ilantinoti oosokki, ‹Dargu ruukkinonkena hee'neemmoha hala'lado darga uyinke› yitannohe.

²¹ Hakkunni gedensaanni wodanikkinni, ‹Ani ile hee'renni ilaweelo ikkoommate; qafadame ha're manniweele hee'roommate. Tini ooso maminni daggute? Ayi ile uyinoete? Lossinonsahu ayeti?› yaatta» yii.

²² Mootichu Kaaliiqi, «Daga oosokki labballonna seenne, qotinsara dukke abbitannohe gede malaate eemmonsa.

²³ Mootoolla annuwa ikkite lossitannonsa; mootete meentino amate gede awuutannonsa. Aterano borojju gede umo heeshshi yee kumbuule, lekkakki buko laaxanno; kunninni ani Kaaliiqa ikkoommota afatta; ane hexxitannori disaalfattanno» yii.

²⁴ Bareedu anganni horro qolle anfannini? Kaajjadu anganni qafadaminoha gatinse dandiinannini?

²⁵ Kaaliiqi kayinni, «Bareedu anga noo horri higanno; kaajjadu qafadinohuno gatanno; anino qassannohere qaseemmo; oosokkino gatiseemmo.

²⁶ Gadadissannoheri mimmitonsa shitanno gede asseemmo; insano uminsa mundee agge dimbitanno. Hakkunni gedensaanni ani Kaaliiqi gatisaanchokki ikkoommota, wolqaataamo Israeelete Magano ikkoommota daga baala affanno» yii.