ISAYAASI 42 - Qullaawa Maxaafa

KAALIIQI SOQQAMAANCHO

¹ Kaaliiqi, «Irkise amadoommohu, doodhoommohunna baxeemmohu soqqamaanchi'ya konneeti. Ayyaana'ya isi aana woreemmo; isi daga baala taashshe gashshanno.

² Cance dicoyi'ranno; dooggateno qoonqosi naggi diassanno.

³ Dabbino shomboqqo nafa dihiiqqanno; ba"ara rahino caabbichono dixoyissanno; ammanamatenni taashshe gashshanno.

⁴ Baattote aana taashshe gashsha, darga amadda geeshsha, dicee'manno; hexxono dimudhanno; xeertote noo daga isi kulannore macciishshite quqquxantanno» yaanno.

⁵ Gordo kalaqe, qaccetenni qaccete geeshsha diriirsinohu, baattonna aanase noore baala kalaqe, mannahono lubbonna foole worinohu, Maganu Kaaliiqi,

⁶ «Ani Kaaliiqi keeraanchimmatenni woshshoommohe; angakkino amadeemmohe; gosate gondooro, dagate xawaabba asseemmohe.

⁷ Atino balloota ille fanatto; tunsote usurante nooreno, usuri mininni fushshatto.

⁸ «Su'mi'ya Kaaliiqaati; ayirrinye'ya gutamannohu wolu magani dino; misillano galata'ya beeqqitara dihasi'reemmo.

⁹ Kune ani balaxe coyi'roommo coyi wo'mino; xa qole albillittete ikkara noore balaxe kuleemmo'ne» yii.

GALATU FAARSO

¹⁰ Ki'ne baaru aana hadhinanniri, baaru giddo heedhinanni kalaqami baalu, Kaaliiqira haaro faarso faarse! Xeerto gobbara heedhinanniri baalu faarse!

¹¹ Halallinna halalla noo katamma baala, Qeedaari gosa heedhanno halalli baalu qoonqosi naggi asso! Seelai Katamira hee'ranno manni baalu, ilaallate iima hee're ilillisanni faarso!

¹² Insano Kaaliiqa ayirrisso! Xeerto gobbuwano galatasi lallabbe kulto!

¹³ Kaaliiqi wolqaataamu manchi gede olaho fulanno; bagadaanchu gede hanqe ka"anno; qoonqosi naggi asse alaakanno; diinasino qeelanno.

KAALIIQI MANNISIRA UYINO HEXXO

¹⁴ Kaaliiqi, «Lowo yanna cincoommo; aneneeno ittise sammi yee keeshshoommo. Xa kayinni mittore asseemmoti yanna iillitino daafira, gamaa'mitanno mancho gede, lowo geeshsha uranni noommo.

¹⁵ Ilaallanna gaarra diigeemmo; mu'ro baala mooshsheemmo; ha'ranno waa baala moola darga asseemmo; kofammano mooshsheemmo.

¹⁶ Balloota hadhe egentinokki doogo, affe egentinokki faro qole haa're ha'reemmonsa. Albansaanni noo tunsicho xawaabba asseemmo; gudaagundo ikkino darga taashsheemmo. Konne coye baalanka coyi'roommohu aneetina, wonshummokkinni diagureemmo.

¹⁷ «Misilla hexxite, ‹Ki'ne magannankeeti› yitannore, saalu amadannonsa» yii.

ISRAEELE YINOONNITA MACCIISHSHA GIBBU

¹⁸ Kaaliiqi lede, «Ki'ne macciweelootu macciishshe! Ki'ne ballootu buuxxine la'e!

¹⁹ Soqqamaanchi'yanni roore ballichu nooni? Soqqeemmo sokkaancho agurranna macciweelu wolu ayeti? Ani, ‹Kaaliiqira aamamoommo soqqamaanchooti› yaannoha agurranna ballichu hiikko no?

²⁰ Lowo coye la'inoonni; ikkollana kayinni dibuuxxinoonni; maccatenni macciishshitinoonni; kayinnilla diwodanchitinoonni» yii.

²¹ Kaaliiqi wo'manka woyite halaalaancho coye assanno; kunnira seerasi jawanna ayirrado assino.

²² Manna kayinni mulqi'nenna saamme, balete giddo cunfe agurroonni. Usuru mine beeshshine agurroonni; mulqi'ninsa; saamminsa; «Agurre» yaannohu mittuno dino.

²³ Ki'ne giddonni haja asse, dagganno yannare wodanche macciishshannohu ayeti?

²⁴ Yaiqoobi sircho Israeele, mulqi'rannohuranna saamannohura sayise uyinohu ayeti? Isi aana sao assinoommo daafira, yiino doogo ha'ra gimboommohuranna, seerasino wonshinoommokki daafira, konne coye assinohu Kaaliiqaati.

²⁵ Kunnira Waajjishanno ola soye, buwannoha hanqosi aananke dirrisino. Hanqisi giira doyissite noonke; ninke kayinni dihuwantoommo; diinowodanchinoommo.