ISAYAASI 44 - Qullaawa Maxaafa

KAALIIQI CALLISI MAGANOHO

¹ Kaaliiqi, «Doodhoommohehu soqqamaanchi'ya Yaiqoobi, macciishshi!

² Amakki godowi giddo kalaqoommohehunna, kaa'leemmohehu Kaaliiqi aneeti; Yaiqoobi ati soqqamaancho'yaatina waajjitooti; Yishuruuni, dooroommohehu aneetina massooti.

³ «Goodhino baattora waa eemmo; moola baattorano xashshu lolahanno gede asseemmo; oosokki aana Ayyaana'ya duneemmo; oosokki oosorano maasso lolaaseemmo.

⁴ Insano waa duubbino hayisso gedenna, daraame wayi gami haqqicho gede lattanno.

⁵ Ane magansidhanno; manna'yano ikkitanno; su'ma'yano angansara borreessidhanno; ‹Ninke Maganu mannaati› yitanno» yii.

⁶ Olantote Magani Israeelete moote gatisaanchu Kaaliiqi, «Albihuno gedensihuno aneeti; ane agurranna wolu Magani dino.

⁷ Ane gedeehu nooni? Hanni nooha ikkiro coyi'rossi; Hanni noosi taje shiqishi'rossi. Manna'ya kalaqummonkunni kayise ikkinori maati? Albillittete ikkara nooreno afinoro coyi'rossi.

⁸ Ki'ne waajjitinoonte; bi're hundinni kayise balaxe dikuloommo'ne? Hanni ane gedeehu ayeti? Ki'ne anera naqaashshe'yaati; ane agurranna wolu Magani nooni? Ane ka'a golo ikkannohu nooni?» yii.

KAPHU MAGANNA MAGANSI'RA HAAFAHO

⁹ Kaphu maganna bocce seekkitannori haafaho; daafurte seekkidhannoti misillansano mullareeti. Insa magansidhannorino ballootanna egenno afidhinokkire ikkitino daafira shollinyu amadannonsa.

¹⁰ Mannu mittoreno kaa'litannokki misile seekki'rannoni?

¹¹ Insa magansidhannori baalu saalfattanno. Woloota ikkitukkinni magansi'nanni misilla boccannori, baalunku gamba yite yoote darga uurrito. Baalunku waajjitanno; saalfattanno.

¹² Siwiila tumannohu magansi'nanni misilla seekkate siwiila giiratenni daashshanno. Siwiila madooshunni gane taashshanno; konne looso loosanno woyite hudi'ranno; goo'ranno; daafuranno.

¹³ Haqqa darannohu balaxe somanno; qoleno akeekanno; xafe hifa aaninni hoole taashshanno. Suude manna lawannoha asse seekke masse galmaho woranno.

¹⁴ Konne seekkate dubbunni dagucho, qilxonna waaddicho karanno; woy kayinni hooncho kaasi're waa hayikkisanni lossanno.

¹⁵ Mannu haqqa kare giire giwaa'ranno; sagale qishi'ranno; magansi'nanni misilla seekki're insa magansi'ranno.

¹⁶ Gamatenni sagale raisi'ranno; maalano du'rishi're duuwe itanno; giwaa're kae, «Hashshu, giira hiitto iibbitino!» yaanno.

¹⁷ Gatinohano boce magansi'nanni misile seekki're isera kumbuulanni, «Ati magano'yaatina gatisie» yaanni huucci'ranno.

¹⁸ Hattoo manni mittoreno afannokki gede wodananna ille beewinoho.

¹⁹ «Haqqa kare gama giidhe sagale raisi'roommo; maalano du'rishi're itoommo; gatinoha boce magansi'nanni misile seekki're xa isera kumbuulammoraati?» yee hedannohu nafa dino.

²⁰ Hattoo manchi buluulo itanno; gowwimmasi so'risiissinosi daafira, kaa'linannisiwiinni saino; angasi noo misile magano ikkitinokkita afa didandiino.

KAALIIQI KALAQAANCHOHONNA GATISAANCHOHO

²¹ Kaaliiqi, «Israeele, ani soqqamattoera kalaqoommoheta qaagi! Anino dihaweemmo.

²² Cubbokki gomichu gede malalli asseemmo; saokkino soodo guunjo gede asse hooleemmo; gatisoommohehu aneetina, anewa higi» yaanno.

²³ Kaaliiqi mannasi Israeele gatise jawimmasi egensiisinona, ki'ne gorduwa hagiidhitinanni faarse! Baatto atino ilillisi Ilaalla, dubbunna giddo heedhinoonni haqqe baala, hagiidhitinanni kukkubbe!

²⁴ Amakki godowi giddo kalaqinohehu gatisaanchikki Kaaliiqi, «Baalankare kalaqoommohu, gordonna baatto calli'ya diriirsoommohu, ani Kaaliiqaati.

²⁵ Kaphu himanaano kultannorenna, kiilaanote kiilono mullare asseemmo. Hayyoolete hayyono diigeemmo; egennonsano gowwimmate soorreemmo.

²⁶ Soqqamaano'ya yitinori wo'manno gede, himanaano'ya coyidhinorino halaale ikkanno gede asseemmo. Insa, ‹Yerusaalame lowo manni hee'ranno katama ikkitanno; Yihudu katammano gatamarantanno; diigantino minnano galagalte minantanno› yite coyidhino coye wonsheemmo.

²⁷ Ani lowo baaranna, giddosira tintanno wayibba baala mooshsheemmo.

²⁸ Qiroosi, ‹Manna'ya gashshatto; hedoommore assatto› yeemmosi. Isino, ‹Yerusaalame galagalte minanto; Qullaawu Minino safamo› yaanno» yii.