ISAYAASI 22 - Qullaawa Maxaafa

YERUSAALAMETE DAAFIRA KULLOONNI HIMANA

¹ Ajuujate Lagichaati yinanni dargi daafira kulloonni sokka aante noote: Ki'ne minu aana minnoonni mini aana heedhine, ayyaana mayira ayirrissinanni?

² Katami'nera luulunna cancu wo'mino; dimbite dooggate ubbinori bagadu shiinore di"ikkitino.

³ Gashshaano'ne baala, digaana nafa alba qollikkinni, mulla ka'e xooqqanni heedhe qafadantino. Usuru mine heedhinoonniri baalu, diinu fafowa hee'reennanni xooqqinanna amandoonni'nereeti.

⁴ Kunnira, xa reyino mannira hururame wi'leemmona agurre"e; sheshifachishshinoonte"e.

⁵ Kuni Ajuujate Lagichi shettonniho; kakkadamannihonna hembeelamate dargaati. Kuni coyi ikkanno gede assinohu Olantote Mootichi Kaaliiqaati. Kataminke huxxi diigamino; kaa'lote raarranni raare ilaallate geeshsha leeltanno.

⁶ Elaami gobba manni faradi gaaretenna faradu aana ofolle, digaananna worbicho anga adhe dayi; Qiiri gaaddo wonqonsa qixxeessidhu.

⁷ Shaqqado Yihudu laggara faradi gaare wo'mitino; faradaasineno Yerusaalamete Katami waalchira albaanni uurrite no.

⁸ Yihudaho golo ikkinowi baalu diigamino. Hatte yannara, olu uduunni mine noo uduunne hexxitinoonni.

⁹ Daawiti Katamira diigamino coyi bati'rinota affinoonni; eeliidi kofamenni waa gamba assidhinoonni.

¹⁰ Yerusaalamete noo minna kiirtinoonni; huxxa gatamarate ikkitanno kinnara yitine, gama minna diigginoonni.

¹¹ Albi kofame waa qoltinara yitine, lamunku kinchu huxxi mereero koofficho seekkidhinoonni. Ikkollana konne coye balaxe hedinoha, kalaqaancho'ne Magano diqaagginoonni.

¹² Hatte yannara Olantote Mootichi Kaaliiqi, umo meexxitinanni gedenna, xiddu uddano uddidhine wi'litinanni gede woshshino'ne.

¹³ Ki'ne kayinni yinoonnita agurtine, «Ga'a reyineemmoreentillana techo into, ango» yitine, saada gorridhine maala ittinanni; woyinete xajjeno agginanni ji'litinanni.

¹⁴ Olantote Mootichi Kaaliiqi, «Lubbotenni noo geeshsha tini saonsa digurantanno. Konne coye coyi'roommohu ani Olantote Mootichi Kaaliiqaati» yee kulie.

SHEBINARA UYINOONNI QOROPHISHIISHSHA

¹⁵ Olantote Mootichi Kaaliiqi, «Marte mootete mini gashshaannira Shebinara,

¹⁶ ‹Shebina! Waammakki gaaru aana u'mate, kincho bocce galattowa seekki'rate ayi uyihe?› yite xa'mi» yiie.

¹⁷ « ‹Ati wolqaataamo ikkoottoha lawahera dandaanno; Kaaliiqi kayinni tuge agurannohe.

¹⁸ Qoleno, reyattowanna faradi gaarekki uurrite gattannowa, qunqumu gede asse hala'ladu xawira wigidiide tugannohe; ate ikkitonni kainohunni roorrichikki saalanno.

¹⁹ Kaaliiqi mootimmakki aaninni dirrisannohe; loosikki aaninnino hunannohe› yite kuli» yiie.

²⁰ Hatte yannara, soqqamaanchosi Hiliqiya beetto Eeliyaaqeemi woshshe abbanno.

²¹ Ateha ayirrinyu imaana uddisiisannosi; hiitokkino qodhisiisannosi; roorrekki baala haa're isira aanno. Isino Yihudunna Yerusaalamete mannira anna ikkanno.

²² Daawiti mine fannanni qulfe eemmosi; isi faninoha cufannohu dihee'ranno; isi cufinohano fanannohu dihee'ranno.

²³ Iso uduunne suxxinanni dawe gedeeha asseemmo; minisi mannirano ayirrinye ikkanno.

²⁴ Ikkollana minisi manninna fiixisi baalu ayirrite duha ikkitannosi. Mini uduunne baala suntanni dawe gede insa baalunku aanasi rarra'anno.

²⁵ Hakko barra Olantote Mootichi Kaaliiqi, «Kuni coyi baalu ikkanno woyite kaajjado uduunne suxxinanni dawe ta'e ubbanno. Dawete aana suntoonni uduunni baalu uwe hiiqqaqqamanno» yii. Konne coye coyi'rinohu Kaaliiqaati.