ISAYAASI 47 - Qullaawa Maxaafa

BAABILOONI UWA

¹ Kaaliiqi qole, «Ati seyante egenninoonnihekkiti Baabilooni seemo, ayirrinyu barcimikki aaninni dirrite, bukote aana ofolli; kunni ka'a xummekkinna biinfillikki dihee'ranno.

² Xaate daamma haadhe gide daahi; guggu'loottaricho hoo'li; imaanakki saaqidhe sarawakki leeltanna, waa tayisse fuli.

³ Mannu baalu mullimmakki la"anno; teedikkino leellanno; ani mittono gatisummokkinni baalanka qorichisheemmo.

⁴ «Gatisaanchinke Olantote Mootichaati; su'misino, Israeelete Qullaawaati.

⁵ «Ati Baabilooni, sammi yite tunsichoho ofolli; kunni ka'a, Gaashshaanote Mootitte yine diwoshshinannihe;

⁶ Ani manni'yara hanqoommo; insa battete gede kiire, angakkira sayise oommo. Ati kayinni dimararoottansa; geerraho nafa ayirrino duha duhisiisootta.

⁷ ‹Ani hegere geeshsha moohe hee'reemma› yootta; assoottare mittoreno diqaagootta; kunni baalunkura gawalo mamaatiro diafootta.

⁸ «Ati wodanikkinni, ‹Ane gedeehu dino› yite, atenee Maganu ledo taashshootta. ‹Galtiweelo di"ikkeemma; woy ilaweelono di"ikkeemma› yite, bashshi assattakkiha hawaqidhe hee'rattati, konne coye macciishshi!

⁹ Mitto barra kuni lamunku coyi, hedeweelcho aanakki daanno; aye geeshsha kiilsiisi'rittaronna masaalsiisi'rittaro nafa, galtekkinna oosokki hoogakki digattannote.

¹⁰ « ‹Afannoehu dino› yite, bunshekkinni naaxxootta; hayyokkinna egennokki so'risiissinohe; atenee Maganu gede assite kiirootta.

¹¹ Ikkollana masaa'lite hoo'lite afattakkihu bushu coyi aanakki daanno; gargadhite afattakki qarri amadannohe; hedeweelcho bao xaaddannohe.

¹² Hanni anjekkinni kayisse rosoottata, bitakki, gojokkinna kiilokki cu'mi'ri; miteekke shiimare kaa'lannoheha ikkannona, woy diinakki waajjishiishi'rattana.

¹³ Ma'lootta mali baalu daafursannoheta ikkinnina, mittoreno diledannohe; hanni aganu aganunkunni ayyaana la'annore abbidheenna, albillittete daara noo qarrano kulte gatissossiheyya!

¹⁴ «Hakkore mala xa'mi'rattare, giira galawu gede assite ittannonsa; insanaa buwanuwiinni gatisidhe diaffanno; galawahono giwaa'nanni kashili dihee'ranno.

¹⁵ Anjekkinni kayisse kiilsiisi'rattarinna masaalsiisi'rattari ma kaa'litinohe? Baalunku so'ronsa ledo heedhanno; gatisahera dandaannohu mittuno dino» yii.