ISAYAASI 48 - Qullaawa Maxaafa

KAALIIQI ALBILLITTE IKKANNO COYE AFANNO MAGANOOTI

¹ Israeeli su'minni woshshinanni'neri, Yaiqoobi sirchinna Yihudu ga're, Israeelete Magano magansi'neemmo yitinanni, Kaaliiqi su'minni xaartinanni. Ikkollana yitinoonni coye halaalunninna keeraanchimmatenni diwonshitinanni.

² Ki'ne, «Qullaawu Katamira hee'neemmo; Olantote Mooticha Israeelete Magano hexxineemmo» yitine adawadhitinanni.

³ Kaaliiqi Israeelete, «Ani albillittete ikkara noore, bi'renni balaxe coyi'roommo; kunino rahe ikkanno gede assoommo.

⁴ Ki'ne higginannikkiha mokkookkitine, haxo siwiilu gede kaajjitinoonnire ikkitinoonnita afoommo.

⁵ Konne coye baalanka albanni balaxe kuloommo'ne; hatto assoommohuno, ‹Magannanke togo assitino; haqqunnitinna siwiilunniti misillanke konne coye heddino› yitine naaxxitinannikki gedeeti.

⁶ «Ani coyi'roommore macciishshitinoonni; kuni coyi wo'minotano affinoonni. Kunni ka'a go'le keeshshinoha, affine egentinoonnikkiha haaro coye kuleemmo'ne.

⁷ Kuni coyi xaalla kalaqaminoho ikkinnina albiha di"ikkino; ki'ne, ‹Albanni egenninoommoho› yitinannikki gede, kunni albaanni horonta macciishshitine diegentinoonniho.

⁸ Ani yeemmore dimacciishshitinanni; affinarano dihasidhinanni. Bi're hundinni kayissine macciishsha gibbinoonnireeti; ilantini barrinni kayissine ki'ne haxawarrootanna, maahoyye gibbinoonnire ikkitinoonnita egennoommo.

⁹ Su'mi'yara yee hanqo'ya keeshshiisheemmo; galati'ya daafira yee hanqi'ya gudanno'nekki gede ittiseemmo.

¹⁰ Birra giiratenni daashshinannihu gede, ki'neno qarru giiranni daashshoommo'ne; ikkollana mittoreno tidhitinoonnikkire ikkitinoonnita buuxoommo.

¹¹ Ani ane umi'ya daafira yee konne coye asseemmo; su'mi'ya mishamara dihasi'reemmo; ayirrinye'yano woleho sayise dieemmo» yii.

KAALIIQI ISRAEELE WOLASSATE QIROOSI KAYISI

¹² Kaaliiqi, «Woshshoommo'neri Yaiqoobi ooso Israeele, macciishshe! Maganu ane callaati; albihuno gedensihuno aneeti.

¹³ Ani baatto xintoommo; gorduwano diriirsoommo; woshsheemmonsa woyite dagge alba'yaanni uurritanno.

¹⁴ «Ki'ne daga baala gamba yitine macciishshe! magansi'nanni misilla giddonni konne coye balaxe cayi'rinohu ayeti? Ani Kaaliiqi doodhoommohu Baabilooni aana hedinore assanno; Baabiloonootaho wolqasi leellishanno.

¹⁵ Ani coyi'roommosi; woshshoommosihuno aneeti; ani haa're abbeemmosi; loosanno loosono qineesseemmosi.

¹⁶ Anewa shiqqine yeemmore macciishshe! Bi're hundinni kayise mittoreno gole dicoyi'roommo; kuni coyi ikkinkunni ani hakkiicho noommo» yii. Xaano kune ane Mootichu Kaaliiqi, Ayyaanisi ledo soyinoe.

KAALIIQI MANNISIRA HEDINO HEDO

¹⁷ Gatisanno'nehu Israeelete Qullaawi Kaaliiqi, «Woyyanno'nere baala rosiiseemmo'nehunna, hadhinanni doogo kuleemmo'nehu Magani'ne Kaaliiqi aneeti.

¹⁸ Hajajo'ya seekkitine macciishshitinoonniha ikkoommero, keeru moolannokki wayi gede, keeraanchimmano baaru dambali gede ikkite heedhanno'ne.

¹⁹ Sircho'neno baaru shaafi gede batiseemmo; co'o yee goofannokki gede agareemmo.

²⁰ «Baabilooninni fultine xooqqe; ‹Kaaliiqi soqqamaanosi Israeele gatisino› yitine, hagiidhitinanni lallabbe; gobba baala macciishshitanno gede asse.

²¹ Halallitte gobba giddoonni qole, haa're ha'rummo'ne waro waa digoodhinoonni. Kincho dhoose waa fushshoommo'ne; kincho dare waa lolaasoommo'ne» yii.

²² Qoleno Kaaliiqi, «Bushuullu keere diafidhanno» yaanno.