ISAYAASI 24 - Qullaawa Maxaafa

KAALIIQI BAATTO QORICHISHANNO

¹ Kune Kaaliiqi baatto diige mulla darga assanno; baattonniha dana soorre mannano billaallisanno.

² Manna baala mittu coyi amadanno; qeesootanna wole manna, gashshaanonna soqqamaanonsa, mootittenna soqqamaanchose, hirannohanna hidhannoha, liqiissannohanna liqii'rannoha, yaa'nannohanna asale itinoha mittu qarri amadannonsa.

³ Baatto mulqante mulla gattanno; kuni baalu Kaaliiqi coyi'rino coye ikkino daafira wo'manno.

⁴ Baatto moolteenna baalunkuri qoore goofanno; baattote aani jajjabbino wolqa hoogge quurtanno.

⁵ Baatto aanase hee'ranno manni batteessino; woganna seera sae, hegere gondooro diigino.

⁶ Kunnira rumo baatto huntanno; mannano saosi amaddannosi. Baattote aana noo manni goofeenna, shiimu manni callu gatanno.

⁷ Woyinete kaashshi moolino; haaro woyinete xajjeno ajjanno. Kunnira, alba hagiidhannohu baalu, xa dadillaamo ikkino.

⁸ Tashshi yaannohu, maasinqotenna dibbete luuli dihee'ranno.

⁹ Woyinete xajje aganni hagiidhannohu dihee'ranno; dimbissanno agattono qaraartanno.

¹⁰ Diigamino katami ona ikkanno; mannu eannokki gede minu baalu cufamanno.

¹¹ Woyinete xajje hoogge, doogga baalate raartanno; hagiirru horonta dihee'ranno; hisanyootu baattote aaninni ba"anno.

¹² Katamu diigame duuno ikkanno; waalchuwano hiiqqaqqante ubbanno.

¹³ Baattote aana noo gosa baalate kuni coyi ikkanno; baalunku ejersunnitanna woyinete laalo xinqi'nihu gedensaanni gatino xari gede ikkanno.

¹⁴ Baotenni gattinori hagiidhite ilillissanno; galchimaanni noorino Kaaliiqi jawimma kultanno.

¹⁵ Kunnira Soojjaatoonni noori Kaaliiqa ayirrissanno; Giddichuwate heedhannori, Israeelete Magano Kaaliiqa guwissanno.

¹⁶ Kalqe baalatenni, «Keeraanchoho ayirrinyu ikkosi» yinanni faarso macciishshinanni. Ani kayinni lowo geeshsha jaawoommo daafira, anera bayisibao! Hexxinannihu dihee'ranno; baalunku mimmitoho badhe wodhannoha ikkanno.

¹⁷ Baattote aana heedhinanniri baalu macciishshe; waajjillu, balenna woshshaado agarte noo'ne.

¹⁸ Waajjishanno luulo xooqannohu, balete giddo uwanno; balete giddonni fule xooqannoha woshshaado amaddanno; iiminni wolqaataame barada dirritanno; baattote xinti shafamanno.

¹⁹ Baatto shafante, daddadhante addi addinni fultanno.

²⁰ Baatto dimbino manchi gede gaggabbanno; hombobolatte shaffino mini gede ikkitanno; cubbise duhi ayirrannose daafira ubbanno; galagalteno dika'anno.

²¹ Hakka waro Kaaliiqi gordu wolqubbanna, baattote aani gashshaano qorichishanno.

²² Mootoolla baala gamba asse, balete giddo usuranno; lowo barri gedensaanni qorichishannonsa.

²³ Olantote Mootichi Kaaliiqi, Tsiyooni Ilaalira Yerusaalamete moohanno daafira, aganu tunsanno; arrishsho xo'anno; gashshaano baala ayirrinyesi la'anno.