ISAYAASI 28 - Qullaawa Maxaafa

ALIYYE GASHSHOOTIRA UYINOONNI QOROPHISHIISHSHA

¹ Shaqqadu lagichira iimaanni hige noohura Samaariyu Katamira aanne'e! Gashshaanosi agge dimbitannoreeti. Ikkollana moolte daraarote gede giggiltanno.

² Kuneeti Mootichaho: Kaadete, hombobolattetenna wolqaataamu lolahi gede cancanannohu jawaatu manchi noosi. Kuni manchino roorresinni uulla qole kaachishe tugannonsa.

³ Efireemi dimbaanoti boo'nate ba'latto lekkatenni kakkadantanno.

⁴ Shaqqadu lagichira iimaanni noohu Samaariyu Katami rahotenni ayirrinyesi hooganno. Isino giggiltanno daraaronna umo iilliteenna xinqine intanni haqqicho laalo gede ikkanno.

⁵ Hatte yannara Olantote Mootichi Kaaliiqi reyotenni gatinohura mannisira ayirrinyu ba'latto ikkannonsa.

⁶ Yoo yitannorira coye taashshate hayyo aannonsa. Katamu huxxi waalcho agartannorirano wolqa ikkannonsa.

QEESOOTAHONNA KAPHU HIMANAANORA KULLOONNI HIMANA

⁷ Qeesootunna himanaano nafa dimbite gaggabbanno. Lowota woyinete xajjenna dimbissanno agatto aggeenna wodanu soorrameenna Kaaliiqi aannonsa ajuuja nafa dibuuxxanno; ku'linanninsa coye nafa garunni coyidhe ditirtanno.

⁸ Sagale ittanno bayicho baalaho tufu wo'mino; xurinokkihu shiimu dargino dino.

⁹ Ki'ne, «Isi aye rosiisanno? Sokkano ayira kulanno? Isi rosiisanno coyi xaalla unuuna qana agurtino qaaqquullira kullanniho.

¹⁰ Isi ninkera mitte mitte fidale, mitto mitto diranna mitto mitto coye kulankeraati» yitine gunguntinoonni.

¹¹ Maahoyye aneta gibbiniro, Kaaliiqi wole gobba manni affinoonnikki qaalinni rosiisanno'ne gede assanno.

¹² Isi, «Wo'ma fooliishshonna harshammo eemmo'ne» yiino. Ki'ne kayinni isi yiinota dimacciishshitinoonni.

¹³ Kaaliiqino mitte mitte fidale, mitto mitto diranna mitto mitto coye kula'nera hedinohu kunni daafiraati. Hakka waro qaafote kiironni gufidhinanni; madidhinanni. Woshshaadotenni amadantine usurantinanni.

HAAFU HAWAQI'RA

¹⁴ Yerusaalamete hee'ranno manna gashshitinoonniri ki'ne haariimaano, Kaaliiqi yaannore macciishshe.

¹⁵ «Reyote ledo namoommoommo; jeennaatu ledo sumuu yinoommo; doga minenkeeti; kaphuno golonkeeti. Qoomamu daanno woyiteno dikisannonke» yitine boo'nitinoonni.

¹⁶ Kunnira Mootichu Kaaliiqi, «Kaajjado safote kincho Tsiyooni woreemmo. Isino ayirradohonna ammanaminoho; iso hexxannohu disaalfatanno.

¹⁷ Taashsha, bikkinanni siiwo asseemmo; keeraanchimma qole, sumbete heelliicho asseemmo. Golo assidhinoonni kapho kaade gantanno; maaxantinanniwano lolahu adhe sa"anno.

¹⁸ Reyote ledo namooma'ne gattanno; jeennaatu ledo sumuu yaa'neno ba'anno. Egemmanno lolahi daanno woyite hakkiichi gawalo'ne ikkanno.

¹⁹ Lolahu dayi kiironni adhe sa"anno'ne; wo'manka woyite hashshanna barra haa're ha'ranno'ne» yaanno. Kaaliiqiwiinni macciishshitinanni sokka baala waajjille naqqanno'ne.

²⁰ «Fiti'ne gonxannikki gede daallasu haranchoho; iillishi'ne diphinannikki gede uddano hanqatate» yinanni maammaashsha ikkanno'ne.

²¹ Kaaliiqi Peraasiimi Ilaaliranna Gebaooni Lagichira assinonte gede, anfe egenninoonnikkihanna ronsoonnikkiha loososi loosara ka"anno.

²² Olantote Mootichi Kaaliiqi gobba hunara kainota macciishshoommona haariimo agurre! Hakkunni ka'a kayinni kaajjado cagaage giddora e'inanni.

KAALIIQI EGENNO

²³ Kuleemmo'nere macciishshe; yeemmore seekkitine wodanche.

²⁴ Baatto wixahonna kaashshoho hawuurino gedeenninna duunnano cancanino gedeenni hee'rannohu nooni?

²⁵ Mitte hinge baatto shaqqishi'nanni hee'nenni afuduudanna qimame, qamade, hayixenna gardaama hattono wole jajja gari garisinni diwixi'nanni?

²⁶ Loosi'rannohura Maganisi, gara ikkino coye kulannosi.

²⁷ Afuduudanna qimame shota siqqonni ikkinnina, siwiilu dullunninna faradi gaaratenni digannanni.

²⁸ Qamadenna hayixe gannannita ikkinnina, cancanamanno gede diassinanni; faradi gaare aanaanni hadhanni nafa cancantanno gede diassinanni.

²⁹ Tenne baalanta egenno aannohu Olantote Mootichaati; isi dhaggete amaalaanchooti; egennosino guutate.