ISAYAASI 43 - Qullaawa Maxaafa

KAALIIQI MANNASI GATISATE UYINO HEXXO

¹ Xa kayinni kalaqino'nehu Kaaliiqi ki'ne Yaiqoobi sirchira Israeelete, «Wodoommo'nehu aneetina waajjitinoonte; ki'ne anereeti; su'mi'nenni woshshoommo'ne.

² Wayi giddoonni higgine sa'inanni woyite, ani ledo'ne noommo; giddoonni sa'inanni woyite wayi diegemmanno'ne. Giirate giddoonni sa'ineennano giira di"ittanno'ne; buwanuno digudanno'ne.

³ Ani Israeelete Qullaawi Magani'ne Kaaliiqi gatisaancho'neeti; ki'ne wodate yee, Gibitse Itiyophiyanna Saaba diininsara sayise eemmo.

⁴ Ki'ne baxeemmo'nere ikkitinoonni daafira, lubbo'ne gatisate gosanna gashshootensa sayise eemmo.

⁵ Ani ledo'ne noommona waajjitinoonte; ki'ne baalanka ragu baalunni gamba asse abbeemmo.

⁶ « ‹Ooso'ya xeertote gobbanni daggona hooltinoontensa› yee, Aliyyeenninna wodiidoonni noo gosara kuleemmo.

⁷ Insa su'mi'yanni woshshantinoreetinna ayirrinyi'yara kalaqi'roommoreeti; anga'yanni seekki'roommo mannaati» yii.

ISRAEELE KAALIIQI NAQAASHSHEETI

⁸ Kaaliiqi, «Ille heedheennanni la"annokkiha, macca heedheennanni macciishshannokkiha manna'ya, yoote dargira woshshe!

⁹ Gosa baala mitteenni gamba yiiyye! Magannansa giddonni albihanna daara noo coye kulinohu nooni? Halaalaasine ikkansa egensiisate naqaashshe abbidhona; wolootuno macciishshite, ‹Halaaleho› yitona.

¹⁰ «Ki'ne Israeele, ani Kaaliiqa ikkoommota buuxxine, egentinannienna ammantinannie gede doodhoommo; soqqamaano'yaatinna naqaashshe'yaati. Ane agurranna kunni albaanni wolu magani dino; kunni ka'ano dihee'ranno.

¹¹ «Kaaliiqi ane callaati; ane agurranna gatisannohu wolu dino.

¹² Ani ikkara noore balaxe coyi'roommo; ki'ne gatisoommohu aneeti; wole maganna giddonni kaa'lino'nehu mittuno dino; Magano ikka'yara ki'ne naqaashshe'yaati.

¹³ Ani bi're hundanni Maganoho; anga'yanni ayino fulara didandaanno; ani assoommore soorrara dandaannohu dino» yii.

ISRAEELE BAABILOONINNI FULTU

¹⁴ Israeelete Qullaawi gatisaanchi'ne ani Kaaliiqi, «Ki'ne gatisate Baabiloonira gaaddanno olanto soyemmo; katamunnita huxxu waalchuwa hiiqqaqqeemmo; qeexaalansa raarete soorreemmo.

¹⁵ Ani Kaaliiqi ki'nera Qullaawa Maganooti; Israeele, ani kalaqoommo'ne; moote'neno aneeti» yoommo.

¹⁶ Alba Kaaliiqi baaru aana doogo seekkino; wayi mereero sa'nanni faro worino.

¹⁷ Faradonna faradi gaare, olantonna bagadaano baote widira haa're ha'rino; insano ka'annokki gede ikkite ubbino; uffu yineenna xoanno caabbichi gede ikkitino.

¹⁸ Xa kayinni Kaaliiqi, «Saino coye heddinoonte; albi coyeno maltinoonte.

¹⁹ Kune haaro coye asseemmo; isino xaanni mu'ranno; ki'ne diegentinoonni? Halallitte gobbara doogo, moola baattora waa fushsheemmo.

^20-21 Galata'ya kulanno gede doodhoommo manni aganno gede, halallitte gobbara waa, moola baattora xashsho lolaaseemmo waro, dubbu moyichi, yeedaalanna balguduno ayirrisannoe» yaanno.

ISRAEELETE MANNI GALATIWEELO IKKI

²² Kaaliiqi, «Ki'ne Yaiqoobi sirchi Israeele, ane su'ma gana agurtinoonni; ane magansi'ra cee'mitinoonni.

²³ Shilqote kakkalora ge'reewo diabbitinoonnie; kakkalo'nennino diayirrissinoonnie. Anino, ‹Gidu fushshaate uuyye"e› yee diqarrisoommo'ne; ‹Hixaana giirre"e› yaanni dicaacceessoommo'ne.

²⁴ Woxi'nenni tanni yee su'naanno hixaana dihirtinoonnie; woy kakkalo'ne coominni diduushshitinoonnie. Kayinnilla, cubbi'nenni duha ikkitinoonnie; sao'nennino caacceessitinoonnie.

²⁵ Tenne baalante giddoonni, cubbo'ne agureemmo'nehu Magani'ne aneeti. Konne asseemmohuno ki'ne daafira ikkikkinni, su'mi'yara yeeti; kunnira cubbo'ne dikiireemmo.

²⁶ «Hanni albi coye qaagiisse"e; yoote dargirano daggine coye'ne hasaaphe; halaalaasine ikka'neno ammansiisse.

²⁷ Albihu anni'ne cubbo loosino; rosiisaano'neno sao assite ane dadillissino.

²⁸ Kunnira Qullaawu Mini roorrootita battensa reqecci asseemmo; Israeele Yaiqoobi sirchi shollanno gedenna, gudisame goofanno gede assoommo» yii.