ISAYAASI 10 - Qullaawa Maxaafa

¹ Manna'ya gadadisate kaajjado seera fushshitinannirira anne'e!

² Buxanete halaale beeshshitinannirira, galte shii'rinorenna amanna anna afidhinokkire tootayyeessitinannirira aanne'e!

³ Tenne assitinoonni beebba baalate Kaaliiqi qorichishanno'ne yannara hiitto ikkitinanniyya? Xeertote gobbanni bao abbanno'ne waro mayi woyyanno'ne? Kaa'lote ayewa hadhinanniyya? Jiro'neno hiikko maaxidhinanniyya?

⁴ Qafadamatenninna reyotenni hiitto ikkitine gattinanni? Kunni baalu coyi giddoonni Kaaliiqi hanqi diqiidanno; angasi ki'ne qorichishara kayisinowiinni dihiggino.

ISRAEELE QORICHISHATE KAALIIQI ASOORI KAYISANNO

⁵ Kaaliiqi, «Hanqi'ya siqqora, aari'ya damira Asoorira aanne'e!

⁶ Ane hanqissinoonnirira maganiweelootaho, jajja'ne saante gudde ki'ne doogote sabbi gede assite ceellagganno'nere Asooroota soyemmo'ne» yaanno.

⁷ Asoori moote kayinni hakkiinni sa'ino hedo afi'rino. Isi shiima manna calla ikkikkinni lowo gosa gudara hasi'rino.

⁸ Isino, «Olanto'ya mootoollate gedeetewe!

⁹ Insano Kaalinooni, Karkemiishi, Hamaatinna Arfaadi katamma amaddinoreeti. Samaariyanna Demaasiqono angara qo'litinoreeti.

¹⁰ Kunni albaannino Yerusaalamennitanna Samaariyu maganna roortino maganna afidhinoreno qeelloommo.

¹¹ Yerusaalamenna magansidhanno misilla baala Samaariyanna magannansa assummo gede diasseemmo?» yaanni boollaqi'ri.

¹² Kaaliiqi kayinni, «Tsiyooni Ilaalinna Yerusaalamete aana asseemmore gudummohu gedensaanni, boo'nasinna naaxxasi daafira Asoori moote qorichisheemmo» yii.

¹³ Asoori moote lede boollaqi'ranni, «Konne baala assoommohu aneeti; ani jawaataho; egennaamoho; busuleho. Wole gosa danna diigoommo; duu'nitinota jironsa baala adhoommo. Hatte gobbara heedhannore baala bareende'yanni shollishoommo.

¹⁴ Mootoolla baala ane albaanni ceate mini gedeereeti; quuphe gamba assinannihu gede jironsanna baattonsa gudhoommo. Konne baalanka assummo geeshsha ceichote baallicho geeshsha nafa milli yiinohu dino; cuqqi yiinohu nafa dino» yiino.

¹⁵ Kaaliiqi kayinni Asoori mootera, «Meesane bocanno mancho rooroomma yitannoni? Magaaze muranno mancho roortannoni? Siqqo manchu kayisikkinni ka'e affannoni?» yiino.

¹⁶ Kunnira, Olantote Mootichi Kaaliiqi olantosira laansheessanno dhibba soyanno. Asoori mooterano bisoho giirate gedee fooggalo soyanno.

¹⁷ Israeelete Qullaawa ikkinohu xawaabbinsa, insara giira ikkannonsa. Utanna qu'muudo nafa gatissukkinni mitto barra baalankare itte guddanno giira gede asse gudannonsa.

¹⁸ Biifadu dubbisinna gatisi dhibbu maniisse shaanno manchi gede ikke goofanno.

¹⁹ Dubbunniti haqqesi lowo geeshsha ajjanno daafira qaaqqu nafa kiirara dandaanno.

KAALIIQI GATTINO TARAARERA UYINO QAALE

²⁰ Hakka waro Yaiqoobi mininni gattinori Israeelete taraare, gawajjitinonsare Asooroota agurte Israeelete Qullaawa ikkinoha Kaaliiqa addaxxitanno.

²¹ Israeelete manni giddonni gatinohu shiimu manni addintanni wolqaataamu Maganiwa higanno.

²² Israeele! Manni'ne baaru shaafi geeshshiha ikkirono, galagale shiimu manni callu higanno; insara malino qorichi qixxaawe no.

²³ Olantote Mootichi Kaaliiqi gobba baalate isi malino bao abbanno.

²⁴ Kunnira, Olantote Mootichi Kaaliiqi, «Tsiyooni heedhinanniri manni'ya, alba Gibitsootu gadadissu'ne gede assite gadadissu'nerono Asooroota waajjitinoonte.

²⁵ Shiima yanna gedensaanni ki'nera hanqoommohu hanqi'ya higanno; hakkunni gedensaanni insa gudeemmo.

²⁶ Ani Olantote Mootichi Kaaliiqi Asooroota Hereebi Kinchi mule Midiyaamoota assummo gede lichetenni lungaaseemmo. Gibitsete assummonte gede siqqo'ya wayi aana gotti asseemmo.

²⁷ Hatte yannara ki'ne Asoorootu gadadishshinni fushsheemmo'ne. Hakkunni gedensaanni du'mitinanni daafira qambaru haxo'nenni hiiqqamanno ikkinnina aana'ne dihee'ranno» yaanno.

²⁸ Diinu bagadaano Gayi Katama iillitu. Migirooni widoonni higge sa'ara yite uduunnensa Mikimaasi wodhitu.

²⁹ Hakkiinni sa'e hashsha Gibia galtu; Raama Katami manni waajje huxi'ri. Moote Saaooli Katamira Gibia hee'ranno mannino xooqe bai.

³⁰ Galiimi manna, raarre! Laishi manna macciishshe! Anatooti manna, dawaro qolle!

³¹ Maadimenahinna Gebiimi manni lubbo adhe xooqanni no.

³² Techo hakku diini Noobi Katamira no. Yerusaalamete Katamira nooha Tsiyooni Ilaala waajjishiishate anga irbanni no.

³³ Kune Olantote Mootichi Kaaliiqi wolqasinni seeddaanna haqqe karanno; sinna baala quuxaranno.

³⁴ Kaaliiqi meesanetenni dubbo dole gudanno. Libaanoosi haqqeno Wolqaataamu Magani albaanni ubbanno.