ISAYAASI 12 - Qullaawa Maxaafa

GALATU FAARSO

¹ Hakka waro, «Kaaliiqa, kunni albaanni hanqoottoe; xaa kayinni hanqokki agurte, jawaachishoottoe daafira galaxxeemmohe.

² Kaaliiqi gatisaancho'yaati; ani iso hexxeemmo daafira, horonta diwaajjeemmo. Kaaliiqi wolqanna jawaante aannoe; isi gatisaancho'ya ikkanno.

³ Gatisaanchimmasi mannasi, buetenni hinkii'linanni wayi gede hagiirsiissanno» yitinanni faarsitinanni.

⁴ Qoltine, «Kaaliiqa galatte! Su'masino ayirrisse! Isi assinore dagate mereero dudubbe! Roorresino kulle!

⁵ Ayirrado coye assinona, Kaaliiqira faarse! Kuni loosisi gobba baalate egennamo!

⁶ Ledo'ne noohu Israeelete Qullaawa, lowoha ikkino daafira, Tsiyooni heedhinanniri baalu ilillisse!» yitine faarsitinanni.