IMBAAQOOMI 3 - Qullaawa Maxaafa

IMBAAQOOMI HUUCCATTO

¹ Faarsote daninni shiqishinoti himanaanchu Imbaaqoomi huuccatto aante noote.

² Kaaliiqa! Assoottoha dhaggete coye baala macciishshe lowo geeshsha waajjoommo; xaano yannankera alba loositto gedee looso ledde loosi; yanna yannantenni egennamanno gede assi; hanqatto yannarano marara agurtooti.

³ Maganu Teemaaninni daanno; Qullaawu Maganino Faaraani Ilaalinni daanno; ayirrinyisi gordo guggushshino; galatisi baatto wo'mino.

⁴ Gaacheenisi arrishshote gede xawanno; wolqasi maaxante noo angasi giddonni fulte, caabbichu faashshi yaanno.

⁵ Dhibba alba qole soyanno; qoomamu badhesiinni hige daanno.

⁶ Isi uurranno woyite baatto hembeelantanno; isi lairo gosa qece yitanno; bi're hundi ilaalla diigantanno; isi aanaanni hige ha'rannoti bi're albi gaarra xenfe'e yitanno.

⁷ Itiyophiyu qarramanna, Midiyaami gosano huxidhanna afoommo.

⁸ Kaaliiqa, faradokkinna qeellennita faradi gaarekki gulufitto yannara, wayibba hanqissinoheni? Woy baaru aarsinoheni?

⁹ Digaanakki bedeedootto; worbichuwakki qixxeessootto; baattono darte waa fushshootto.

¹⁰ Ilaalla ate affe waajjite huxidhu; xeenu lolahino baatto hayishshe sai; lowo baari luuli; dambaluno iimira hige kai.

¹¹ Worbichu gede kaattannotenna urdete gede bilicci yitanno banqonni kainohunni, arrishshonna aganu darga dargansa uurritu.

¹² Hanqite baattote aana ha'ramootto; daga baalano kakkadootto.

¹³ Mannakki gatisattoranna doorootto moote wodattora fulootto. Cubbaataammu sooreessa cancanootto; umunni lekkate geeshsha mulqootto.

¹⁴ Olanto hombobalattete gede billaallissankera, wolqa hooginoha runkutte amadde hagiidhitara daggu yannara, olantote hajajaanchi umo urdesinni qasootto.

¹⁵ Faradikkinni baara kakkaddanni saittota, wayi hambii.

¹⁶ Konne coye macciishshummota, mannimma'ya shiiltu; suume'ya huxidhu; miqqa'ya daaqqu; lekka'yano qece yitu. Maganu qarrissannonkere qorichisha geeshsha, cince agadheemmo.

¹⁷ Haqqicho laala gibburono, woyinete haqqichora gumu hoogirono, zayitete ejersi gumu nookkiha ikkirono, baatto gide laashsha gibburono, ge'reewu goo'raanunni goofirono, hoowete giddo saada hooggurono,

¹⁸ tenne baalate giddoonni, anera Kaaliiqinni tashshi yaannoe; gatisaanchi'ya Maganunni hagiidheemmo.

¹⁹ Mootichu Kaaliiqi wolqa aannoe; lekka'yano geedimunnite gede asse kaajjishannoe; ilaallate aana fafisi're qaafeemmo gede assannoe.