ISAYAASI 17 - Qullaawa Maxaafa

KAALIIQI DEMAASIQOTE KATAMA HUNANNO

¹ Demaasiqote kulloonni sokka kunninni aante noote: Kunni ka'a Demaasiqonniti katamimmasi gatteenna diigame duuno ikkanno.

² Sooriyu katamma mannu hee'rannokkita ona ikkitanno. Hoolannohu nookkiha saada hakkiicho hossanno.

³ Israeeleno qiisho nookkita ikkitanno; Demaasiqo wolu angara e'anno. Gattino Sooriyooti Israeelete manni gede shollitanno. Konne coye coyi'roommohu ani Olantote Mootichi Kaaliiqaati.

⁴ Hakka waro Israeelete ayirrinyi ba"anno; jironsa buximate soorrantanno.

⁵ Gide gamba assine ka'neenna fano gattino qarme gede ikkitanno. Gide gamba assinihu gedensaanni fano noo Lagicha Refayimiha labbanno.

⁶ Shiimu manni callu gatanno. Aliidi sinira 2 woy 3 gumi noosihu gede, qoleno woriidi sinira 4 woy 5 gumi gatino ejersi gede ikkitanno. Konne coye coyi'roommohu ani Israeelete Magani Kaaliiqaati.

⁷ Hakka waro mannu kaa'lo afi'rate Israeelete Qullaawa ikkinohuwa kalaqaanchinsawa higanno.

⁸ Angansanni seekkidhinoha kakkalote darganna Asheera mokkollora hixaana giirate seekkidhino uduunne hexxa agurtanno.

⁹ Hakka waro, Israeele bala tuggeenna diigantu katamma Hiwootunnitenna Amooraawootunnite gede ki'ne katammano mulla darga ikkite gattanno.

¹⁰ Israeele! Gatisino'neha golo'ne Magano habbine, wole gobba maganna ayirrisate biifado haqqe kaasidhinoonni.

¹¹ Kaassini barranni lophite daraarturo nafa, guma diuyitanno'ne; mitiimmanna hurannokki dhibballa abbitanno'ne.

KAALIIQI MANNISIRA HA'LANNO

¹² Baaru dambali gedenna wolqaataamu lolahi gede luultannotera batinye gosara aanne'e!

¹³ Gosa foonchu wayi gede luulturo nafa, Kaaliiqi rufannonsa woyite ilaalu aana billaallinsoonni galawi gedenna hombobolatte kayissino buko gede ikkitanno.

¹⁴ Hashsha hedeweelcho masille kalaqqanno; soodanno woyite kayinni mittuno dargaho diheedhanno. Mulqidhannonkerinna horritannonkeri hatto ikkitanno.