ISAYAASI 14 - Qullaawa Maxaafa

ISRAEELETE MANNITA QAFADOTENNI HIGA

¹ Kaaliiqi mannasi Israeele mararannonsa; galagalche mannasi asse doodhanno. Galagalte gobbansara heedhanno gede assannonsa. Wole gobba mannino daye insa ledo sumuu yee hee'ranno.

² Wole gosano Kaaliiqi uyinonsa gobba higganno gede kaa'litannonsa. Daga insara borojju gede ikkite soqqantannonsa; alba qafaddinonsare xa qolte insa qafaddanno. Alba gadadissinonsare gashshitanno gede roorre uyinanninsa.

BAABILOONI MOOTE REYO

³ Kaaliiqi qarrunninna yaaddotenni heedhinanniwiinni fushshanno'ne waro,

⁴ Baabilooni moote, «Kune haxawarru moote uwino! Kunni ka'a isi ayeno digadadisanno!

⁵ Kaaliiqi busha gashshaano wolqanna roorre haa're hoolino.

⁶ Insa manna wolqatenni gadadisse gashshitino; qafaddino gosano qarrissanni heedhino.

⁷ Gosa baala fooliishshidhe keere heedhanno; baalunku hagiidhanni faarsanno.

⁸ Hoommenna Libaanoosi daguwi nafa, kuni moote reyino daafira hagiidhitanno. Isi reyihu gedensaanni, tenne haqqe karara meesane haa're fulannohu dihee'ranno.

⁹ «Jeennaatu Baabilooni moote haa'rara qixxaawe no; ekerra baala iso haadhara milli milli yitanni no. Baattote aana noo wolqaataammi keerunni yitannosi; gashshaano baala ka'e uurrite:

¹⁰ Xa atino ninkente gede wolqa hoogitto? Ninke gedeeha ikkitto?

¹¹ Alba ayirrinyikkira maasinqotenni faarsinoonnihe; xa kayinni kune jeennaate dirrootto. Kunnira ma'nakki hoolo ittanno; uddanokki da'muultanno» yite qacifattannosi.

¹² Ati bakkalchu gedeehu Baabilooni moote, gordu gede gotti yiinohu ayirrinyikkiwiinni, hiitto ikkite uwitto! Gashshaano baala heeshshi assootto; xa kayinni ati uulla tugamootto!

¹³ Wodanikkinni, «Iimira gordo fule, ayirrinyunniha barcima'ya, Maganu beeddahera iimaanni wodheemmo; aliyyeenni maganna gamba yitanno ilaali aana mooheemmo.

¹⁴ Gomichoho aleenni sae, Wo'manka Dandaanno Magani gedeeha ikkeemmo» yite hedootto.

¹⁵ Ikkollana hedoottori ikka hoogeenna, baattote woroonni jeennaate dirrootto.

¹⁶ Reyitinori ate la'e maala'litanni, «Baatto milli assihu, gashshaano shafihu konneeti?

¹⁷ Katamma diige gobba ona asse aguri manchi konneeti? Usuramino manni tidhamannokki gedenna, minira higannokki gede hoolihu isooti?» yitanno.

¹⁸ Mootoolla baala ayirrado darga madaarantanno.

¹⁹ Ati kayinni madaaramittokkinni, mullawa tugante hiiqqaqqantino sinna gede kakkadamatto; reeshshikki aana olunniwa reyitino olanto reeshshi duunamanno. Reeshshikki insahu ledo kinnaame balera uwe kakkadamanno.

²⁰ Ati gobbakki hunte, mannakkino gudootto; kunnira, ati wole mootoolla gede waamma diafi'ratto; ate kunni bushu manchi ilama giddonni gatannohu dihee'ranno.

²¹ Xa oosokki gorramate qixxaabbo; ate ooso, akaakkansa cubbinni kainohunni reyo agartannonsa. Kunni ka'a insa giddonni baatto ragi'rannohu, woy katama minannohu dihee'ranno.

KAALIIQI BAABILOONI QORICHISHANNO

²² Olantote Mootichi Kaaliiqi, «Bala tuge Baabilooni billaalliseemmo; mittoreno digatiseemmo; sirchono disa'anno.

²³ Baabilooni baatto rirriwa asseemmo daafira, ulaaulle qalantannowa ikkitanno; baote feyanchinni co'o asse feemmonsa. Konne coye coyi'roommohu ani Olantote Mootichi Kaaliiqaati» yii.

KAALIIQI ASOORI QORICHISHANNO

²⁴ Olantote Mootichi Kaaliiqi, «Hedoommo coyi baalu wo'manno; coyi'roommorino ikkanno.

²⁵ Asooroota baatto'ya aaninni gudeemmo; ilaali'ya aana kadeemmonsa; manna'yano qambarinsa giddonni fushsheemmo. Duhisiissinonsa duhano haxonsa aaninni hooleemmo.

²⁶ Baatto baalate hedoommo hedo tenneeti; daga baala qorichishate anga'ya kayisoommo» yii.

²⁷ Olantote Mootichi Kaaliiqi tenne hedino. Ittisannosihu ayeti? Qorichishara anga kayise no. Amade hoolannosihu nooni?

KAALIIQI FILISXEEMOOTA QORICHISHANNO

²⁸ Moote Akaazi reyi diro Kaaliiqi kulino sokka aante noote:

²⁹ Ki'ne Filisxeemete manna! Kune ki'ne gannoonni siqqicho hiiqqantino. Ikkeennano hagiidhitinoonte; mittu hamashshi reyiro, wolu isinni roore harfaamu hamashshi qalamanno.

³⁰ Lowo geeshsha buxinohu irki'rannowa afi'ranno; gadadaammuno fafisidhe heedhanno. Ki'nera kayinni hude abbeemmo'ne; hudeno mittono gatissukkinni guddanno'ne.

³¹ Ati waalchu, oo yite wi'li! Ati katamuno, woo yite raari! Olantote giddonni mittu nafa badhera higannokkihu wolqaataamu diini aliyyenni dayino daafira, Filisxeemootu baalunku waajjitine huxidhe.

³² Filisxeemetenni daanno mannira ma dawarreemmo? Kaaliiqi Tsiyooni galagalche xintinotanna qarru giddo hee'ranno manni fooliishshi'rannowa afi're keere hee'ranno gede assinota kulleemmonsa.