ISAYAASI 15 - Qullaawa Maxaafa

KAALIIQI MOAABI GUDANNO

¹ Moaabi daafira kulloonni sokka aante noote: Moaabi gobbara noori Eerinna Qiiri yinanni katamma mittu hashshinni diiganteenna, gobbatenni huuro ba'u.

² Dibooni mannino magannansa mine wi'lara gaarrate aanira fulanno. Moaabi mannino katammansa Nebonna Medeba daafira lowo geeshsha dadille wi'lanno. Dadillitino daafira, umonsanna ereedansano meexxitanno.

³ Anfannihu baalu xiddu uddano uddi'rinoho. Minu aananna gudumaaleho baalunku hindiiddi'ranni wi'lanno.

⁴ Hasebooninna Eliaale manni raaranno; raarensa Yahaatsi geeshsha iillitanno. Moaabi gaaddo nafa goontensa ba'eenna waajjite huxidhanno.

⁵ Moaabira godowinni wi'leemmo; mannu Zooaari, Egilaati-Shilishiya geeshsha darami. Shiimu manni wi'lanni Luhiiti Baga fulanno. Wolootu kayinni lowo geeshsha wi'litanni Horonayimi higge ba'ara wo'naaltanno.

⁶ Nimiriimi Xashshi xoanno; mule noo hayissono co'o yite mooltanno.

⁷ Mannuno gamba assi'rino jiro anga adhe daraame wayi gami haqqicho widoonni hige sae ha'ranno.

⁸ Moaabi qacce baalate raare macciishshinanni. Raarensano Egilayiminna Bieerieliimi katamma iillitanno.

⁹ Dibooni Katamira noo wayi mundee ikkanno. Ikkeennano Kaaliiqi Dibooni aana hakkiinni saino qarra abbanno. Moaabinni fulte xooqqannorenna reyotenni gattannore doobbiicho soye gudannonsa.